पुर्वमै पर्यटक उडाउने टेण्डम पाइलटको चाहना

धरान । पुर्वका छ जना युवाहरुले साहसिक खेल पर्यटन प्याराग्लाइडिङमा टेण्डम पाइलटको उडान अनुमति पत्र(लाइसेन्स) पाएका छन् । नेपालमा प्याराग्लाइडिङ शुरु भएको झण्डै दुई दकशमा पहिलो पटक सरकारले लाइसेन्स दिदा पुर्वका ६ पाइलटले पनि पाएका हुन् । लाइसेन्स युवाहरुमा पुर्वका पहिलो टेण्डम पाइलट देशवीर जिमी, मणीराज तामाङ, एरोन राई(प्रज्वल), जीवनकुमार थेवे, लाक्पा शेर्पा र नरेश राई छन् । देशवीर, मणीराज र नरेश धराने हुन् भने एरोन झापा, जीवन ताप्लेजुङ र लाक्पा सोलुखुम्बुका हुन् ।
नेपालमा विगत १९ बर्षदेखि प्याराग्लाइडिङको उडान भइरहे पनि नागरिक उड्यान प्राधिकरणले सोमबार पहिलो पटक पोखरामा लाइसेन्स वितरण गरेको हो । पोखरामा उडान गरिरहेका एक सय ३ जना पाइलटहरुले अस्थायी लाइसेन्स पाएका थिए । पोखराको प्याराग्लाइडिङ विश्वका उत्कृष्ट ५ मा गनिन्छ । लाइसेन्स पाएका पुर्वेली पाइलटहरु भविष्यमा पुर्वमा आएर नै व्यावसायिक उडान गर्न चाहन्छन् । लाइसेन्स वितरणको क्रममा प्राधिकरणका महानिर्देशक सञ्जिव गौतमले पोखरामा अन्र्तराष्ट्रिय हवाई मैदान निर्माण भएपछि ४ बर्षपछि प्याराग्लाइडिङ विस्थापित हुने भएकोले विकल्प खोज्न आग्रह गरेका थिए । यसले पनि पुर्वेली युवाहरु आफ्नै ठाउँमा प्याराग्लाइडिङलाई व्यावसायिकरुपमा अघि बढाउन चाहन्छन् । ‘नेपाल सरकारले वल्ल हामीलाई आधिकारिकता दिएर लाइसेन्स दियो, यो अस्थायी हो । प्राधिकरणले चाडै स्थायी पनि दिने भनेको छ’–पुर्वकै पहिलो टेण्डम पाइलट देशवीर जिमीले मोवाइल सम्पर्कमा भने–‘प्राधिकरणले ४ बर्षपछि पोखराबाट प्याराग्लाइडिङ विस्थापित हुन्छ, विकल्प खोज्नुस् भनिसकेको छ, पुर्वमा धेरै सम्भावना भएकोले हामी त्यतै आएर काम गर्न चाहन्छौं ।’

भर्खर लाइसेन्स पाएका पुर्वेली युवाहरुले पोखरास्थित विभिन्न कम्पनीबाट कोर्ष पुरा गरेर व्यावसायिक उडान गरिरहेका थिए । नेपाल सरकारले लाइसेन्स नदिए पनि विभिन्न मुलुकको एशोसिएशनले दिएको लाइसेन्सको आधारमा प्याराग्लाइडरहरु पर्यटकलाई उडाइरहेका थिए । आफ्नै सरकारबाट लाइसेन्स पाएपछि पाइलटहरु खुशी छन् भने सरकारलाई मासिकरुपमा राजश्व पनि बुझाउनेछन् । पाइलटहरुका अनुसार मासिकरुपमा ९ हजार ४० रुपैया एयरपोर्ट परमिट तिर्नुपर्ने हुन्छ । सरकारले प्याराग्लाइडिङलाई पनि नियमन गर्न नयाँ खेलकुद हवाई नियमावली पनि लागु गरेको थियो । नेपाल हवाई खेलकुद संस्थासँग समन्वय गरी प्राधिकरणले पहिलो पटक लाइसेन्स दिएको हो ।

पुर्वको धरानमा उडान परीक्षण सफल भइसके पनि व्यावसायिक उडान भने हुन सकेको छैन । लामो समयदेखि व्यावसायिक उडानको पहल गरिरहेको बुढासुब्बा प्याराग्लाइडिङ प्रालिले सरकारबाट एओसि पाउन बाँकी छ भने एओसी पाइसकेको भनिएको धरान स्काई एडभेञ्चर प्रालिले व्यावसायिक उडानको शुरुवात गर्न भने सकेको छैन । पाइलटहरु भने पुर्वलाई साहसिक खेल पर्यटनको गन्तव्यकोरुपमा प्रर्वद्धन र विकास गर्न आफुहरु तयार रहेको बताउछन् । उनीहरु विगतमा पनि बेला बेला धरानमा आएर परीक्षण उडान गरिरहेका थिए । धरानमा सर्दु जलाधार क्षेत्रको छोटिमोरङस्थित डाँडाबाट प्याराग्लाइडिङ उडान हुने गरेको छ भने बुढासुब्बाले धरान २४(विष्णुपादुका) स्थित डाँडाबाट पनि परीक्षण उडान गर्ने गरेको छ ।

टेण्डम पाइलट देशविर र मणि बैशाख १२ को भुकम्प पछि धरान आएर प्रि–मनसुन टेस्ट फ्लाइट पनि परेका थिए । त्यतिबेला बुढासुब्बा प्याराग्लाइडिङ कम्पनीले विष्णुपादुकास्थित चिण्डेडाँडाको टेकअफ प्वाइन्ट र ल्याण्डिङ स्पट अध्ययन एवं तयारी गरेको थियो । नेपालमा पोखराबाहेक भर्खर मात्रै तनहुको बन्दीपुर, स्याङजाको सोरेक श्रीकोट, सुर्खेत, दाङ र पाल्पामा पनि उडान अनुमति पाएको छ ।
बुढासुब्बा प्याराग्लाइडिङ कम्पनीमा आवद्ध राम राई पनि अबको ४ बर्षपछि पोखरा केन्द्रीत प्याराग्लाइडिङ विमानस्थलको कारण विस्थापित हुने भएकोले त्यसको लाभ पुर्वको पर्यटनले लिनसक्ने बताउछन् । पुर्वेली टेण्डम पाइटल पनि उत्पादन भइसकेकोले साहसिक पर्यटकहरुलाई पुर्वमा भित्र्याउन सकिने उनको भनाई छ । ‘धरान एडभेञ्चर हब बन्नसक्छ । भारतीय पर्यटकहरु एडभेञ्चरप्रति आर्कर्षित भइरहेकोले धेरै फाइदा लिनसकिन्छ’–उनी भन्छन् ।