भेडेटारमा फुड फेस्टिवल शुरु

धरान । अंग्रेजी नयाँ बर्षको अवसर पारेर पुर्वको प्रमुख पर्यकीयस्थल भेडेटरामा तीन दिने भेडेटार फुड फेस्टिवल(खानपान उत्सव) शनिबारदेखि शुरु भएको छ । नयाँ बर्षमा घुम्न आउने आन्तरिक र बिशेष गरी भारतीय पर्यटकहरुलाई लक्षित गरेर होटल एशोसिएशन अफ भेडेटारले उत्सवको आयोजना गरेको हो ।
सधै चिसो र सफा रहने भेडेटार उत्सवको कारण चिटिक्क सिंगारिएको छ भने शनिबार बिहानैदेखि भेडेटारमा आन्तरिक तथा बाह्य पर्यटकहरुको चहल पहल बढको छ । सोमबारसम्म चल्ने उत्सवको कांग्रेस नेता तथा भौतिक योजना तथा यातायात राज्यमन्त्री सिताराम मेहेताले गरेका थिए । मन्त्री मेहेताले समृद्ध नेपाल बन्ने आधार पर्यटन भएको उल्लेख गर्दै भेडेटारको पर्यटकीय पुर्वाधार विकासमा सक्दो सहयोग गर्ने प्रतिवद्धता जनाए । भेडेटार धरानदेखि करिब १६ किलोमिटर उत्तरमा धनकुटा र सुनसरी जिल्लाको सिमानामा अवस्थित छ ।
पछिल्लो समय छिमेकी मुलुक भारतबाट पुर्व घुम्ने आउने पर्यटकहरुको संख्यामा वृद्धि भएको छ । तिनै भारतीय पर्यटकहरुको बसाई लम्ब्याउने उद्देश्यले अंग्रेजी नयाँ बर्षको मौका पारेर उत्सव आयोजना गरिएको होटल एशोसिएशन भेडेटारका अध्यक्ष लिलाराज लावतीले बताए । उत्सव अवधिभर स्थानीय कृर्षि उत्पादन, मौलिक साँस्कृतिक प्रर्दशनी, विभिन्न जातीय परिकारहरु मुख्य आकर्षण रहने उनले बताए । ‘पर्यटकहरुको बसाई लम्बियोस भन्ने मुख्य उद्देश्य हो, त्यसको लागि कृर्षि उत्पादन, घरेलु हस्तकला प्रर्दशनी, जातीय खानाको परिकार र सँस्कृति प्रर्दशन गछौं’–उनले भने–‘यही मौकामा पर्यटकहरुलाई भेडेटार आसपासको गन्तव्यहरुको टुर प्याकेज पनि सहुलियतमा व्यवस्था गरेका छौं ।’

उत्सवमा पर्यटकहरुले राई, लिम्बु, याम्फु, मगर, तामाङ, थारुलगायतका जातजातिहरुको बिशेष परिकारको स्वाद चाख्न पाउनेछन् । तिनै जातिका मौलिक साँस्कृति साकेला, केलाङ, हुर्रा, यालाङलगायत पनि पर्यटकहरुको लागि आकर्षण हुनेछन् । जातीय परिकारका स्टलहरुलाई आयोजकले निःशुल्क उपलब्ध गराएको हो । अग्र्यानिक खानेकुरा र कृर्षि उत्पादन उत्सवको थप आकर्षण हुन् । उत्सवलाई लक्षित गरेर भेडेटारका व्यावसायीहरुले पर्यटकहरुलाई डाँडाबजारस्थित ध्वजे डाँडाबाट सुर्योदय हेर्नेदेखि राजारानी तालमा बोटिङ गर्नेसम्मको प्याकेज बनाएका छन् । यो प्याकेजमा लाप्चेटारस्थित एसियाकै ठुलो वरको रुख पनि अवलोकन गराइनेछ । एशोसिएशनका सचिव जितेन्द्र रुम्दालीका अनुसार प्रतिव्यक्ति मात्र २ हजार रुपैयाको यो टुर प्याकेजमा यातायात र खानासमेतको सुविधा छ । पर्यटकले चाहेमा डाँडाबजारमा होम स्टे पनि राखिने उनले बताए । डाँडाबजारथित ध्वजे डाँडाबाट सुर्योदयको सुन्दर दृष्यवलोकन गर्ने यो उपयुक्त समय पनि हो । पर्यटकहरुलाई छुटको साथ बिशेष प्याकेजमा प्याराग्लाइडिङ गराउन व्यावसायीसँग कुरा गरेको पनि आयोजकको भनाई छ ।
उत्सवमा आउने पर्यटकहरुलाई भेडेटार आसपासको ऐतिहासिक एवं धार्मिक महत्वका पर्यटकीय गन्तव्यहरुको जानकारी गराउदै घुम्न जान प्रेरित गरिने आयोजकले जनाएको छ । भेडेटार चोक नजिकै बेलायती युवराज चाल्र्स चढेको डाँडा चाल्र्स प्वाइन्ट(शैलुङ डाडा) छ । जहाँबाट भेडेटार बजारसँगै कोशी राजमार्गअन्र्तगत धरान धनकुटे नागवेली सडकको सुन्दर दृष्य हेर्न सकिन्छ । यस्तै, भेडेटार आसपासमा ऐतिहासिक साँगुरी गढी, नमस्ते झरना, सिएनएनले उत्कृष्ट गन्तव्यमा पारेको नाम्जे गाउँ र थुम्किस्थित आत्माबस्ने घर, सुर्योदय गुम्बालगायत स्थलहरु पनि छन् । उत्सव अवधिमा २० लाखसम्मको कारोबार हुने आयोजकले अनुमान गरेको छ भने ३० हजार पर्यटकहरुले अवलोकन गर्ने अपेक्षा छ । आयोकजले उत्सव अवधिभर २५ लाख बढी आर्थिक कारोबार र २० हजार भन्दा बढी आन्तरिक तथा बाह्य पर्यटक भित्रिने अपेक्षा लिएको छ ।