प्रहरीको ‘स्कर्टिङ’मा फरार अभियुक्त

धरान । कालो रंगको पेन्ट, कलेजी सर्टमाथि कालो रंगको स्टकोट । टाउकोमा युवा संघको झण्डाअंकित भादगाउँले टोपी । नेकपा एमालेले बिहिबार धरानमा मोटरसाइकल र्याली निकाल्दा यी युवाको निक्कै चुरीफुरी थियो । आफ्ना ‘भाईहरु’लाई उनी यसो गर, उस गर भन्दै कडा निर्देशन दिइरहेका थिए ।
पब्लिक उच्चमाविको मैदानबाट निस्किएको र्यालीको अन्त्यतिर उनी रोयल इन्फिल्ड बुलेट बाइक हाकेर र्यालीमा मिसिए । यी युवा अरु कोही नभएर दुई साताअघि धरान ११ शान्ति चोकमा पेस्तोल पड्काउने युवा संघका जिल्ला सदस्य एवं नगर इञ्चार्ज दिवस राई हुन् । ज्यान मुद्दा र अवैध हातहतियार बोकेको अभियोगमा किटानी जाहेरी परेपछि उनी प्रहरीको नजरमा फरार अभियुक्त हुन् । तर, बिहिबार भने उनी प्रहरीकै ‘स्कर्टिङ’मा खुलेआम मोटरसाइकलमा बजार डुले । प्रहरीले भने उनलाई नदेखेझै गर्यो ।
उनीमाथि दुई साताअघि कार्तिक १४ गते बिहान संघीय समाजवादी पार्टीका जिल्ला उपाध्यक्ष पारस काङमाङ र क्षेत्रीय कमिटिका उपसचिव मदन तामाङलाई गोली प्रहार गरेको अभियोग छ । दुवैले सोही दिन प्रहरीमा उजुरी दिएका थिए । तर, प्रहरीले उनलाई अहिलेसम्म पनि समात्न सकेको छैन । समाजवादीले फरार सुचिमा रहेका राईलाई खोजी जारी राखेको बताउने गरेपनि बिहिबार खुलेआम मोटरसाइकल र्यालीमा निस्कदा पक्राउ गर्न प्रहरीले हिम्मत गरेन । समाजवादीले भने प्रहरीले नै अभियुक्तको संरक्षण गरेको अरोप लगाउने गरेको छ । बिहिबारको दृष्यले उसको आरोपलाई वल दिएको थियो । ‘प्रहरीले खोजी गर्दैछौं भन्छ, तर बजारमा खुलेआम हिड्दा पनि पक्राउ गर्दैन, प्रहरीकै संरक्षणमा छ’–समाजवादीका जिल्ला उपसचिव ताजुब लिम्बूले भने ।
मोटरसाइकल र्यालीमा अभियुक्त राई सामेल भएको थाह पाएपछि समाजवादीले धरानका डिएसपी, सुनसरीका एसपी र एसएसपीलाईसमेत फोन गरेर पक्राउ गर्न दबाब दिएका थिए । तरपनि प्रहरीले नसुनेझै गर्यो । मोटरसाइकल र्यालीको ‘स्कर्टिङ’मा प्रहरी निरीक्षक मुकुन्द रिजालको कमाण्डमा प्रहरी टोली खटिएको थियो । उनले फरार अभियुक्त राई र्यालीमा आएको सुचना पाएपनि आफु अगाडि ‘स्कर्टिङ’मा रहेकोले नदेखेको बताए । ‘म अगाडि ‘स्कर्टिङ’मा छुँ, त्यसैले पछाडि को को छ,देखेको छैन’–प्रहरी निरीक्षक रिजालले भने–‘देखियो भनेपनि ठुलो मास छ, पक्राउ गर्न अलिक गाह्रो छ ।’ इलाका प्रहरी कार्यालयका डिएसपी टेकबहादुर तामाङले भने फोन उठाएनन् ।

धरान ११, मंगलबारेका युवाहरुलाई समाजवादीमा प्रवेश गराएको र घरदैलो गर्ने तयारी गरिरहेको बेला कार्तिक १४ गते बिहिबार बिहानै समाजवादीका नेतामाथि गोली प्रहार भएको थियो । गोली चलेको प्रमाण खोका नभेटिएपछि एमालेले भने समाजवादीले प्रोपोगण्डा बनाएको प्रतिक्रिया दिएको थियो । घटनास्थलबाट प्रहरीले आरोपित राईको बा २ च ९७४५ नम्बरको क्लासिक जिप नियन्त्रणमा लिएको थियो । उक्त गाडीलाई प्रहरीले आइतबार छोडिदिएको थियो । सोमबार पुनः धरानका पत्रकार गोपाल देवानलाई लक्षित गरेर विश्वस्त सुत्र साप्ताहिकको कार्यालयमा पनि गोली प्रहार भएको थियो । प्रहरीले यस घटनाका दोषीलाई पनि समात्न सकेको छैन ।