धरानमा भवन निर्माण सम्बन्धी प्रर्दशनी हुने

धरान । भवन निर्माणसँग सम्बन्धित प्रविधि, उत्पादनका वस्तु तथा सेवाहरुमा पुर्वाञ्चलका उपभोक्ताको पनि पहुँच पु¥याउने उद्देश्यले आगामी माघ दोस्रो साता धरानमा ५ दिने भवन निर्माण प्रर्दशनी(बिउल्डटेक एक्जिविसन) हुने भएको छ । भवन निर्माणमा संलग्न प्राविधिकहरुको संस्था प्राविधिक परामर्शदाता समाज नेपालले माघ १५ गतेदेखि १९ गतेसम्म यो प्रर्दशनी गर्न लागेको हो ।
समाजका अनुसार धरान १२ स्थित पब्लिक उच्चमाविको मैदानमा हुने प्रर्दशनीबाट उपभोक्ताहरुले भवन निर्माणसम्बन्धी विभिन्न उत्पादनहरु एकै स्थानमा पाउनेछन् भने गुणस्तरीय तथा वलिया भवन(घर) निर्माणबारे चेतनामुलक प्राविधिक जानकारी पनि पाउनेछन् । साथै, विभिन्न कम्पनीका उत्पादनहरुमा उपभोक्ताहरुले छुट तथा अफरहरु पनि पाउने समाजका अध्यक्ष विवेक अग्रवालले जानकारी दिए । ‘नेपालमा प्रायःजसो सबै प्रविधि, उत्पादन र सेवाहरु राजधानी केन्द्रीत छ, त्यसैले भवन निर्माणसम्बन्धी सम्पुर्ण सेवा, उत्पादन र प्रविधिबारे पुर्वाञ्चलका जनतालाई जानकारी गराउन यो प्रर्दशनी गर्न लागेका हौं’–मुल आयोजक समितिका संयोजकसमेत रहेका अग्रवालले भने ।
प्रर्दशनीमा ८१ वटा व्यावसायिक स्टलहरु रहनेछन् । त्यसमा भवन निर्माण गर्दा आवश्यक बैक लोन, कन्सल्टेण्ट, आवश्यक सिमेन्ट, बालुवा, गिट्टी, रड, रंग, औजारहरुदेखि राजधानीमा मात्रै सिमित क्रंक्रिट फ्लोरिङ, कम्प्युटराइज कुदिएको ढोका जस्ता नयाँ प्रविधिहरुको पनि बिक्री तथा प्रर्दशनी रहनेछन् । धरानमा ग्रीन होम्सको अवधारणा लागु भएपनि होलो ब्लक मात्र प्रचलनमा आएको छ । तर, काठमाण्डौंमा धेरै किसिमका ब्लकहरु छन् । प्रर्दशनीमा ती विभिन्न किसिमका ब्लकहरु पनि रहने आयोजकले जनाएको छ । प्रर्दशनीमा ८ वटा भवन निर्माणसँग सम्बन्धित जानकारीमुलक प्रर्दशनी हुनेछ । जहाँबाट उपभोक्ताहरुले गुणस्तरीय र बलियो घर निर्माण कसरी गर्ने भन्ने जानकारी पाउनेछन् । ‘हामी वालुवा, सिमेन्ट, रंगजस्ता वस्तुहरुको भेराइटी राख्छौं र कुन अनि किन राम्रो हुन्छ भनेर उपभोक्ताहरुलाई बुझाउछौं’–अग्रवालले भने–‘भुकम्पसँग सम्बन्धीत डकुमेन्ट्री र अन्र्तक्रियाहरु पनि हुन्छ ।’
प्रर्दशनीले उत्पादक, प्रर्वद्धक तथा व्यवासायीहरुले आफ्नो उत्पादनबारे आमउपभोक्तालाई जानकारी गराउने अवसर पाउनेछ भने उपभोक्ताहरुले पनि गुणस्तरीय उत्पादन एकै थलोमा पाउने आयोजकको दाबी छ । प्रर्दशनीमा भुकम्प प्रतिरोधी भवन, पिलरको डमी पनि हुनेछ भने भुकम्प प्रतिरोधी भवन निर्माण, वास्तु शास्त्र, हरित गृह तथा प्राकृतिक प्रकोपजन्य घटनाबाट हुने सम्भावित क्षतिको पुर्व तयारी र निर्मित भवनमा रहेका समस्या हल गर्ने बिषयमा विज्ञहरुको सहभागितामा अन्र्तक्रिया पनि गरिने समाजले जनाएको छ । प्रर्दशनी सम्पन्न गर्न ५१ सदस्यीय मुल आयोजक समिति, विभिन्न समिति र उपसमिति गठन गरिएको पनि समाजले जानकारी दिएको छ । करिब २६ लाख खर्च हुने अनुमान गरिएको प्रर्दशनीमा एक लाख व्यक्तिहरुले अवलोकन गर्ने र ६ करोड बराबर करोबार हुने आयोजकले अनुमान गरेको छ ।