उसुमा आर्मीलाई १० स्वर्ण(फोटोफिचर)
धरान । सातौं वृहत राष्ट्रिय खेलकुद प्रतियोगिताअन्र्तगतको उसुमा नेपाली सेनाले सर्वाधिक १० स्वर्ण पदक जितेको छ । धरान १३, अमरहाटस्थित अमर सेवा समाजको कबर्ड हलमा मंगलबार सम्पन्न खेलमा सेनाले १० स्वर्णसहित ४ रजत र ५ काँस्य पदक जितेको हो ।थावलु विधातर्फ सोमबार नै विजय थापा सिन्जाली, हरिप्रसाद गोले र सबिता राईले सेनालाई स्वर्ण दिलाएका थिए । मंगलबार महिला चियान सु छियन सुमा ओशिन राई र महिला नान छवान अलराउण्डमा निमा घर्तीमगरले सेनालाई स्वर्ण पदक दिलाइन् । सान्सौंतर्फ पुरुष ७० केजीमा चित्रसिं ठकुरी, पुरुष ८० केजीमा रामचन्द्र बराल, महिला ६० केजीमा लुमन्ती श्रेष्ठ, महिला ६५ केजीमा अरुणा राई र महिला ७० केजीमा विन्दु पुनले सेनालाई स्वर्ण दिलाए ।
विभागिय टोली सशस्त्रले उसुमा ६ वटा स्वर्ण, ३ रजत र ४ काँस्य पदक जित्यो । सोमबार थाउलु विधाको महिला छाङ्ग छ्वानमा सुस्मिता तामाङले सशस्त्रलाई एक मात्र स्वर्ण दिलाएकी थिइन् । मंगलबार भने सान्सौंतर्फ ४८ केजीमा अशोक खालिङ, ५६ केजीमा अमर सुनार, ६० केजीमा मंगलप्रसाद थारु, ६५ केजीमा संजिव मर्हजन र ८५ केजीमा तेजबहादुर पल्लीले सशस्त्रलाई स्वर्ण पदक दिलाए ।
Comments
Post a Comment