बीपी प्रतिष्ठान खुलाउन सर्वपक्षीय वार्ता समिति गठन

धरान । कर्मचारी आन्दोलनले ठप्प बनेको बीपी कोइराला स्वास्थ्य विज्ञान प्रतिष्ठान खुलाउन धरानका राजनीतिक दल एवं नागरिक समाजको पहलमा एउटा सर्वपक्षीय वार्ता समिति गठन भएको छ । प्रतिष्ठानमा आइतबार भएको सर्वपक्षीय भेलाले दुवै पक्षसँग वार्ता गरेर समस्या समाधान गर्न एक समिति गठन गरेको हो ।
सुनसरी उद्योग वाणिज्य संघका अध्यक्ष सरोज श्रेष्ठ संयोजक रहेको समितिमा नागरिक समाजका तर्फबाट सहसंयोजक तिलक राई, पूर्व मेयर मनोजकुमार मेन्याङ्बो, कुमारबहादुर कार्की, पत्रकारकोतर्फबाट किसोरकुमार कार्की, समाजसेवी सरला कायस्थ र सबै राजनीतिक दल सदस्यका रुपमा छन् । समितिले आन्दोलनरत कर्मचारीको दुवै समुह नेतृत्वसँग वार्ता गर्ने र सहज निकास खोज्ने जनाएको छ । प्रतिष्ठान व्यवस्थापनले वार्ताको पहल गरेपनि कर्मचारीहरुले आन्दोलन स्थगित नगरेपछि राजनीतिक दल र नागरिक समाजले गम्भीर चासो दिएको हो ।
कर्मचारी कल्याण समाजले ओपिडी, ल्याब, एक्सरे सेवासँगै विद्यार्थीहरुको पठनपाठन पनि ठप्प बनेपछि आन्दोलनको स्वरुप परिवर्तन गर्न समाजलाई दबाब बढिरहेको छ । प्रतिष्ठानको ३६ औं सिनेट बैठकले तलब बृद्धिबारे उच्चस्तरीय तलबमान आयोग गठन गरेपछि आन्दोलनरत कर्मचारीहरुले असोज १ गतेदेखि पदाधिकारीको कार्यकक्षमा तालाबन्दी गर्नुका साथै आकस्मिक र अन्तरंग सेवाबाहेक सबै ठप्प बनाएका छन् । ‘उपचार नपाएर विरामीहरु मर्कामा परिरहेका छन्, यसतर्फ ध्यान दिदै आयोगको रिपोर्ट नआएसम्म आन्दोलन स्थगित गर्न वार्ताको पहल गछौं’–समितिका संयोजक श्रेष्ठले भने–‘आन्दोलनकारी एउटा पक्ष हाम्रो आग्रहमा सकरात्मक छ, अर्को पक्षसँग पनि वार्ताको समय मिलाउदैछौं ।’

सर्वदलीय बैठकमा प्रतिष्ठानका शिक्षाध्यक्ष डा.बिक्रम श्रेष्ठ, रजिष्ट्रार तुलबहादुर श्रेष्ठ, सिनेट सदस्य डा.निलम्बर झा, अस्पताल सहायक निर्देशक एवं प्रवक्ता डा.पशुपति चौधरी पनि सहभागी थिए । सो वैठकमा दुई समुहमा विभाजित भएर आन्दोलनतर कर्मचारी कल्याण समाज र कर्मचारी कल्याण समाज तदर्थ समितिलाई पनि बोलाइएको थियो । तर, तदर्थ समितिको टोली मात्रै वार्तामा सहभागी भयो । शिक्षाध्यक्ष श्रेष्ठले प्रतिष्ठानको समस्याप्रति चिन्तित हुदै नागरिक र राजनीतिक दलले गरेको पहलबाट समाधान निस्कनेमा आशा व्यक्त गरे । ‘हामीले पनि आफ्नो तर्फबाट पहल गरिनै रहेका छौं, बीपी प्रतिष्ठान धरानकै गहना हो, यसलाई जोगाउने जिम्मा पनि धरानबासीकै हो’–उनले भने ।

तदर्थ समितिका संयोजक राजन कोइरालाले सेवा बन्द नगरि शान्तिपुर्ण धर्नामा मात्रै बसेकोले वार्ता समितिले सेवा सुचारु गर्न आफुहरुसँग वार्ता गर्नै नपर्ने बताए । आयोगको प्रतिवेदन नआएसम्म धर्ना भने जारी रहने उनले बताए । पदाधिकारी कार्यकक्षमा तालाबन्दी र सेवा ठप्प बनाएको कर्मचारी कल्याण समाजका अध्यक्ष सुजेन्द्र गोले तामाङले आयोगको रिपोर्ट आउने टुंगो नभएकोले आन्दोलन जारी नै रहने बताए । ‘आज पनि व्यवस्थापनसँग एक चरण वार्ता भयो, उहाँहरुले रिपोर्ट नआउदासम्म पर्खनुस् भन्नुभयो, तर हामी आन्दोलन स्थगित गर्ने पक्षमा छैनौं’–उनले भने ।