लागुऔषध प्रयोगकर्ताको सहयोगमा डिलर पक्राउ

धरान । 'हेल्लो, सविन हो ?"
मोवाइलमा परिचित आवाज बोलेपछि सविनले भने: 'हो ।"
उताबाट फेरि आवाज आयो: 'चार्ज छ होइन ? तुरुन्त भेटौ है त ।"
दुवैले कहाँ भेट्ने भनेर सल्लाह मिलाए । धरान १६ का सविन राई आफ्नो साथमा चार्ज अर्थात लागुऔषध बोकेर तोकिएको स्थानमा पुगे । उनीहरु एकआपसमा लागुऔषधलाई चार्ज भन्दा रहेछन् । तर, उनले त्यहाँ परिचित व्यक्ति भेटेनन्, उल्टै उनी प्रहरीको फन्दामा परे । केही समययता लागुऔषध कारोबारविरुद्ध अभियान छेडेको प्रहरीले यही तरिका अपनाएर अर्का कारोबारी धरान १९ का दिनेश लिम्बुलाई पनि समाउन सफल भए । दुवैको साथबाट प्रहरीले ५७ एम्पुल नोरोजैसिक, ५७ एम्पुल एभिल र ५७ एम्पुल डाइजेपाम वरामद गर्यो । धरानमा लागुऔषधको डिलरकोरुपमा काम गरिरहेका सविन र दिनेश दुवै प्रयोगकर्ता पनि भएको डिएसपी सञ्जयसिंह थापाले जानकारी दिए । ‘उनीहरु आफै डिलर पनि हुन् र प्रयोगकर्ता पनि ।’–डिएसपी थापाले भने ।

केही दिनअघि प्रहरीले तीन जना लागुऔषध प्रयोगकर्तालाई पक्राउ गरेको थियो । उनीहरुलाई कियाचु पूर्नजीवन केन्द्रमा पठाएर तिनीहरुकै वयानको आधारमा प्रहरीले डिलरलाई पक्राउ गर्ने योजना बुन्यो । डिलरकोरुपमा धरानमा काम गरिरहेका सविन र दिनेशलाई फोन गर्न लगाएर प्रहरीले लागुऔषध किन्ने बहानामा कुनै ठाउँमा भेट्न बोलायो । सधै खरीद गर्ने र चिनेका व्यक्तिले मगाएपछि चार्ज बोकेर गएका सविन र दिनेश अन्ततः प्रहरीको फन्दामा परे । दुवैलाई लागुऔषध कारोबारमा मुद्दा दर्ता गरेर कारबाही अघि बढाइएको प्रहरीले जानकारी दिएको छ ।