अपहरण गरी भारत पुर्याएका बालकको उद्दार

धरान । अपहरणमा गरी भारत पुर्याएको दुई दिनपछि प्रहरीले एक वालकलाई सकशुल उद्दार गर्न सफल भएको छ । धरानमा कवाडी व्यापार गर्ने भारतको पश्चिम वंगालका शर्फुल शेखका एघार बर्षिय छोरा ऋतिक शेखलाई प्रहरीले भारतमा पुगेर अपहरणमुक्त गरेको हो ।

अपहरणकारी भारतको पुर्णिया जिल्लास्थित खोरवारी जेलगंगका २४ बर्षीय आतावुल शेख भने पक्राउ पर्न नसकेको प्रहरीले जनाएको छ । उद्दार गरी ल्याइएका वालकलाई सोमबार इलाका प्रहरी कार्यालयले अभिभावकको जिम्मा लगाएको छ । अपराहणकारी भारतीय भएपनि मुद्दा दर्ता गरिने र नेपाल प्रवेश गरेमा कानुनी दायरामा ल्याइने डिएसपी सञ्जयसिंह थापाले बताए । ‘भारतको पुर्णिया पुगेर अपहरणमा परेका वालकलाई ल्याउन सफल भएका छौं, अपहरणकारी समाउन सकेनौं, तर पछि नेपाल प्रवेश गरेकोबेला कानुनी दायरामा आउने गरी मुद्दा दर्ता हुन्छ’–डिएसपी थापाले भने ।
बालक शनिबार बिहान १० बजेतिर अपहरणमा परेपनि उनका बुबाले भने प्रहरीलाई आइतबार मात्रै जानकारी गराएको थियो । बालक अपहरण भएको जानकारी पाएलगत्तै इलाका प्रहरी कार्यालयबाट प्रहरी निरीक्षक मुकुन्दप्रसाद रिजालको कमाण्डमा पूर्वक्षेत्रीय प्रहरी कार्यालय रानी विराटनगर र अञ्चल प्रहरी कार्यालय, कोशीबाट ७ जनाको संयुक्त टोली आइतबार एघार बजेतिर भारततर्फ गएको थियो । प्रहरी निरीक्षक रिजालका अनुसार पुर्णियास्थित कसवा थानासँग समन्वय गरेर अपहरणकारीको घरमा राती करिब साढे ९ बजेतिर छापा मारिएको थियो । अहपरणकारीको घरमा नै बालक फेला परेपनि शेख भने घरमा भेटिएनन् । ‘छापा मार्दा अपहरणकारी घरमा थिएन, बालकलाई लिएर राती नै नेपालतर्फ आयौं’–प्रहरी निरीक्षक रिजालले भने ।
अपहरणकारी शेख पनि धरानमा कवाडीको व्यापार गर्ने गरेको अनुसन्धानबाट खुलेको छ । अपहरित बालकका बुबा शर्फुल र अहपरणकारी शेखबीच पनि कारोबार हुने गथ्र्यो । शर्फुलले अपहरणकारी शेखलाई ६ हजार ५ सय रुपैया तिर्नुपर्ने अनुसन्धानबाट खुलेकोले त्यसैको रिसमा पनि अपहरण भएको हुनसक्ने प्रहरीको अनुमान छ । अपहरणमुक्त भएका ऋतिकका अनुसार बुबा नभएको समयमा खेशले उनलाई फालाम दिन्छु, राम्रो कमाइ हुन्छ भन्दै फकाएर टेम्पोमा हालेर लगेका थिए । उनको बुबा धरान ७, राममन्दिर नजिकै डेरा गरेर बस्छन् । ऋतिक भने एक साता अघि मात्रै वेष्टवंगालबाट धरान आएका थिए ।
अपहरणकारी शेखले शुरुमा फोन गरेर ऋतिकका बुबासँग तीन लाख फिरौती मागेका थिए । त्यसबेलासम्म आफ्ना नातेदारहरुसँग मात्रै खोजी गरिरहेका उनी फिरौती मागेपछि मात्रै प्रहरीलाई गुहार्न पुगे । प्रहरीले अपहरणकारी शेखसँग कवाडको करोबार गर्ने उनकै गाउँका दुई व्यक्तिमार्फत घरसम्म पुग्न सकेको थियो । आइतबार भारत प्रवेश गर्नुअघि प्रहरीसँग भएको फोन सम्पर्कमा पनि अपहरणकारी शेखले फिरौतीबापत ३ लाख २० हजार मागेका थिए । छोरा हराएपनि शर्फुलले भने प्रहरीलाई एक दिन ढिलो खबर गरेका थिए । सोमबार उनलाई छोरा जिम्मा लगाउदै डिएसपी थापाले भने–‘बच्चाको अभिभावक जिम्मेवार हुनुपर्छ, आफ्नो छोराछोरी हराएपछि समयमै प्रहरीमा खबर गर्नुपर्छ ।’