राजनीतिक संरक्षणमा हुने गुण्डागर्दी रोक्न सञ्चारकर्मीको सुझाव

धरान । राजनीतिक संरक्षणको आडमा बढ्दो गुण्डागर्दी(डन) एवं अपराधलाई नियन्त्रण गर्नु प्रहरीको मुख्य चुनौती रहेको धारणा धरानका सञ्चारकर्मीहरुले व्यक्त गरेका छन् ।
इलाका प्रहरी कार्यालयमा हालै सरुवा भई आएका प्रमुख एवं डिएसपी सञ्जय सिंह थापाले आयोजना गरेको परिचयात्मक अन्र्तक्रियामा यहाँका सञ्चारकर्मीहरुले यस्तो धारणा राखेका हुन् । साथै, उनीहरुले प्रहरी कार्यालयलाई सञ्चारमैत्री बनाउन पनि सुझाव दिएका छन् । अपराधले राजनीतिक संरक्षण पाइरहेको र प्रहरी प्रशासनलाई चर्को दबाब आइरहेपनि कानुन वमोजिम कारबाही गर्न नहिच्किचाउन पनि पत्रकारहरुको सुझाव थियो । सञ्चारमैत्री प्रहरी कार्यालय बन्न सके अपराध नियन्त्रणमा सहकार्य एवं समन्वय गर्न सहज हुने पत्रकारहरुको धारणा थियो ।
‘प्रहरी कार्यालय सञ्चारमैत्री भइदियोस्, कुनै पनि सुचना पाउन पत्रकारहरुलाई व्यवधान नहोस्’–पत्रकार महासंघ सुनसरीका अध्यक्ष केशव घिमिरेले भने–‘अपराधको रुपहरु पनि फेरिदैछ, नयाँ नयाँ तरिकाले समाजमा अपराधको जालो फैलिदैछ, त्यसलाई बुझेर प्रहरी प्रशासनले तोड्नुपर्छ ।’ धराने जस्ता विकास प्रेमी, सहयोगी भएको र यहाँको सँस्कार,सँस्कृति बुझेर काम गर्न सके धेरै सजिलो हुने उनले बताए ।
अग्रज पत्रकार एवं लेखक भवानी वरालले धरानमा दुव्र्यसनबाट शुरुभएको अरापधले समाज आक्रान्त भइरहेको र त्यसलाई राजनीतिक संरक्षण रहेको बताए । टोले दादा र डन प्रवृत्तिले पेशाकर्मी, व्यवसायीहरु हैरान भएपनि त्रासको कारणले विरोध गर्न नसकिरहेको उनको भनाई थियो । प्रहरी प्रशासनले दह्रो भएर कारबाही अघि बढाएमा त्यस्ता घटनाहरु सार्वजनिक हुने उनले बताए । ‘बाहिर केही भएको छैन जस्तो देखिन्छ, तर भित्रभित्रै धरान पुरै अशान्त छ, टोले दादा र डनहरुले धेरै घटनाहरु प्रहरीमा पुग्न नदिई भित्रभित्रै मिलाइरहेका छन्’–वरालले भने–‘प्रहरीले खुट्टा दह्रो टेक्ने हो भने ती घटनाहरु बाहिर आइहाल्छन् ।’
पत्रकार गोपाल देवानले अपराधमा राजनीतिकरण र राजनीतिमा अपराधको साँठगाठले दबाब खेप्नु पर्दा प्रहरी प्रशासनले पनि काम गर्न नसकेको धारणा व्यक्त गरे । पत्रकार र प्रहरीबीच समन्वय एवं सहकार्य भए अपराध नियन्त्रण हुने उनको भनाई थियो । आदिबासी जनजाति पत्रकार महासंघ(फोनिज)का केन्द्रीय उपाध्यक्ष भैरव आङ्लाले ‘डन’ एवं गुण्डागर्दी प्रवृत्तिका व्यक्तिहरुसामु प्रहरी प्रशासन निरीह देखिन नहुने धारणा व्यक्त गरे । बिबिसि नेपाली सेवाकी सीता मादेम्बाले प्रहरीले राम्रो काम गरे सबैले साथ दिने उल्लेख गर्दै प्रहरी अधिकारीहरुसँग गुण्डागर्दी एवं अपराधिक व्यक्तिहरुको पहुँचलाई तोड्नुपर्ने बताइन् । फोनिज सुनसरीका अध्यक्ष जनकऋर्षि राईले नयाँ प्रहरी प्रमुख आउदा मात्रै नभई अपराध नियन्त्रणको एक्सन निरन्तर जारी राख्नुपर्ने बताए ।
चार दिनअघि मात्रै धरान सरुवा भइ आएका डिएसपी थापाले शान्तिसुरक्षा कायम राख्न तथा अपराध नियन्त्रणमा सञ्चारकर्मीसँगै सरोकारवालाहरुसँ हातेमालो गरेरअघि बढ्ने प्रतिवद्धता जनाए । ‘अपराधलाई हावी हुन नदिन सहकार्य र समन्वय गर्नेछुँ, प्रहरी कार्यालय मिडिया मैत्री हुनेछ’–डिएसपी थापाले भने–‘समाजमा कोही पनि डन हुदैनन्, तिनीहरुलाई तपाई, हामीले नै डन बनाएका हौं, त्यसलाई निर्मुल गर्न पनि तपाई हामी नै कस्सिनुपर्छ ।’ उनले कुनै पनि सुचना नलुकाउने प्रतिवद्धता जनाउदै यथार्थ कुरा बुझेर मात्रै समाचार सम्प्रेषण गर्न पनि सञ्चारकर्मीहरुलाई आग्रह गरे । डिएसपी टेकबहादुर तामाङ युनएन मिशनअन्र्तगत सुडान जाने पक्का भएपछि थापा धरान सरुवा भएर आएका हुन् । उनी यसअघि नारायणी अञ्चल प्रहरी कार्यालयमा कार्यरत थिए । धरानमा डिएसपी तामाङ रहदा इलाका प्रहरी कार्यालयलाई सञ्चारमैत्री बनाएको, इमान्दाररुपमा शान्तिसुरक्षा कायम गर्न खटिएको भन्दै प्रसंसा वटुलेका थिए ।