किरातको वृहत मोटरसाइकल र्याली(फोटोफिचर)

धरान । किरात राज्य सुनिश्चितताको लागि दबाब स्वरुप शुक्रबार धरानमा वृहत मोटरसाइकल र्याली भएको छ । किरात राई यायोक्खाले शनिबार धरानमा आयोजना गर्न लागेको वृहत किरात जनसभाको प्रचार गर्ने उद्देश्यले मोटरसाइकल र्याली गरेको हो ।
धरान १० स्थित यलम्बर स्मृति भवनबाट शुरु भएको र्यालीले नगरको परिक्रमा गरेर भानुचौकमा कोणसभामा पणित भएको थियो । कोणसभालाई यायोक्खाका जिल्ला अध्यक्ष शुभचन्द्र राई र केन्द्रीय उपाध्यक्ष चन्द्रबिक्रम राईले सम्बोधन गरेका थिए । र्यालीमा पाँच सय बढी मोटरसाइकल सहभागी भएको जनसभा प्रचार विभागले जनाएको छ ।

कोणसभा सम्बोधनमा केन्द्रीय उपाध्यक्ष राईले तीन दलले ल्याएको संविधानले आदिवासी, जनजाति, मधेश, दलित एवं उत्पीडित जाति, समुदायको हक,अधिकार सुनिश्चित नगरेकोले पहिचानवादीहरुले दिपावली नगर्ने बताए । तीन दलबाहेक सबै शक्तिहरु आन्दोलनमा रहेकोले ८ बर्ष लगाएर ल्याएको संविधान ८ हप्ता पनि नटिक्ने उनले चेतावनी दिए । ‘कसैलाई राष्ट्रपति हुन हतारो छ, कसैलाई प्रधानमन्त्री बन्नुछ, त्यसैले जर्बजस्ती संविधान ल्याएर मुलुकमा भिडन्त निम्त्याइदैछ, धमाधम जनता मरिदैछ’–उपाध्यक्ष राईले भने–‘तीन दलबाहेकको सबै शक्ति, समुदाय आन्दोलनमा छ, यो संविधान ८ हप्ता पनि टिक्दैन ।’

यायोक्खाका जिल्ला अध्यक्ष शुभचन्द्र राईले सदियौंदेखि उत्पीडनमा परेका जाति, समुदायको हकअधिकार सुनिश्चित नभएकोले ३ गतेदेखि नै संविधान जल्न थाल्ने बताए । किरातको शान्तिपुर्ण आन्दोलनलाई कमजोर ठानेमा सत्तामा बसेकाहरुको लागि ठुलो भुल हुने उनले चेतावनी दिए । पहिचानवादी आन्दोलनलाई सशक्त बनाउन एवं संविधानमा पहिचानसहितको संघीयता सुनिश्चित गराउन जनसभा गर्न लागेको यायोक्खाले जनाएको छ । पुर्वका राई, लिम्बु, याक्खा, सुनुवारलगायत सबै जातजातिको पहिचान, सहअस्तित्व, सम्मानलाई किरात राज्यले समेट्ने यायोक्खाको दाबी छ ।

यायोक्खाले ०६३ मा छैठौं महाधिवेशनबाट पुर्वी नेपालको १७ जिल्लालाई किरात राज्य घोषणाको माग अघि सारेको थियो । संविधानमा पहिचान र अधिकार सुनिश्चितताको लागि देशभर हिंसात्मक आन्दोलन भइरहदा यायोक्खाले भने किरात राज्यको लागि दबाबमुलक रचनात्मक एवं प्रचारात्मक कार्यक्रम मात्रै गर्ने घोषणा गरेको थियो । किरातमा सभ्यता, वृहत जाति र भुगोल पनि भएकोले सबै जाति, समुदाय समेटिने यायोक्खाको धारणा छ । किरात राज्यअन्र्तगत नै लिम्बुवान र खम्बुवान उप स्वायत्तता हुनुपर्ने यायोक्खाको प्रस्ताव छ ।