१७ औं गोधुली कप शुरु, टाइब्रेकरमा वडा १५ विजयी(फोटोफिचर)
वडा नम्बर १९ गोधुली कपको सर्वाधिक उपाधि विजेता टिम पनि हो । वडा १९ ले पाँचौं, सातौं, आठौं, एघारौं, बाह्रौं र सोह्रौं सँस्करण जितेको थियो । वडा १५ ले भने चौधौं सँस्करण मात्र जितेको छ । निर्धारित समयको खेल गोलरहित बराबरीमा टुंगिएपछि खेलको निर्णय टाइब्रेकरबाट लिइएको थियो । वडा १५ का कप्तान सुवर्ण सामेखामको पहिलो प्रहार नै आकासिएको थियो भने आसुतोष राईको प्रहार पोलमा ठोक्किएको थियो । तर, रोमन लिम्बु, शुभम कार्की र वसन्त बाँनियाको प्रहार गोलमा परिणत भएपछि वडा १५ ले उपाधि दौडमा आफुलाई कायम राख्यो ।
साविक विजेता वडा १९ बाट योगश राई र शेखर लिम्बुले मात्र टाइब्रेकरममा गोल गरे । योगेशको पहिलो प्रहार गोलमा परिणत भएपनि क्रमश ः प्रमोद राई, सबु राई र विनय राई गोल गर्न चुकेका थिए । प्रमोदको प्रहार पोलमा ठोक्कियो भने सुबको प्रहार वडा १५ का गोलकिपर प्रविन लिम्बुले रोके । यस्तै, विनयको प्रहार पनि बाहिरिएको थियो । खेलको म्यान अफ दि म्याच वडा नम्बर १५ का रोमन लिम्बु घोषित भए । उनलाई पुर्वाञ्चल क्षेत्रीय फुटबल संघका सदस्य दिपक राईले ट्रफी प्रदान गरे ।
गोधुली क्लबद्धारा आयोजित प्रतियोगिता माघ ८ गतेसम्म सञ्चालन हुनेछ । प्रतियोगिताको उद्घाटन सुनसरी क्षेत्र नम्बर १ का सांसद कृष्णकुमार राईले गरेका थिए । प्रतियोगितामा धरानका २७ वटा वडाहरुमध्ये २० वटाले भाग लिएको अध्यक्ष देशकुमार राईले जानकारी दिए । प्रतियोगितामा धरानका सम्बन्धित वडा समितिले टिम तयार गरेर भाग लिने गर्छ भने खेलाडी सोही वडाको वासिन्दा हुनुपर्ने नियम छ ।
Comments
Post a Comment