भेडेटारको पर्यटकीय गुरुयोजना तयार
धरान । पुर्वको प्रख्यात पर्यटकीयस्थल भेडेटारको पर्यटन विकासलाई अझ एकीकृत एवं व्यवस्थितरुपमा अघि बढाउन पर्यटन गुरुयोजना तयार गरिएको छ । भेडेटार गाविस र होटल एशोसिएशन भेडेटारको संयुक्त प्रयासमा पर्यटन गुरुयोजना तयार भएको हो ।
व्यवस्थित योजना नहुदा पर्यटनमा भएका लगानीले अपेक्षित परिणाम नआउने र एकै ठाउँमा दोहोरो लगानी पनि हुनसक्ने देखिएपछि गाविस र एशोसिएशन गुरुयोजना बनाउन कस्सिएको हो । दुवै निकायले गुरुयोजनाको प्रारम्भिक मस्यौदा तयार गरिसकेको छ । सरोकारवाला निकायसँग छलफल गरेर आगामी गाउँ परिषदबाट पारित गरेपछि मस्यौदालाई अन्तिमरुप दिइनेछ । गाउँ परिषद आगामी पुष मसान्तभित्र सम्पन्न हुन्छ । गुरुयोजनामा विभिन्न २९ वटा पर्यटकीय विकासका योजनालाई प्राथमिकता दिइएको छ । गुरुयोजनाले भेडेटारलाई पहाडी वासस्थान(हिल स्टेशन) बनाउने लक्ष्य लिएको छ । गुरुयोजना परिषदबाट पारित भएपछि तिनै योजनालाई प्राथमिकता दिएर पर्यटन विकासलाई अघि बढाइने गाविस सचिव एवं गाविसस्तरीय एकिकृत पर्यटन विकास समितिका अध्यक्ष नारायण प्रसाद खनालले बताए ।
उनका अनुसार भेडेटारमा पर्यटकीय संरचना निर्माण एवं विकासका कामहरु हुदा स्थानीय निकाय एवं सरोकारवालासँग समन्वय अभाव छ । जसले गर्दा एउटै योजनामा दुई संस्थाबाट पनि लगानी भइरहेको छ । सरोकारवालाका अनुसार अहिले भेडेटारमा जे जति पर्यटनका पुर्वाधारहरु निर्माण भएका छन्, ती स्थानीय निकाय एवं सरोकारवालासँग समन्वय भएको थिएन । भेडेटारमा जिविस, गाविस, पर्यटन कार्यालय झापालगायत निकायले एक अर्कामा समन्वय नगरी नै पुर्वाधारमा लगानी गरिरहेको थियो । गुरुयोजना तयार भएपछि ती लागनीकर्ता र स्थानीय पर्यटन सरोकारवालाबीच समन्वय हुनेछ र, एकै योजनामा बजेट दोहोरिनेछैन । ‘आन्तरिक बजेट होस वा बाह्य लगानी होस्, अब गुरुयोजनाले प्राथमिकता दिएका योजनामा एकीकृत र समन्वय गरेर मात्रै लगानी हुनेछ । योजना छनौट, अनुगमन मुल्यांकन पनि त्यसरी नै गर्नेछौं’–सचिव खनालले भने–‘यसले भेडेटारको पर्यटन विकासको कामलाई व्यवस्थित र परिणाममुखी बनाउने अपेक्षा गरेका छौं ।’
गुरुयोजनाबाट स्थानीय सरोकारवाला एवं पर्यटन व्यावसायीहरु पनि हौसिएका छन् । होटल एशोसिएशन भेडेटारका सचिव जितेन्द्र रुम्दाली राईका गुरुयोजनाको मस्यौदा मात्रै भएपनि पर्यटन बोर्ड, मन्त्रालय, पर्यटन विभाग, सडक विभाग, जिविसलगायत निकायमा पेश भइसकेको छ । ‘पहिला बजेट कुन पुर्वाधारमा लगानी गर्ने भनेर स्थानीयमा तानातान जस्तै हुन्थ्यो । गुरुयोजनाले अबको १० बर्षसम्म हामी कुन पुर्वाधार र योजनामा फोकस हुने भन्ने प्रष्ट पारेको छ । अब त्यस्तो विवाद हुनेछैन’–उनले भने–‘प्राथमिकताअनुसार नै काम हुन्छ । कतै बजेट माग्नुपर्दा यही शिर्षकअनुसार नै प्रस्ताव पेश गछौं ।’
गुरुयोजनाले भेडेटार बजारको पश्चिममा रहेको क्षतिग्रस्त शैलुङ डाँडा भ्यू टावरलाई आर्थिक बर्ष ०७२÷०७३ मा नै कलात्मक डिजाइनमा पुननिर्माण गर्न औल्याएको छ । पर्यटन वोर्ड, जिविस, गाविस, स्थानीय संघसंस्था र दाताहरुको सहयोगमा पुर्ननिर्माण गर्न एक करोड लागतमा निर्माण हुने अनुमान गरिएको छ । भेडेटार आउने पर्यटकहरुको प्रमुख गन्तब्य रहेको भ्यु टावर गत बैशाख १२ को भूकम्पले क्षति पुर्याएपछि चढ्न निषेध गरिएको छ । यस्तै, आर्थिक बर्ष ०७३/०७४ मा बहुसांस्कृतिक संग्रहालय तथा पर्यटन सूचना केन्द्र भवन निर्माणको प्रस्ताव गरिएको