बीपी प्रतिष्ठानका पदाधिकारीको कार्यकक्षमा तालाबन्दी

धरान । अख्तियार दुरुपयोग अनुसन्धान आयोगको क्षेत्रीय कार्यालयले आर्थिक अनियमितताको आशंकामा कागजपत्र नियन्त्रणमा लिएको दुई दिनपछि धरानस्थित बीपी कोइराला स्वास्थय विज्ञान प्रतिष्ठानको चारै पदाधिकारीको कार्यकक्षमा अनिश्चितकालीन तालाबन्दी भएको छ ।
प्रतिष्ठानका उपकुलपति डाक्टर बीपी दासले स्थानीय एक पत्रिकामा कर्मचारीलाई फटाहा भन्दै अभिव्यक्ति दिएपछि राजन कोइराला नेतृत्वको कर्मचारी कल्याण तदर्थ समितिले आइतबार पदाधिकारीको कार्यकक्षमा तालाबन्दी गरेको हो । समितिले कर्मचारीलाई वदनाम गराउने गरी उपकुलपति दासले तल्लोस्तरको अभिव्यक्ति दिएको भन्दै आन्दोलित बनेको छ ।

आक्रोशित कर्मचारीहरु नाराबाजी गर्दै प्रतिष्ठानका उपकुलपति दास, शिक्षाध्यक्ष डा.बिक्रम श्रेष्ठ, रजिष्ट्रार तुलबहादुर श्रेष्ठ र अस्पताल निर्देशक डा.अरविन्द सिन्हाको कार्यकक्षमा तालाबन्दी गर्न पुगेका थिए । ताला लगाउने क्रममा कर्मचारीहरुले उपकुलपति मुर्दावाद भन्दै चर्को नारा पनि लगाए । तदर्थ समितिले प्रतिष्ठानको वदनाम गराउने गरि अभिव्यक्ति दिने उपकुलपतिसहित चारै जना पदाधिकारीको राजिनामाको माग गरेको छ ।
अख्तियार दुरुपयोग अनुसन्धान आयोगको क्षेत्रीय कार्यालयले आर्थिक अनियमितताको आशंकामा शुक्रबार प्रतिष्ठानको विभिन्न शाखाबाट कागजपत्र नियन्त्रणमा लिएको थियो । त्यही घटनासम्बन्धमा स्थानीय एक पत्रिकामा उपकुलपति दासले तदर्थ समिति अवैधानिक भएको दाबी गर्दै प्रतिष्ठानको वदनामी गराउने र अख्तियारमा उजुरी गर्ने यिनै फटाहा हुनसक्छ भन्ने अभिव्यक्ति दिएका थिए । ‘प्रतिष्ठानको वदनामी गराउने र अख्तियारमा उजुरी गर्ने यिनै फटाहाहरु ह्ुनसक्छन्, छानबिन गरेर कुनैपनि हालतमा कारबाही गर्छु, यो कुरा पनि लेखिदिनुस्’–पत्रिकाले दासको प्रतिक्रिया लेखेको छ ।
उपकुलपतिको उक्त अभिव्यक्ति शनिबार प्रकाशित भएपछि तदर्थ समितिको आपतकालीन बैठक बसेर चारै जना पदाधिकारीको राजिनामा माग गर्दै कार्यकक्षमा तालाबन्दी गर्ने निर्णय गरिएको समितिका अध्यक्ष राजनप्रसाद कोइरालाले जानकारी दिए । उनका अनुसार बिहान ९ बजे तालाबन्दी गरिएको थियो भने १० बजेसम्म जिओपिडी भवन अघि कर्मचारीहरुले धर्ना पनि दिएका थिए । प्रतिष्ठानले वार्तामा बोलाइरहे पनि तदर्थ समितिले राजिनामा माग गरिएका पदाधिकारीसँग वार्ता नगर्ने अडान लिएको छ । ‘कर्मचारीलाई फटाहा देख्ने पदाधिकारीसँग कुनै पनि हालतमा वार्ता गर्दैनौं, स्वास्थ्य मन्त्रालयसँग मात्रै वार्ता हुन्छ’–अध्यक्ष कोइरालाले भने ।

तदर्थ समितिले पदाधिकारीको राजिनामा मागसँगै २५ प्रतिशत प्रोत्साहन भत्ता, नेपाल सरकारद्धारा वृद्धि गरिएको अघिल्लो दुई आर्थिक बर्षको तलब पाउनुपर्ने र उच्चस्तरीय तलबमान आयोगको प्रतिवेदन सार्वजनिक गरिनुपर्ने माग पनि अघि सारेको छ । प्रतिष्ठानका उपकुलपति दासले भने आफुले कुनै पनि संगठनलाई तोकेर फटाहा नभनेको दाबी गर्दै संस्थाको आन्तरिक कुरा बाहिर लैजाने जो कोही फटाहा हुन् भनेको जिकिर गरे । ‘मैले राजन कोइराला समुहलाई फटाहा भनेको होइन, कुनै संगठनलाई तोकेर फटाहा भनेकै छैन’–उपकुलपति दासले भने–‘प्रतिष्ठानको आन्तरिक कुरा बाहिर लैजाने जो कोही फटाहा नै हो, त्यही भनेको हुँ । बुझाईमा फरक परेको हो ।’ तालाबन्दी खुलाउन तदर्थ समितिसँग छलफलको प्रयास भइरहेको पनि उनले बताए । प्रतिष्ठानमा सुजेन्द्र गोले तामाङको अध्यक्षतामा निर्वाचित वैधानिक कर्मचारी कल्याण समाज छ । समाजको नेतृत्वले कर्मचारीको मागबारे वेवास्ता गर्दै प्रतिष्ठान व्यवस्थापनको पछि लागेको भन्दै केही महिनाअघि असन्तुष्ट कर्मचारीहरुले छुट्टै आन्दोलन चर्काउदै तदर्थ समिति गठन गरेको थियो ।