अंग्रेजी नयाँ बर्षमा भेडेटार फुड फेस्टिवल
धरान । अंग्रेजी नयाँ बर्षमा घुम्न आउने भारतीय पर्यटकहरुको बसाई लम्ब्याउने उद्देश्यले भेडेटारमा तीन दिने फुड फेस्टिवल(खानपान उत्सव) हुने भएको छ । होटल एशोसिएशन भेडेटारले बुधबार पत्रकार सम्मेलन गर्दै डिसेम्बर ३१ देखि जनवरी २ (पुष १६ देखि १८ गते)सम्म पाँचौ फुड फेस्टिवल आयोजना गर्ने जानकारी गराएको हो ।
पछिल्लो बर्षहरुमा भेडेटारमा घुम्न आउने पर्यटकहरुमा भारतीयहरुको संख्या बढ्दो छ । फेस्टिवलको अवसरमा स्थानीय उत्पादन, मौलिक साँस्कृतिक प्रर्दशनीसँगै टुर प्याकेजसमेतको व्यवस्था गरेर भारतीय पर्यटकहरुको बसाई लम्ब्याउने योजना रहेको एशोसिएशनले जनाएको छ । ‘आन्तरिक पर्यटकहरु त भेडेटारमा आइरहेकै छन्, यो फेस्टिवल भने भारतीय पर्यटकहरुलाई तार्गेट गरेर आयोजना गरिएको हो’–एशोसिएशनका अध्यक्ष लिलाराज लावतीले भने–‘यसपाली जातीय परिकार, सँस्कृति फेस्टिवलको बिशेष आकर्षण हुनेछ ।’ उनका अनुसार छिमेकी मुलुक भारतबाट परिवारसहित भेडेटार घुम्न आउने पर्यटकहरुको संख्या क्रमशः वृद्धि हुदै गइरहेको छ । भारतका विभिन्न स्कुलहरुबाट पनि समुहमा भेडेटार घुम्न आउने गरेका छन् । तिनै पर्यटकलाई लक्षित गरेर आयोजित उत्सव भेडेटारदेखि काम्फेकसम्म रहनेछ ।
बाह्य पर्यटकहरुलाई लक्षित गरेर नै धरानका प्याराग्लाइडिङ व्यावसायीहरुले छुटका साथ बिशेष प्याकेज उपलब्ध गराउन आग्रह गरिएको पनि एशोसिएशनले जनाएको छ । यस्तै, पर्यटकहरुलाई डाँडाबजारस्थित ध्वजे डाँडाबाट सुर्योदय हेर्ने, लाप्चेटारस्थित एसियाकै ठुलो वरको रुख हेर्ने र राजारानीस्थित तालमा बोटिङ पनि गराउने प्योकज पनि तयार गरिएको सचिव जितेन्द्र रुम्दालीले बताए । उनका अनुसार यो प्याकेजको प्रतिव्यक्ति मात्र २ हजार रुपैया पर्छ । यसमा यातायात र खानासमेतको सुविधा हुनेछ । पर्यटकले चाहेमा डाँडाबजारमा होम स्टे पनि राखिनेछ । यो समय ध्वजे डाँडाबाट सुर्य उदाउदै गरेको दृष्य हेर्नलाई उपयुक्त समय पनि हो ।
Comments
Post a Comment