लाखे नाच प्रतियोगितामा इन्द्रपुर प्रथम

धरान । ढोल, झ्याम्टाको तालमा रौद्ररुपमा नाच्दै हिड्ने नेवारी सँस्कृति लाखे नाच कृष्ण जन्मअष्टमीपछि रोकिएको थियो । अब अर्को बर्षमा मात्रै लाखे नाच देख्न पाइने अनुमान विपरीत शनिबार धरान फेरि लाखे नाचले तातियो ।
नेवा देय् दबु नगर समितिले भानुचौकमा आयोजित नेवा साँस्कृतिक प्रर्दशन तथा पूर्वाञ्चलव्यापी लाखे प्रतियोगितामा धरानबाट मात्रै होइन, पूर्वका विभिन्न १३ जिल्लाबाट नेवार समुदायले लाखे नाच प्रर्दशन गरेका थिए । ती जिल्लाबाट २४ वटा समुहले विभिन्न भाव एवं शैलीमा लाखे नाच प्रस्तुत गर्यो । औपचारिक नाच शुरु हुनुअघि धरानमा वृहत र्याली निकालिएको थियो ।

प्रतियोगितात्मक लाखे नाच प्रर्दशनमा मोरङ विराटचोकको इन्द्रपुर नेवा पुच प्रथम भयो भने भोजपुर टक्सारको तीनधारा लाखे समाज दोस्रो र संखुवासभा जिल्लाको चैतपुर समाज सेवा युवा क्लब तेस्रो भयो । प्रथम, दोस्रो र तेस्रो हुने टिमले क्रमशः नगद २५ हजार, १५ हजार र १० हजार र प्रमाणपत्र हात पार्यो । प्रतियोगितामा सँस्कृतिविद् गणेराम लाक्षी, दबुका केन्द्रीय सदस्य जितेन्द्र विलास बज्रचार्य र नेवार ल्याम दबुका केन्द्रीय अध्यक्ष सत्यनारायण डंगोल निर्णायक थिए ।
नेवा सँस्कृतिमा लाखे नाच लोकप्रिय मानिन्छ । नयाँ पुस्तालाई सँस्कृतिप्रति आकर्षित गर्न तथा धरानलाई साँस्कृतिक शहरकोरुपमा पहिचान दिलाउन कार्यक्रम आयोजना गरिएको आयोजक समितिका अध्यक्ष अनिल मास्केले बताए । ‘यही कार्यक्रमको अवसरमा पूर्वमा नेवार सँस्कृतिमा के कस्तो विविधता छ भन्ने पनि थाह भयो, सँस्कृति संरक्षणमा युवा पिढीलाई आर्कषित गर्न पनि यो कार्यक्रमले टेवा पुर्याउछ’–अध्यक्ष मास्केले भने ।
अध्यक्ष मास्केका अनुसार सामान्यतय नेवार सँस्कृतिमा क्वाटे पुर्णिमादेखि ८ दिनसम्म लाखे नाच प्रर्दशन गर्ने परापम्परागत प्रचलन छ । तर, पछि कृष्णजन्माष्टमीमा लाखे नाचलाई टुंग्याउने चलन भएको उनले बताए । नेवारी सँस्कृतिमा महत्वपुर्ण रहेको लाखे नाच समय र ठाउँ अनुसार लाखेलाई फरक फरक शैलीमा मान्ने र नाच्ने गरिन्छ । शनिबार प्रतियोगितामा सहभागी एउटै जिल्लाको लाखे नाच पनि समान नभएको अध्यक्ष मास्केले बताए । ‘कसैले धिमे बाजासँग, कसैले पञ्चे बाजा, कसैले खि बाजा र कसैले दुःख सुखको गीतको तालमा नाचे’–उनले भने ।