बीपीका सुरक्षा गार्ड काममा फर्के

धरान । आर्थिक बर्ष ०७०/०७१ मा नेपाल सरकारले बृद्धि गरेको तलब भत्ता पाउनुपर्ने माग गर्दै आन्दोलनरत बीपी कोइराला स्वास्थ्य विज्ञान प्रतिष्ठानका सेक्युरिटी गाडीहरु सोमबार साँझदेखि काममा फर्किएका छन् ।
ठेकेदार कम्पनीले जिफोरएसले चालु सेप्टेम्बर महिनाको भत्ता वृद्धि गर्न सहमति जनाएपछि सुरक्षा गार्डहरु काममा फर्किन सहमत भएका हुन् । गत भदौ २८ गतेदेखि सुरक्षा गार्डहरुले २४ घण्टा नै काम छोडेर आन्दोलनमा होमिएका थिए । जसले गर्दा प्रतिष्ठानको आन्तरिक सुरक्षा अस्तब्यस्त बनेको थियो । सुरक्षा गार्डहरु डिउटी छोडेर ठेकेदार कम्पनीको कन्ट्रोलरुम अघि धर्नामा बस्ने गरेका थिए । उनीहरुले जिफोरएसको कन्ट्रोल रुममा तालासमेत लगाइदिएका थिए ।

आन्दोलन लम्बिदा अस्पतालजस्तो संवेदनशील ठाउँको सरक्षा अस्तब्यस्त हुदै गएपछि समाधान गर्न जिफोरए डाइरेक्टर गार्डिङ सुन्दर प्रताप राना र एचआर विभागका प्रबन्धक विनोदप्रसाद मिश्र केही दिनदेखि धरानमा थिए । बुधबार भएको वार्तामा सेप्टेम्बर महिनाको भत्ता एक हजार बढाईदिन कम्पनी सहमत भएपछि गार्डहरु पनि आन्दोलन फिर्ता लिन सहमत भई काममा फर्किएको जिफोरएसका इञ्चार्ज वलराम निरौलाले बताए ।
सरकारले वृद्धि गरेको भत्ता १८ सय पाउनुपर्ने माग गर्दै गार्डहरुले आन्दोलन गरेपछि कम्पनीले गत बर्ष नै ८ सय भत्ता बढाईदिएको थियो । बाँकी एक हजार पाउन प्रतिष्ठानसँग पहल गर्ने सम्झौता थियो । उक्त बाँकी भत्ता एक हजार पनि पाउनुपर्ने भन्दै गार्डहरु भदौ दोस्रो सातादेखि चरणवद्ध आन्दोलनमा थिए । ‘हाम्रो दुई बुदे मागमध्ये एक हजार भत्ता बढाउनुपर्ने माग पुरा भएकोले आजै साँझदेखि डिउटीमा फर्कियौं । कन्ट्रोलरुमको ताला पनि खोलिसक्यौं’–संघर्ष समितिका संयोजक उमेश दाहालले भने । सुरक्षा गार्डहरुले खाईखाई आएको ९ हजार ५ सय ४० रुपैयालाई बेसिक सेलरी कायम गरिनुपर्ने माग भने पुरा हुन सकेको छैन ।
जिफोरएसको ठेक्का अवधि गत भदौमा नै सकिए पनि ठेक्का प्रक्रिया तत्काल टुंगो नलागेपछि अर्को व्यवस्था नभएसम्म प्रतिष्ठानले सोही कम्पनीलाई निरन्तरता दिएको थियो । अब भने केटिएम सेक्युरिटीले ठेक्का पाउने लगभग निश्चित भइसकेकोले प्रतिष्ठान छोड्ने बेला कम्पनीको छवि नकरात्मक नबनाउने भन्दै जिफोरएसका उच्चअधिकारीहरु चालु महिनामा एक हजार भत्ता बढाउन सहमत भएको हो । ‘अब हामीले छोड्ने निश्चित भइसकेकोले कम्पनीको छवि नराम्रो नहोस् भनेर सेप्टेम्बर महिनाको एक हजार भत्ता बढाउन सहमति भयो, अब हामी १५ दिनजति काम गछौं होला’–निरौलाले भने । बीपीमा अस्पताल, प्रशासनिक भवन, विरामी कुरुवा, विरामीलगायत प्रतिष्ठानको समग्र आन्तरिक सुरक्षाको जिम्मा सुरक्षा गार्डको हो ।