राष्ट्रिय खेलकुद आयोजनाबाट सन्तुष्ट छुः सदस्य सचिव विष्ट

धरान । राष्ट्रिय खेलकुद प्रतियोगिता भएर पनि सातौं सँस्करण फितलो र भद्रगोलरुपमा आयोजना भइरहेको भनि आलोचना भइरहे पनि राष्ट्रिय खेलकुद परिषदका सदस्य सचिव केशव विष्टले भने आफु सन्तुष्ट रहेको बताएका छन् ।
बुधबार धरानमा सातौं खेलकुदको समापनबारे आयोजित पत्रकार सम्मेलनमा उनले व्यावस्थापनमा कमीकमजोरी रहेको स्वीकार गरेपनि सिमित बजेट र साधनस्रोतको वावजुद प्रतियोगिता आयोजना भएकोले आफु सन्तुष्ट रहेको बताए । ‘मुल्यांकन नै गर्ने हो भने सन्तुष्टी छ, व्यवस्थापनमा सामान्य छैन तर पहिलाको जस्तो धेरै विवादहरु भएको छैन’–उनले भने–‘सानो बजेटमा यतिको कार्यक्रम भएको छ । खोज्दै गयौं भने असन्तुष्टीहरु धेरै छन् तर सिमित स्रोत साधन, सिमित समयभित्र थोरै बजेटमा गर्नु प¥यो, यी सबै कुराबाट हेर्दा सन्तुष्टी हुनुपर्छ ।’
पुर्वघोषणा अनुसार पुर्वाधार तयार नगरी राष्ट्रिय खेलकुद किन गराएको भन्ने प्रश्नमा उनले पुर्वाधारलाई बजेट नछुट्याएको र जे जस्ता पुर्वाधार थिए, त्यसैलाई स्तरोन्नती गरेर आयोजना गरिएको जिकिर गरे । यद्यपी उनले सबै खेलहरु अन्र्तराष्ट्रिय मापदण्डअनुसार नै आयोजना भएको बताए । ‘कमीकमजोरी भएन भन्दैनौं तर नियतवश भएको होइन । कति अञ्जानमा हुन्छन्, कति बाध्यकारी हुन्छन् । सबैलाई सच्याउदै जान्छौं’–उनले भने । खेलाडीहरुले खाना र बस्नमा गुनासो नगरेको पनि उनले बताए ।
पुष ८ गतेबाट पुर्वाञ्चलको विभिन्न स्थानमा भइरहेको वृहत सातौं राष्ट्रिय खेलकुद पुष १५ गते धरानमा समापन हुदैछ । पुर्वाधार अभाव, कमजोर व्यावस्थापनको कारण सातौं खेलकुदको तीब्र आलोचना भइरहेको छ । यसअघि धरान रंगशालामा गर्ने भनिएको समापन समारोह हाल पुरुष फुटबल सञ्चालन भइरहेको धरान १७ स्थित एन्फा टेक्निकल सेन्टरमा नै हुने राखेपले प्रष्ट्याएको छ । साथै, समापनमा प्रधानमन्त्री आउने भनिए पछि उपराष्ट्रपति नन्दकिसोर पुन आउने सदस्य सचिव विष्टले बताए । ‘रंगशालाको मैदान तयार नभएकोले समापन फुटबलको समापनसँगै एन्फाको मैदानमा नै हुनेछ । समापनलाई भव्य बनाउन तयारी शुरु गरिसकेका छौं’–सदस्य सचिव विष्टले भने ।

उनका अनुसार समापन समारोहमा मार्चपास, फुटबलको फाइनल खेल, साँस्कृतिक कार्यक्रम, सेनाको खुकुरी नृत्यसँगै झण्डोत्तोलन र ८ औं सँस्करण कहाँ आयोजना हुने भनेर घोषणासँगै झण्डा हस्तान्तरण कार्यक्रम हुनेछ । ‘अहिलेसम्म ८ औंको दाबी पश्चिमाञ्चल र मध्यपश्चिमाञ्चलले दाबी गरेको छ, यी दुवैमध्ये कुनै एक ठाउँमा ८ औं आयोजन ागर्ने निर्णय हुन्छ र झण्डा हस्तान्तरण पनि गरिनेछ’–सदस्य सचिव विष्टले भने । त्यसपछि फुटबलको विजेतालाई पदकसँगै राष्ट्रिय किर्तिमानी खेलाडीहरुलाई नगद २५ हजार पनि प्रदान गरिनेछ । सातौं खेलकुदमा हालसम्म महिला सटपुट र ज्याभ्लिन थ्रोमा प्रहरीकी चन्द्रकला लाम्गादेले २ राष्ट्रिय किर्तिकान राखेकी छिन् भने भारोत्तोलन महिला ५३ केजीमा प्रहरीकी देवी चौधरीले स्न्याच स्पर्धामा किर्तिमान राखेकी छिन् । यस्तै, भारोत्तोलनको महिला ५८ केजीमा आर्मीकी कमला श्रेष्ठले स्न्याच, क्लिन एण्ड जर्क र कुलमा किर्तिमान कायम गरेकी छिन् भने भारोत्तलनको पुरुष ८५ केजीको क्लिन एण्ड जर्कमा आर्मीका कमलबहादुर अधिकारीले पनि किर्तिमान राखेका छन् । साथै, भारोत्तोलनको महिला ७५ केजी स्न्याच, क्लिन एण्ड जर्क र कुलमा प्रहरीकी तारादेवी पुनले पनि राष्ट्रिय किर्तिमान कायम राखेकी छिन् ।