पर्यटकको बसाई लम्ब्याउन जंगल सफारी
धरान आउने पर्यटकहरुलाई थप एक रात बास बसाउने गरी जंगल सफारीको प्याकेज तयार गरेको सेक्षले जनाएको छ । यो एक दिनको प्याकेज हो । तर, पर्यटकहरुले चाहेमा कोशीटप्पुमा होम स्टे पनि राख्न सकिने सेक्षआवद्ध पर्यटनकर्मी वासुदेव वरालले जानकारी दिए । ‘पर्यटकहरुलाई घुमाउने, खर्च गराउने गन्तव्यको कमी छ, त्यसैले एक दिन भएपनि बसाउने हो भने नयाँ गन्तव्य थप्नुपर्छ भनेर यो प्याकेज तयार गरेका हौं’–प्याकेजबारे जानकारी दिदै वरालले भने–‘बिहान ६ बजेदेखि साँझसम्मको प्याकेज हो, पर्यटकले चाहेमा होम स्टे पनि राख्छौं ।’
सेक्षले तयार गरेको प्याकेजअनुसार धरान दक्षिणको चारकोसे जंगलमा ठुलो फायरलाईन र अर्को धरान १९ को हरियाली वन समुहबाट ट्र्याक शुरु हुन्छ । उक्त ट्रयाक धरान १७ स्थित कुम्भीआहालबाट भरौल गाविस निस्कन्छ । त्यहाँबाट महेन्द्रनगर, प्रकाशपुर हुदै कोशीटप्पु वन्यजन्तु आरक्षमा पुग्छ । आरक्षमा हात्ति सफारी गर्दै जंगली भैसी अर्ना अवलोकन हुन्छ भने विभिन्न प्रजातिको चराहरुको पनि अवलोकन गरिन्छ । कोशी टप्पु अर्नाको एक मात्र बासस्थान हो भने चराहरुको स्वर्ग मानिन्छ । यहाँ आगन्तुक चराहरु हेर्न विदेशीहरु बर्षेनी आउने गर्छन् ।
पुर्वी नेपालका पर्यटकीय गन्तव्यहरुको १७ वटा प्याकेजसहित पाँच बर्षअघि सेक्ष ट्राभलिङ सञ्चालनमा आएको थियो । टुर प्याकेज तयार गर्ने र पर्यटकहरुलाई घुमाउन लैजाने यो धरानको पहिलो टुर अपरेटर पनि हो । यसको सञ्चालकहरुले हाल धरान ४ मा होटल सेक्ष, धरान ९ आचार्यलाइनमा सेक्ष इन र सेक्ष यातायात पनि सञ्चालनमा ल्याइसकेको छ । ‘हरेक बर्ष पर्यटनमा केही न केही नयाँ योजना, प्याकेज लञ्च गर्ने हाम्रो लक्ष्य हो’–वरालले भने ।
Comments
Post a Comment