‘हामी साथी साथी’को रिलिज

धरान । साथी अर्थात मित्रताबारे नेपालमा चर्चित भनाई छ, गाँस छोड्नु, तर साथ कहिल्यै नछोड्नु । यही भनाईलाई चरिचार्थ गर्ने गरी मंगलबार साँझ धरानमा एक साथ गायक सुमन श्रेष्ठ ‘संगम’को हामी साथी साथी..म्युजिक भिडियो रिलिज तथा साथी डिभिडिको विमोचन भएको छ ।
सिद्धि नेवाः परिषदको हलमा आयोजित समारोहका प्रमुख अतिथि नेपाल संगीत तथा नाट्य प्रज्ञा प्रतिष्ठानका सदस्य सचिव एवं वरिष्ठ गायक, संगीतकार गणेश रसिकले मात्र होइन, गायक श्रेष्ठका साथीहरुले एक साथ डिभिडि साथी साथीको सार्वजनिक गरेका थिए भने ‘हामी साथी साथी..’ बोलको गीतको म्युजिक भिडियो पनि रिलिज गरिएको थियो । साथी डिभिडि गायक श्रेष्ठको म्युजिक भिडियोहरुको संग्रह हो । गायक श्रेष्ठ र उनका साथीहरु मिलेर साथी साथी समुह नै बनाएका छन् ।
गायक श्रेष्ठको साथी डिभिडिमा विभिन्न ९ वटा म्युजिक भिडियोहरुको संग्रह रहेको छ । ती मध्ये पनि मंगलबार साँझ हामी साथी साथी..बोलको गीत मात्र धरानमा रिलिज गरिएको हो । उक्त गीतको म्युजिक भिडियोको निर्देशन गायक आफैले गरेका हुन् भने रचना पत्रकार गोपाल दाहाल र संगीत बसन्त सापकोटाको रहेको छ । छाँयाकार ज्ञानेन्द्र शर्मा र सम्पादन टेकेन्द्र साहले गरेको भिडियोमा गायक श्रेष्ठका साथीहरुकै अभिनय रहेको छ ।
साथी साथी समुहमा गायक श्रेष्ठसँगै पत्रकार गोपाल दाहाल, पुष्कर ताम्राकार, जुलन कालिकोटे, मणि भुजेल, रामनारायण साह, लोकबहादुर श्रेष्ठ, राजेश श्रेष्ठ, राजन खनाल, मोहन तिम्सिना, विराज खनाल, शम्भु थापा मगर, लालबहादुर थापा, भुपेन्द्रबहादुर गुरुङ र साजन राई छन्् । उनीहरु विभिन्न पेशा, व्यावसायमा आवद्ध छन् । कार्यक्रमका प्रमुख अतिथि एवं वरिष्ठ गायक, संगीतकार रसिकले मित्रता जति वलियो हुन्छ, त्यति नै कमजोर पनि हुने भएकोले त्यसलाई जोगाई राख्नु ठुलो चुनौती हुने धारणा राखे । नेपाली सांगीतिक क्षेत्रमा स्वर सम्राट नारायण गोपालको गोपाल योञ्जन, दिव्य खालिङ जस्ता गायक तथा संगीतकारहरुसँगको प्रगाढ मित्रता नराम्रो गरी टुटेको उदाहरण प्रस्तुत गर्दै उनले भने–‘तर तपाईहरुको मित्रता नटुटोस्, अझ वलियो होस । साथी साथी गीत र भिडियोले मित्रताको राम्रो सन्देश दिएको छ ।’

भाषाविद् प्रा.डा.टंक न्यौपानेले कला, साहित्य, गीत संगीत र सँस्कृतिको लागि धरान उर्बर भुमि भएको भन्दै साथी टिमको प्रसंसा गरेका थिए । प्राज्ञ राम धामीले गीतको रचना, गायकी, संगीतसँगै म्युजिक भिडियो पनि राम्रो बनेको प्रतिक्रिया दिएका थिए । गीतका रचनाकार एवं पत्रकार गोपाल दाहालले म्युजिक भिडियो रिलिजसँगै विगत २ बर्षदेखिको साथीहरुको सपना पुरा भएको बताए ।
कार्यक्रममा गरिदेऊ काम नेताहरु..गीतको भिडियो पनि प्रर्दशन गरिएको थियो भने गायक श्रेष्ठले आमाले भन्छिन् बुहारी ले..र प्रितिको फुलै फुल्यो..गीत पनि गाएका थिए । साथै, हाम्रो डान्स सेन्टरका कलाकारहरुले नृत्य प्रस्तुत गरेका थिए ।