सहमतिपछि बीपीका सुरक्षा गार्डहरुको आन्दोलत फिर्ता

धरान । सरकारले वृद्धि गरेको तलब पाउनु पर्ने एक सुत्रिय माग राखेर आन्दोलनरत बीपी कोइराला स्वास्थ्य विज्ञान प्रतिष्ठानका सुरक्षा गार्डहरुले आन्दोलन फिर्ता गरेका छन् । प्रतिष्ठानको सुरक्षा ठेक्का पाएको जिफोरएसको व्यावस्थापनसँग बिहिबार भएको वार्तामा सहमति भएपछि सुरक्षा गार्डहरुले आन्दोलन फिर्ता गरेका हुन् ।
       दिनभर जसो भएको वार्तामा राती करिब ७ बजेतिर मात्रै सहमति भएको थियो । सुरक्षा गार्डहरु आन्दोलनमा उत्रिएपछि अस्पतालको सुरक्षा व्यवस्था कमजोर भएको भन्दै निन्दा हुन थालेपछि ठेकेदार कम्पनीको व्यावस्थापनको टिम दुई दिन अघि समस्या हल गर्न धरान आएको थियो । उक्त वार्तामा सम्झौता नसकेसम्म मासिक रुपमा ८ सय रुपैया थप गर्न कम्पनी सहमत भएपछि दुवै पक्षबीच सहमति भएको वार्तामा एमालेका तर्फबाट सहभागी युवा संघका केन्द्रीय सदस्य हिमाल लिम्बूले बताए । उनका अनुसार ७ महिनापछि जिफोरएसको सम्झौता सकिने र त्यसपछि पुनः यही कम्पनीले सुरक्षा ठेक्का पाएमा भने गार्डहरुको माग वमोजिम नै तलब बृद्धि गर्ने पनि दुवै पक्षबीच सहमति भएको छ । प्रतिष्ठानका सुरक्षा गार्डहरुले सरकारले बृद्धि गरेको १८ सय रुपैया मासिक रुपमा वृद्धि गरिनुपर्ने माग गर्दै मंसिर २९ गतेदेखि चरणवद्ध आन्दोलनमा उत्रिएका थिए ।
जिफोरएसका प्रतिष्ठानस्थित सुरक्षा इञ्चार्ज वलराम निरौला आन्दोलनरत सुरक्षा गार्डहरुको माग वमोजिम तलब वृद्धि गर्न नसकिने भएकोले राहतस्वरुप भत्ताकोरुपमा वृद्धि गर्न कम्पनी सहमत भएको बताए । ‘अहिले कम्पनीको अवधिरहेसम्म ८ सय रुपैया थप गर्ने र पछि प्रतिष्ठानसँग पुनः सम्झौता भयो भने चाहिँ १८ सय नै बढाउने भन्ने सहमति भएको छ’–निरौलाले भने । वार्तामा जिफोरएसका प्रबन्ध निर्देशक महेश श्रेष्ठ, सुरक्षा निर्देशक सुन्दरप्रताप राणा, एच.आर.निर्देशक विनोद मिश्र, सेल्स एण्ड मार्केटिंगका मेनेजर दिपक राउत सहभागी थिए भने गार्डहरुको तर्फबाट संयुक्त सुरक्षा गार्ड संघर्ष समितिका प्रतिनिधिहरुले भाग लिएका थिए । यस्तै, राजनैतिक दलका तर्फबाट एमालेका सुवास पौडेल, गोविन्द गिरी, कांग्रेसका शैलेश कोइराला, जिफन्टको तर्फबाट हरि राईलगायत सहभागी थिए ।
     प्रतिष्ठानमा स्थापनाकालदेखि नै कार्यरत सुरक्षागार्डहरुसमेत गरेर हाल एक सय २३ जना छन् । स्थापनाकालमा प्रतिष्ठान आफैले गार्ड राखेर तलब खुवाएपनि ०५७ सालदेखि भने सुरक्षागार्ड ठेक्कामा लगाएको थियो । हाल प्रतिष्ठानका सुरक्षागार्डहरुले ठेक्केदार कम्पनी जिफोरएसबाट दैनिक १ सय ९० रुपैयाको दरले मासिक ५ हजार ७ सय तलब र २ हजार ६ सय भत्ता गरेर एकमुष्ठ ८ हजार ३ सय रुपैया पाउदै आएका छन् । यो तलब भत्ता मजदुरको लागि सरकारले निर्धारण गरेको भन्दा ३ सय बढी हो । सरकारले मजदुरको लागि मात्रै ८ हजार रुपैया न्युनतम मासिक तलब निर्धारण गरेको छ ।