छ । यसको लागत डेढ करोड हुने अनुमान छ । आर्थिक बर्ष ०७२ देखि ०७६ सम्म पर्यटकीय फुट ट्रयाक(हाइकिङ रुट) निर्माण गरिने उल्लेख छ । भेडेटारको सिमसुवा झरना, थेल्लाङ गडेरे गिद्धेभिर, हात्तीसुडेबाट नाम्जे, आत्माघर हुदै सागुरीगढी, पाथिभरा, खजुरेगुफा, सातपत्रेगैह्री चुलढुंगा रकगार्डेन, खजुरेगुफा कोलबोटे सिमसुवा झरनासम्मको पर्यटकीय फुट ट्रयाक निर्माण गर्नुपर्ने गुरुयोजनामा प्रस्तावित छ । ट्रयाक निर्माणमा ५० लाख रुपैया खर्च हुने भनिएको छ ।
यसैगरि, भेडेटारको प्राकृतिक सौन्दर्यलाई कायम राख्न आर्थिक बर्ष ०७२ देखि निरन्तर बोटानिकल गार्डेन निर्माणमा जुट्नुपर्ने प्रस्ताव छ । यसको लागि बार्षिक ५ लाख रुपैया खर्च हुने अनुमान गरिएको छ । स्थानीय सामुदायीक वनसँग सहकार्य गर्न सकिने गुरुयोजनाले सुझाएको छ । भेडेटार आउन निजी सवारीसाधान नभएका पर्यटकहरुलाई धेरै समस्या हुने गरेकोले आर्थिक बर्ष ०७३/०७४ देखि छुट्टै पर्यटक बस सेवा पनि सञ्चालन गरिनेछ । यसको लागि ६० लाख रुपैया लागत अनुमान गरिएको छ । खेलकुद पर्यटन विकासको पनि सम्भावना रहेको औल्याउदै गुरुयोजनाले आगामी पाँच बर्षभित्र सुबिधा सम्पन्न फुटबल मैदान, इनडोर भलिबल र ब्याडमिन्टन कोर्ट निर्माणलाई जोडदिएको छ । यसको लागि एक करोड लाग्ने अनुमान छ ।
पर्यटकीय सम्पदाहरुको विकास तथा पर्यटनका गतिविधिहरु भइरहे पनि भौगोलिकरुपमा सानो क्षेत्र भएकोले भेडेटारको पर्यटनलाई आसपास क्षेत्रसँग आवद्ध गरेर अघि बढे व्यावसायिक पर्यटनमा अझ टेवा पुग्ने गुरुयोजनाको निष्कर्ष छ । तमोर नदिको ¥याफ्टिङ, डाडाबजार र राजारानीको पर्यटकीय गतिविधिहरु, हिले, तिनजुरे– मिल्के–जलजले क्षेत्र, धरान उपमहानगरपालिकासँग भेडेटारको पर्यटन व्यवसायलाई जोडेर लैजानुपर्ने सुझाव छ । साथै, धनकुटा जिल्लाको चौबिसे क्षेत्रको एकिकृत पर्यटन गुरुयोजना निर्माण गरी अघि बढनुपर्ने आवश्यकता पनि गुरुयोजनाले औल्याएको छ ।
.............................
चिण्डो आकारको भ्यु टावर
गुरुयोजनाले प्राथमिकता दिएको भडेटार बजार नजिकैको शैलुङ डाँडामा चिण्डो आकारको भ्यु टावर निर्माण गर्ने प्रस्ताव गरिएको छ । भेडेटारमा होटल मनशान्त रिसोर्ट सञ्चालन गरिरहेका कलाकार रोजन राईले उक्त डाँडामा चिण्डो आकारको भ्यु टावर परिकल्पना गरेका हुन् । उनको यो प्रस्तावबारे भने होटल एशोसिएशन भेडेटार, गाविस र धनकुटा जिविसले औपचारिक निर्णय भने गरिसकेको छैन । भेडेटारको चर्चित शंखेश्वर महादेव मुर्ति मन्दिर पनि उनले नै परिकल्पना एवं डिजाइन गरेका थिए । गएको बैशाख १२ गतेको भुकम्पले डाँडाको भ्यु टावरमा क्षति पुगेकोले चढ्न पुर्णरुपमा बन्द छ । ०६८ को भुकम्पलेसमेत उक्त टावरलाई क्षति गरेको थियो ।
कलाकार राईका अनुसार कलात्मक र आर्कषक भ्यु टावर बनाउने उद्देश्यले चिण्डोको परिकल्पना गरिएको हो । यसको डिजाइनसमेत तयार गरिसकेका राईका अनुसार हालको ४४ फुटको भ्यु टावरकै उचाईमा चिण्डो आकारको भ्यु टावर बन्नेछ । पहिलो तलामा सुचना केन्द्र र पसल हुनेछ भने त्यो माथि ठुलो गोलाईमा भ्यु प्वाइन्ट बन्नेछ । दुई–दुई फिटको गोलाईमा भ्यु प्वाइन्ट रहन्छ । पर्यटकहरु त्यहाँसम्म चढेर दृष्यावलोकन गर्न सक्नेछन् भने त्यसमाथि मात्रै चिण्डो आकारको मुर्ति रहन्छ । उक्त चिण्डोभित्र बिशेष मान्छे आकृतिको शिला राखिने कलाकार राईले बताए । गुरुयोजनाले भ्यु टावर बनाउन एक करोड रुपैया लागतको अनुमान गरेको छ ।
Comments
Post a Comment