एयरपोर्टबारे सार्वजनिक सुनुवाइ, सट्टाभर्ना र उचित क्षतिपुर्तिको माग
धरान । एक दशकदेखि थाती रहेको धरान १७ डाँडाघोपास्थित प्रस्तावित धरान एयरपोर्ट क्षेत्रभित्रका प्रभावित जग्गाधनी एवं सुकुम्बासीहरुले सट्टाभर्ना र उचित क्षतिपुर्तिको माग गरेका छन् । धरान उपमहानगरपालिकाले मंगलबार प्रस्तावित धरान एयरपोर्ट क्षेत्रका प्रभावित जग्गाधनी एवं सरोकारवालाहरुबीच सप्तरंगी पार्कमा आयोजना गरेको सार्वजनिक सुनुवाईमा यस्तो धारणा आएको हो ।एयरपोर्ट क्षेत्रका अधिकांश जग्गाधनी एवं प्रभावित सुकुम्बासीहरुले आफुहरु विकास विरोधी नभएको धारणा राख्दै उचित क्षतिपुर्तिसहित जग्गा सट्टाभर्ना दिनुपर्ने माग राखे । कतिपय जग्गाधनीले भने एयरपोर्ट बनाउन भन्दै नगरपालिकाले सस्तोमा आफुहरुको जग्गा बिक्री गराएको तर बाह्र बर्ष वित्दा पनि निर्माण नगरेको भन्दै आक्रोशसमेत प्रकट गरे । कतिपयले डाँडाघोपाको विकल्पमा बीपी प्रतिष्ठान दक्षिणको जंगल क्षेत्रमा बनाउनुपर्ने नयाँ प्रस्तावसमेत गरे ।
सार्वजनिक निजी साझेदारी अवधारणाअन्र्तगत धरानमा एयरपोर्ट बनाउन २०६० सालताका तत्कालीन नगरपालिकाकाको रोहबरमा यतिले ७ बिघा साढे ३ कट्टा ५ धुर जमिन सस्तो मुल्यमा खरीद गरेका थिए । त्यसबेला ६ महिनाभित्र एयरपोर्ट निर्माण कार्य शुरु नभए खरीद गरेकै भाउमा जग्गा फिर्ता गर्ने लिखित सहमति थियो । केही जग्गाधनीहरुले सोही सम्झौतावमोजिम यतिले आफुहरुलाई जग्गा फिर्ता गर्नुपर्ने र प्राधिकरणले पुनः जग्गाधनीहरुसँग नयाँ सहमति गर्नुपर्ने माग पनि राखे । ‘धरानमा एयरपोर्ट बन्छ र विकास हुन्छ भनेर एकै वचनमा सस्तो जग्गा दिएका हौं, तर बाह्र बर्ष वित्यो एयरपोर्ट बनेन । त्यतिबेला सम्झौता हुँदा यतिले बनाएन भने जग्गा फिर्ता गर्ने भन्ने छ’–युवराज राईले भने–‘अब हाम्रो जग्गा फिर्ता हुनुप¥यो र प्राधिकरणले बनाउने हो भने यतिसँग होइन, जग्गाधनीहरुसँग सहमति गर्नुपर्छ ।’
जग्गाधनी गंगा श्रेष्ठले एयरपोर्ट क्षेत्रमा आफ्नो एक कट्टा जमिन रहेको खुलाउदै सट्टाभर्ना दिए छोडिदिने बताइन् । सुकुम्बासीहरुकोतर्फबाट बोल्दै जीतराज राईले प्रभावित क्षेत्रका सुकुम्बासीसहित सबैलाई उचित क्षतिपुर्ति दिनुपर्ने, एयरपोर्ट निर्माण व्यवस्थापनमा सदस्य बनाउनुपर्ने, सर्वे हुदा सुकुम्बासीका प्रतिनिधिलाई पनि सामेल गराउनुपर्ने र ऐलनीमा बस्नेलाई रोजगारीको ग्यारेष्टी हुनुपर्ने माग राखे । नेपाल बसोबास वस्ती संरक्षण समाज धरानका सचिव सुवास राईले पनि विकासको लागि सुकुम्बासीहरु व्यावस्थापनमा जान तयार रहेपनि उठिबास गराउन नहुने बताए । ‘विकासमा सुकुम्बासीहरु सधै सहयोग गर्न तयार छौं, एयरपोर्टलाई पनि हामी स्वागत गछौं तर विकासको नाममा विना विकल्प उठिबास गरियो भने एयरपोर्टमा धर्ना बस्नुपर्ने अवस्था नआओस्’–उनले भने । सोलिङकी सम्झना विकले उपमहानगरपालिकाले सट्टाभर्ना दिन्छु मात्र भनेर नपुग्ने भन्दै आफुहरुलाई जहाँ लगेर राख्ने हो, त्यस ठाउँको लालपुर्जा पनि दिनुपर्ने र घर सर्दा लाग्ने खर्च पनि उपलब्ध गराउनुपर्ने माग राखिन् ।
कार्यकारी अधिकृत विष्णुप्रसाद कोइरालाले एयरपोर्ट निर्माणको काम जर्बजस्ती नभई सरोकारवाला जग्गाधनीहरुसँग समन्वय र सहमति लिएर मात्र अघि बढ्ने प्रष्ट्याए । एयरपोर्ट प्राधिकरणले निर्माण गर्ने र त्यसको लागि यतिको स्वामित्वमा भएको जग्गा, एयरपोर्टको ललागि आवश्यक पर्ने नम्बरी जग्गा र सुकुम्बासी बसोबास भएको जग्गा व्यवस्थापन आवश्यक भएकोले उपमहानगरपालिकाले सहजीकरणको प्रयास गरिरहेको उनको भनाई थियो । ‘हामीले जर्बजस्ती एयरपोर्ट बनाउने होइन, सम्झौता वमोजिम यतिको जग्गा आउनुपर्छ र योजनाभित्र परेका जग्गालाई उचित मुआब्जा दिन्छौं । तर, तपाईहरु विकासको लागि तयार रहनुपर्छ’–कार्यकारी अधिकृत कोइरालाले भने–‘अब प्राधिकरण पनि औपचारिकरुपमा जग्गाधनीहरुसँग छलफल गर्न आउछ, त्यतिबेला जनताले एयरपोर्ट चाहिदैन भन्यो भने यहाँ बन्दैन ।’
Comments
Post a Comment