क्षेत्रीयस्तरको गोठबहादुर स्मृति भेट्रान प्रतियोगिता हुने

धरान । यही असोज १३(बुधबार)देखि धरानमा क्षेत्रीयस्तरको प्रथम पुर्वाञ्चल गोठबहादुर स्मृति भेट्रान फुटबल प्रतियोगिता आयोजना हुने भएको छ । पुर्व खेलाडीहरु मिलेर गठन गरेको धरान भेट्रान फुटबल क्लबको आयोजनामा धरान १७ स्थित एन्फा टेक्निकल सेन्टरको मैदानमा प्रतियोगिता सञ्चालन हुनेछ ।
असोज २३ गतेसम्म हुने प्रतियोगितामा पुर्वको झापा, मोरङ, सुनसरी र धनकुटा जिल्लाका विभिन्न ११ वटा भेट्रान क्लबहरुले सहभागीता लिने आयोजकले जानकारी दिएको छ । ‘यो प्रतियोगिताले युवा खेलाडीहरुलाई फुटबल खेलमा समर्पित भएर खेलिरहन उर्जा प्रदान गर्नेछ भन्ने आशा लिएका छौं । साथै, हाल विभिन्न पेशामा रहेर फुटबलबाट टाढिएका पुर्व खेलाडीहरुलाई पनि संगठित गर्ने, स्वस्थ्य जीवन र सेभ फुटबलको नारामा गोलबद्ध गर्ने उद्देश्य लिएका छौ’–प्रतियोगिताको उद्देश्यबारे आयोजक क्लबका अध्यक्ष रोमी मोक्तानले भने ।
स्थानीयस्तरमा भेट्रानहरुको खेल एवं प्रतियोगिता आयोजना हुदै आएपनि पुरस्कार राशी र सहभागीताको दृष्टिकोणले पुर्वमा क्षेत्रीयस्तरको यो नै पहिलो र ठुलो प्रतियोगिता हो । प्रतियोगिताको विजेताले नगद ७५ हजार र उपविजेताले ४० हजार रुपैया पाउनेछ । यसअघि विराटनगरमा भएको भेट्रान प्रतियोगिताको विजेताले ५० हजार पुरस्कार राशी पाएको थियो । प्रतियोगिताको सर्वोत्कृष्ठ खेलाडी र हाई स्कोररले जनही नगद ५ हजार पाउनेछ भने हरेक खेलको म्यान अफ दि म्याचले मेहर्स कलेक्सनबाट जर्सी पाउने आयोजकले जानकारी दिएको छ । प्रतियोगिताको लागि धरान उपमहानगरपालिकासँगै विभिन्न देशमा रहेका पुर्वखेलाडी एवं खेलप्रेमीहरुबाट आर्थिक सहयोग आउने अपेक्षा गरेको अध्यक्ष मोक्तानले बताए ।
प्रतियोगितामा आयोजक क्लबसँगै धनकुटाको पुर्वाञ्चल भेट्रान ब्रर्दश, धरानको पुर्वाञ्चल यातायात भेट्रान, विराटनगरको सिएमजि भेट्रान क्लब, हरैचाको विराट भेट्रान क्लब कोशी र झापाको चन्द्रगढी भेट्रान क्लब सहभागी हुदैछ । यस्तै, मोरङको उर्लाबारी भेट्रान क्लब, विराटनगरको युनाइटेड स्पोर्टस भेट्रान क्लब, डाँगीहाट भेट्रान फुटबल क्लब, दुहबीको एलेभेन एरोज भेट्रान क्लब र दमकको लखनपुर भेट्रान क्लबले पनि भाग लिने आयोजकले जनाएको छ । प्रतियोगितालाई निरन्तरता दिदै आगामी बर्षहरुमा राष्ट्रिय एवं अन्र्तराष्ट्रियस्तरको प्रतियोगिता बनाउने योजना रहेको पनि आयोजकको भनाई छ । ‘भेट्रान प्रतियोगिता भएकोले ३५ बर्ष उमेर नाघेकाहरुले मात्रै खेल्न पाउछ । व्यावसायिक खेल खेलिरहेको खेलाडी भए पनि ३५ बर्ष उमेर कटेको भए उसले पनि प्रतियोगितामा खेल्न छुट छ’–क्लबका महासचिव बिक्रम राईले भने ।

            प्रतियोगिता गर्न तीन बर्षको सम्झौता

पुर्वमा पहिलो पटक आयोजना हुन लागेको ठुलो पुरस्कार राशीको भेट्रान प्रतियोगिताको लागि हाल अष्ट्रेलियामा रहेका धरानका पुर्व खेलाडी किसोर राईको महत्वपुर्ण योगदान छ । उनले सहयोग र साथ नदिएको भए यो प्रतियोगिता आयोजना गर्न सम्भव नभएको क्लबका अध्यक्ष मोक्तानले बताए ।
उनका अनुसार धरान १६ घर भएका पुर्व खेलाडी राईले आफ्नो बुबा गोठबहादुर राईको स्मृतिमा प्रतियोगिता सञ्चालन गर्न ३ बर्षको सम्झौता गरेका छन् । प्रतियोगिताको नाम गोठबहादुर स्मृति राख्ने र त्यसवापत बार्षिकरुपमा २ लाख रुपैया प्रायोजन गर्ने क्लब र पुर्वखेलाडी राईबीच सम्झौता छ । ‘उहाँ(किशोर) एकदम राम्रो खेलाडी हो, तर अहिले अष्ट्रेलियामा हुनुहुन्छ । उहाँकै साथ, हौसला र सहयोगले गर्दा प्रतियोगिता गर्न हामीले आँट गरेका हौं’–अध्यक्ष मोक्तानले भने–‘विदेशमा रहेका अरु पनि हाम्रो साथीभाई, पुर्व खेलाडीहरुले सहयोग गर्ने वचन दिइरहनुभएको छ ।’ आयोजक क्लबका अनुसार प्रतियोगिताको लागि अष्ट्रेलियाबाट डेढ लाख, हङकङबाट डेढ लाख, बेलायतबाट एक लाख, अमेरिकाबाट ५० हजार र दुबई, कतार, बहराईनबाट पनि ५० हजार रुयैया सहयोग आउने अनुमान गरिएको छ ।