प्रथम गोठबहादुर स्मृति भेट्रान फुटबल शुरु, धनकुटाको टिम विजयी(फोटोफिचर)

धरान । पुर्व खेलाडीहरुको संगठन धरान भेट्रान फुटबल क्लबको आयोजनामा पुर्वाञ्चलको ठुलो पुरस्कार राशी भएको क्षेत्रीयस्तरको भेट्रान फुटबल प्रतियोगिता बुधबारदेखि धरानमा शुरु भएको छ ।
धरान १७ स्थित एन्फा टेक्निकल सेन्टरको मैदानमा शुरु भएको प्रथम पुर्वाञ्चल गोठबहादुर स्मृति भेट्रान फुटबल प्रतियोगिताको उद्घाटन खेलमा धनकुटाको पुर्वाञ्चल भेट्रान ब्रदर्श विजयी भएको छ । धनकुटाको टिमले धरानको पुर्वाञ्चल यातायात भेट्रानलाई २–१ गोलअन्तरले हरायो । धनकुटाको लागि पहिलो हाफमा पेनाल्टीमार्फत विमल गुरुङले पहिलो गोल गरेका थिए भने पहिलो हाफमा नै धरानका खेलाडीले आत्मघाती गोल गरेर धनकुटालाई २–० गोलअन्तरले अग्रता दिलाएको थिए ।

दोस्रो हाफमा धरानका सरन लिम्बुले सान्त्वना एक गोल फर्काए । खेलको म्यान अफ दि म्याच घोषित हुदै धनकुटाका विमल गुरुङले मेहर्स कलेक्सनको तर्फबाट जर्सी पाए । प्रतियोगितामा शुक्रबार विराटनगरको सिएमजि भेट्रान क्लब र विराट भेट्रान क्लब कोशी हरैचाबीच स्पर्धा हुनेछ । प्रतियोगितामा झापा, मोरङ, सुनसरी र धनकुटा जिल्लाका विभिन्न ११ वटा भेट्रान क्लबहरुले भाग लिएको छ । असोज २३ गते फाइनल हुने प्रतियोगिताको विजेताले नगद ७५ हजार र उपविजेताले ४० हजार रुपैया पाउनेछ । प्रतियोगिताको सर्वोत्कृष्ठ खेलाडी र हाई स्कोररले जनही नगद ५ हजार पाउनेछ ।