४ सय ६० वटा गल्फ बल सहयोग

धरान । गल्फ खेलको विकास एवं प्रर्वद्धनमा सहयोग पुर्याउन उद्देश्यले एक भूपू गोर्खा सैनिकले गल्फ वल सहयोग गरेका छन् ।
हाल बेलायतमा बसोबास गरिरहेका धरान १५ निवासी विनोद राईले धरान गल्फ क्लबलाई ४ सय ६० वटा गल्फ वल सहयोग गरेका हुन् । शनिबार निर्वाणा कन्टी क्लबमा आयोजित एक कार्यक्रममा राईले ती वलहरु गल्फ क्लबका अध्यक्ष पुर्ण लिम्बूलाई हस्तान्तरण गरेका थिए । ती वलहरु जुनियर खेलाडी, क्लबका सदस्य एवं खेलाडीहरुलाई प्रदान गरिने क्लबले जनाएको छ ।
करिब चार बर्षअघि धरानकै कोर्षमा गल्फ सिकेका राईले जुनियर खेलाडीहरुसँग पर्याप्त वल नभएको देखेर सहयोग गरेको बताए । ‘साना भाईहरु राम्रो खेलेको देखे तर उनीहरुलाई वलको समस्या भइरहेको पाएँ’–सहयोगी राईले भने–‘त्यसैले राम्रो ट्रेनिङ होस् र धरानको नाम राख्न सकोस् भनेर वल सहयोग गरेको हुँ ।’ सहयोगी राईले ती सबै वलहरु बेलायतबाट नै ल्याएका हुन् । उनले यसअघि पनि क्लबलाई ४ सय थान टि सहयोग गरेका थिए ।
क्लबका अध्यक्ष लिम्बूका अनुसार एक खेलाडीलाई १० वटा वल दिइनेछ । गल्फ वल बजारमा खरीद गर्नुपर्दा एक प्याकेटको एक हजार रुपैया तिर्नुपर्छ । एक प्याकेटमा तीन वटा मात्रै वल हुन्छ । ‘कोर्षमा धेरैजसो वल हराउने गर्छ, खेलाडीले वल किन्नुपर्दा निक्कै खर्च गर्नुपर्छ’–गल्फ क्लबका अध्यक्ष लिम्बूले भने–‘यो सहयोगले खेलाडीहरुलाई धेरै राहत मिल्छ, सहयोगीलाई हृदयदेखि नै आभार प्रकट गर्दछुँ ।’

                           र्जमन कपको तयारी

 धरान । जर्मन कप एमेच्योर गल्फ प्रतियोगिताको दोस्रो सँस्करण डिसेम्बर पहिलो साता हुने भएको छ ।
गल्फ प्रशिक्षककोरुपमा जर्मनीमा रहदै आएका धराने व्यावसायिक गल्फर सविन सापकोटाको मुख्य प्रायोजनमा गत बर्षदेखि यो प्रतियोगिता शुरु भएको थियो । सोही प्रतियोगिताको दोस्रो सँस्करण डिसेम्बर ७ का दिन आयोजना गरिने धरान गल्फ क्बलका अध्यक्ष पुर्ण लिम्बूले जानकारी दिए । उनका अनुसार प्रतियोगिता धरानका एमेच्योर गल्फरहरुको मात्रै सहभागीता रहनेछ ।
जर्मन कपकोरुपमा गत बर्ष आयोजना गरिएको प्रतियोगिताको नाम यसपटक भने परिवर्तन हुनसक्ने क्लबले जनाएको छ । प्रतियोगिताका मुख्य प्रायोजक एवं व्यावसायिक खेलाडी सविन हाल भने धरानमा छन् । प्रतियोगिताको पहिलो सँस्करणमा विजय राई विजेता बनेका थिए ।
यसैगरि, जर्मन कपलगत्तै जुनियर खेलाडीहरुलाई एक साताको प्रशिक्षण दिइने क्लबले जनाएको छ । जर्मन खेलाडी आन्द्रेइज फ्लेसरको सहयोगमा बालबालिकाहरुलाई प्रशिक्षण दिइने क्लब अध्यक्ष पुर्ण लिम्बूले जानकारी दिए । उनका अनुसार प्रशिक्षणमा २० बर्षमुनिका किसोरकिसोरी एवं बालबालिकाहरुलाई मात्रै सहभागी गराइनेछ ।