फेशन शोसँगै गीत र डान्स पार्टी(फोटोफिचर)
धरान । फेशन र गीतसंगीतमा रुचि राख्नेहरुको शहर हो धरान । यहाँका टिनएजर र युवा पुस्ता फेशन, गीतसंगीतमा भनेपनि हुरुक्कै हुन्छन् । त्यसैले, फेशन डिजाइनर आफ्नो नयाँ डिजाइनका पहिरनलाई यहाँका पुस्तामाझ पुर्याउन र कलाकारहरु कन्सर्ट,सांगीतिक कार्यक्रममा आउन सधै लालयित हुन्छन् ।
शुक्रबार साँझ धरानेहरु फेशन र गीत,संगीतको अनुपम फ्युजममा रमाए । सैनिक भवनको प्राङ्गणमा आयोजित द लेटेस्ट ड्रेन्ड २०१४ फेशन शोमा मोडलहरु र्याम्पमा मात्रै उत्रिएनन्, चर्चित कलाकारहरुले बेजोड प्रस्तुती पनि दिए । युवा र युवती मोडलहरु नयाँ नयाँ डिजाइनको पहिरनमा र्याम्पमा उत्रिदा थप हौसिएका फेशनका पारखीहरु सांगीतिक प्रस्तुतीबाट भरपुर मनोरञ्जन लिए । एल्लुर इन्टरनेनमेन्ट प्रालिद्धारा आयोजित फेशन शोमा काठमाण्डौंका ८ युवती र ६ युवा मोडलहरु र्याम्पमा उत्रिएका थिए ।
मोडलहरुले सारी, टि सर्ट एण्ड मिनिस्कर्ट, वान पिस, क्याजुअल लगायत युवा पुस्ताको रुचिअनुसारका ६ सिक्वेन्समा र्याम्पमा उत्रिएका थिए । ती पहिरनहरुको डिजाइन फेशन डिजाइनर शोभा महर्जनले गरेकी थिइन् भने कोरियोग्राफी निरुमेष रुपाखेती र सनिस शाक्यले गरेका थिए । धरानकै निसुङ्मा ब्युटि सोलुसन प्रालिले मोडलहरुलाई हेयर एण्ड मेकअप गरेको थियो । यसअघि राजधानीस्थित होटल र्याडिसनमा असहाय बालबालिकाहरुको सहयोगार्थ यो फेशन शो भइसकेको छ भने धरानपछि चरिकोटमा आयोजना हुने स्थानीय संयोजक तथा गायक ए.पि.शेर्पाले जानकारी दिए । ‘नयाँ मोडलहरुलाई प्लेटफर्म दिन र फेशनको ट्रेन्डबारे जानकारी दिन आयोजना गरेका हौं’–उनले भने ।
............
गीत र डान्स पार्टी
शुक्रबार आयोजित फेशन शोमा धरानेहरुले गीत,संगीतको पनि स्वाद चाख्न पाए । फेशन शो चलिरहदा चर्चित गायक, गायिकाको प्रस्तुतीमा मनोरञ्जन लिएका धरानेहरु फेशन शो पछि भने चर्चित डिजे तेञ्जिङको डिजेइङमा रमाए ।चर्चित गायक मिङ्मा शेर्पाले आफ्नो चर्चित गीत छम छम तिम्रो..बोलको गीतसँगै तिम्रो त्यो हँसिलो मुहारको..र लालुपाते फुल्यो वनैमा..बोलको गीत गाएर धरानेहरुलाई नचाए । यस्तै, गायिका श्रेया सोताङले पनि सुस्तरी.., यो छोरीको रुपै राम्रो..र ए माया..बोलको गीत गाएर धरानेहरुको संगीतिक तिर्खा मेट्ने प्रयास गरिन् । दुवै कलाकारहरुले गीत गाइरहदा मोडलहरु स्टेजमा आएर नाचेपछि माहौल झनै तात्तिएको थियो ।
यसैगरि, अर्का गायक ए.पि.शेर्पाले गरौं संकल्प...बोलको राष्ट्रिय गीतसँगै सम्झनामा आजभोली..पनि गाए भने नवोदित गायिका प्रकृत्ति थलङले पनि दुई वटा गीत गाएकी थिइन् ।
Comments
Post a Comment