पुलिसलाई फुटबलमा काँस्य(फोटोफिचर)

धरान । सातौं वृहत राष्ट्रिय खेलकुदअन्र्तगत पुरुष फुटबल प्रतियोगितामा नेपाल पुलिस क्लबले काँस्य पदक जितेको छ ।धरान १७ स्थित एन्फा टेक्निकल सेन्टरको मैदानमा बिहिबार मध्यमाञ्चल क्षेत्रलाई ४–३ गोलअन्तरले पराजित गर्दै पुलिसले काँस्य पदक जितेको हो ।
प्रतिस्पर्धात्मक एवं रोमाञ्चक खेलमा पुलिसका तीर्थ राना मगरले दुई गोल गरे भने भोला सिलवालले एक गोल गरेका थिए । एक गोल भने मध्यमाञ्चलका खेलाडीले आत्मघाती गरेका थिए । पहिलो हाफको १३ औं मिनेटमा भेला सिलवालले गोल गर्दै पुलिसलाई अग्रता दिलाए भने २३ औं मिनेटमा रवि पासवानको पासमा तीर्थ राना मगरले गोल गरेका थिए । दोस्रो हाफको १९ औं मिनेटमा तीर्थ रानाले पुलिसको लागि तेस्रो गोल गरे भने इञ्जुरी समयमा मध्यमाञ्चलका कुदलीप कार्कीले आत्मघाती गोल गरेका थिए ।

मध्यमाञ्चलको लागि टंकबहादुर स्याङ्देनले २ र श्याम बाबु क्याप्छाकी मगरले एक गोल गरे । दोस्रो हाफको ५ मिनेटमा टंकबहादुरले पहिलो गोल गरेका थिए । यस्तै, १८ औं मिनेटमा श्याम बाबुले हेडमार्फत दोस्रो गोल गरे भने ३९ औं मिनेटमा टंकबहादुरले तेस्रो गोल गरेका थिए । उक्त खेलको म्यान अफ दि म्याच पुलिसका तीर्थ राना मगर घोषित भए । उनले नगद ५ हजार हात पारे । स्वर्ण पदकको लागि शुक्रबार नेपाल आर्मी र सशस्त्र प्रहरी वलको एपिएफ क्लबबीच फाइनल प्रतिस्पर्धा हुनेछ ।