यु-१३ गल्र्स फुटबलमा सुनसरी फाइनल पुग्यो

धरान । हेटौडामा जारी एन्फा यु–१३ गल्र्स फुटवल प्रतियोगितामा लगातार जित हात पार्दै सुनसरी जिल्ला फाइनल पुगेको छ ।
समुह विजेता बनेर सेमीफाइनल पुगेको सुनसरीले बिहिबार काठमाण्डौं जिल्लालाई २–१ गोलअन्तरले हराउदै प्रतियोगिताको फाइनल पुगेको हो । वन विभाग क्याम्पसको खेलमैदानमा जारी प्रतियोगिताको सेमीफाइनलमा सुनसरीको जितको लागि पहिलो हाफमा रेखा पौडेल र विमला थापाले गोल गरेको सुनसरीकी प्रशिक्षक भगवती रानाले टेलिफोनमा जानकारी दिइन् । उनका अनुसार काठमाण्डौं जिल्लाको लागि सान्त्वना गोल दोस्रो हाफको ५५ औं मिनेटमा भएको थियो ।
सुनसरीले शनिबार फाइनलमा रौतहट जिल्लाको सामना गर्नेछ । रौतहटले बिहिबार नै भएको दोस्रो सेमीफाइनल खेलमा नवलपरासीलाई ३–१ गोलअन्तरले हराउदै फाइनलमा सुनसरीसँगको भेट पक्का गरेको हो । आगामी बर्ष हुने एएफसी यु–१४ गल्र्स टुर्नामेन्टकोलागि राष्टिय टिम तयार गर्न यो प्रतियोगिता आयोजना भइरहेको हो । मंसिर ३० गतेदेखि जारी प्रतियोगितामा विभिन्न १२ वटा जिल्लाले भाग लिएको थियो ।
सुनसरीले मंसिर ३० गतेको पहिलो खेलमा कैलाली जिल्लालाई ११–० को विशाल गोलअन्तरले पराजित गरेको प्रशिक्षक रानाले जानकारी दिइन् । उनका अनुसार उक्त खेलमा स्ट्राइकर रेखा पौडेल एक्लैले दोहोरो ह्याट्रिकसहित ८ गोल गरेकी थिइन् भने अस्मिता राईले २ र दुर्गा मगरले एक गोल गरेकी थिइन् । यस्तै, पुष २ गतेको दोस्रो खेलमा पनि सुनसरीले चितवन जिल्लालाई ५–० गोलअन्तरले पराजित गरेको थियो । उक्त खेलमा पनि स्ट्राइकर रेखा पौडेले पाँचै गोल गरेको प्रशिक्षक रानाले बताइन् । ‘रेखा टिमकी महत्वपुर्ण खेलाडी हुन्, ३ वटा खेलमा मात्रै उनले १४ गोल गरिसकिन्’–प्रशिक्षक रानाले टेलिफोन सम्पर्कमा भनिन्–‘फाइनलमा पनि उनीबाट उत्कृष्ट प्रर्दशन हुने आशा छ ।’
सुनसरीको टिममा कप्तान दुर्गा मगर, जानुका परियार, स्वास्तिका राई, मनि डोल्मा शेर्पा, सगुन तामाङ, अस्मिता राई, शान्ति लिम्बू छन् । यस्तै, अनिता तामाङ, हिनिता राई, विमला थापा, मुना मगर, सुस्मिता राई, रेखा पौडेल, गीता चौधरी, सोमिका राई र प्रिति गुरुङ छन् । यो प्रतियोगितामा सहभागी जिल्लाका उत्कृष्ट खेलाडीहरु छनौट गरेर एन्फाले आगामी बर्ष हुने एएफसी गल्र्स टुर्नामेन्टको लागि एन्फाले यु–१४ राष्टिय टिम बनाउनेछ ।