रजत जयन्ती अवसरमा लिम्बू अन्र्तराष्ट्रिय सम्मेलन हुने

धरान ।  लिम्बू जातिको साझा संस्था किरात याक्थुङ चुम्लुङले रजत जयन्तीको सन्दर्भ पारेर धरानमा तीन दिने प्रथम लिम्बू अन्र्तराष्ट्रिय सम्मेलन आयोजना गर्ने भएको छ ।
    चुम्लुङको रजत जयन्ती मुल समारोह समितिले सोमबार धरानमा पत्रकार सम्मेलन गर्दै लिम्बूहरुको पहिचान र प्रतिष्ठाको लागि अन्र्तराष्ट्रिय सम्मेलन नारा दिएर यही बैशाख ११, १२ र १३ गते आयोजना गर्ने तयारी भइरहेको जानकारी दिएको छ । लिम्बूहरुको पहिचान र उत्थानको लागि सामुहिक प्रयास र अभ्यासको शुरुवात गर्ने उद्देश्यले अन्र्तराष्ट्रिय सम्मेलन आयोजना गर्न लागेको चुम्लुङले जनाएको छ । धरान १० स्थित सैनिक भवनमा हुने सम्मेलनमा देश र विदेशबाट गरि कम्तीमा २ सय ८० जना विभिन्न बिषयका लिम्बू विज्ञ, बिशेषज्ञहरुको सहभागीता रहने महासचिव लीला सिङ्गक लिम्बूले बताइन् ।
    उनका अनुसार तीन दिने सम्मेलनमा नेपालको सन्दर्भमा लिम्बुहरुको पहिचान र प्रतिष्ठा,लिम्बु परम्परा र संस्कारहरु, लिम्बु सास्कृतिक पहिचानजन्य विशेषताहरु, याक्थुङ मुन्धुम दर्शन, लिम्बु भाषा र साहित्य, लिम्बुहरुको अन्तराष्ट्रिय सम्बन्ध बिस्तार संयन्त्र, इतिहासलगायत विविध बिषयका लिम्बू विज्ञहरुद्धारा अनुसन्धानात्मक कार्यपत्र प्रस्तुत हुनेछ र त्यसमा व्यापक बहस गरिनेछ । अन्तिम दिन सम्मेलनमा विभिन्न मुलुकबाट सहभागी भएकाहरुबीच अनुभव आदानप्रदान गरिनेछ र सम्बन्ध विस्तार गर्नको लागि एउटा संयन्त्र पनि तयार गर्ने महासचिव लिम्बूले बताइन् । ‘विश्वभरि छरिएका लिम्बूहरुबीच भाषा, सँस्कारमा समय र परिस्थितिअनुसार फरकपन भएपनि त्यसबीचमा रहेर साझापन खोज्ने र सम्बन्ध अझ दरिलो बनाउने उद्देश्य हो । विश्वभरका लिम्बूहरुबीच स्रोत, ज्ञान आदानप्रदान गर्ने आधार पनि बन्नेछ’–उनले भनिन्–‘यसको लागि अनुभव आदनप्रदानका साथै विज्ञहरुबीच संयन्त्र पनि तयार गछौं ।’
    पहिलो सम्मेलनमा लिम्बू जातिसँग जोडिएका सबै बिषयमा बहस गरेर आगामी सम्मेलनलाई भने कुनै एउटा बिषयमा केन्द्रीत गरेर आयोजना गर्ने चुम्लुङको भनाई छ । सम्मेलनलाई बौद्धिक विमर्शमा नै केन्द्रीत गराइनेछ । ‘देश विदेशबाट आउनुहुने विज्ञहरुबाट १५, १५ वटा कार्यपत्र प्रस्तुत हुनेछन्’–महासचिव लिम्बूले भनिन् । सम्मेलनमा प्रस्तुत गरिएका कार्यपत्रलाई बहस, छलफल पछि परिमार्जन गर्दै पुस्तककोरुपमा प्रकाशित गरिने पनि उनले खुलाइन् । सम्मेलनमा भारत, बेलायत, हङकङ, कारिया, जापान, कतार, इजराइललगायत मुलुकबाट ८० जना लिम्बू विज्ञहरु सहभागी हुनेछन् ।
सम्मेलनले लिम्बुहरुलाई अन्र्तराष्ट्रिय स्तरमा संस्थागत र संगठित हुन वातावरण सृजना हुने अपेक्षा राखिएको केन्द्रीय अध्यक्ष उत्तमसिंह थाम्देनले बताए । उनका अनुसार लिम्बु, लिम्बुवान र पहिचान सम्बन्धि विश्वव्यापी रुपमा सामुहिक दृष्टिकोण निर्माण गर्न सहयोग पुग्नेछ भने लिम्बु सम्बन्धी विभिन्न विषयहरुमा भएका फरक बुझाईहरु बीच पनि समझदारी निर्माण हुनेछ । साथै, अन्र्तराष्ट्रिय लिम्बु संस्थागत संयन्त्रको पूर्वाधार तयार हुने उनले बताए । सम्मेलनको उद्घाटन संविधासनसभा अध्यक्ष सुवास नेम्बाङले उद्घाटन गर्नेछन् । सम्मेलनलाई सफल बनाउन चुम्लुङ सुनसरीकी अध्यक्ष संगीता सुब्बाको संयोजकत्वमा मुल व्यवस्थापन समिति गठन गरिएको छ भने कार्यपत्रहरु व्यवस्थित गर्न डा.चैतन्य सुब्बाको संयोजकत्वमा ८ सदस्यीय समिति गठन गरिएको चुम्लुङले जानकारी दिएको छ ।