क्रिटिकल मास राइडमा बाल अभियन्ता

- December 27, 2013

धरान । भर्खर ९ बर्ष पाइला टेकेका सदिप राई साइकल चढ्न भनेपछि हुरुक्कै हुन्छन् । ग्रीनह्विल्स माउण्टेन बाइक शोरुम नजिकै घर भएका उनी स्कुल र होमवर्क सकेर हरदम साइकलमा साइक्लिष्टहरुसँगै हुन्छन् ।
अर्का, दश बर्षीय युप्फो लिम्बू र एघार बर्षीय युनिस भुषाल पनि धरानका फुच्चे साइक्लिष्ट हुन् । धरानलाई साइकल सिटि अभियानले गति लिन थालेपछि यी कलिलाहरुमा पनि साइकल मोह ह्वात्तै बढेको छ । साइकलप्रतिको रुचि देखेर उनीहरुलाई अभिभावकले पनि माउण्टेन बाइक किनिदिएका छन् । स्कुलबाहेक घरबाट बाहिर कतै निस्कनु पर्दा उनीहरु आफ्नै माउण्टेनबाइकमा निस्कन्छन् । यिनै फुच्चे साइक्लिष्टहरु शुक्रबार साइकल सिटि अभियानका दाजुदिदीहरुसँग माउण्टेन बाइकमा धरान बजारमा निस्किए । मास राइडमा १६ बर्षीय नेहा राई, १५ बर्ष मिकहाङमा लिम्बू, १६ बर्षीय नेहा श्रेष्ठ, अभिषेक सोनी, विकेक श्रेष्ठ, किरण राई, सन्तोष लिम्बू, कृष्ण केसी, विज्ञ नेपाललगायत सहभागी थिए ।

धरान साइकल सिटि अभियानको आयोजनामा प्रत्येक अंग्रेजी महिनाको अन्तिम शुक्रबार गर्वका साथ साइकल चढौं भन्ने नारा दिएर ‘क्रिटिकल मास राइड’ हुने गर्छ । यो राइडमा फुच्चे साइक्लिष्टहरुसँगै युवा र युवतीहरुको पनि सहभागीता बढ्दो छ । ‘साइकल प्रति सबै उमेर समुहको आर्कषण बढ्दो छ, तर सडक सुरक्षित नहुदा साइक्लिष्ट र अभिभावकहरु हच्किरहकेका छन्’–साइकल सिटि अभियन्ता हेम लिम्बूले भने । उनका अनुसार विश्वमा कुनै पनि योजना विना नै क्रिटिकल मास राइड स्वःफुर्तरुपमा प्रचलनमा आएको हो । यसको उद्देश्य प्ले कार्ड, नारा जुलुस र ब्यानर विना नै कुनै पनि बिषयको विरोध गर्नु हो । ‘साइकल आफैमा वातावरण मैत्री हो’–उनले थपे–‘साइकल लेन बनियोस्, वातावरण जोगाऊ, पेट्रोलियम पदार्थको उपयोगलाई घटाउ, स्वस्थ्य जीवन यापन गरौं भन्ने यसको उद्देश्य हो ।’
विश्वभर अंग्रेजी महिनाको अन्तिम शुक्रबार साँझमा ‘क्रिटिकल मास राइड’ हुने गरेको छ । सबैभन्दा पहिला सन् १९९२ मा अमेरिकाको सान फ्रान्सिस्कोमा २० जना साइक्लिष्टहरुले क्रिटिकल मास साइक्लिङको नाममा यो अभियान शुरुवात गरेका थिए । पछि, सन् २००३ मा विश्वका ३ सय शहरमा यो अभियान विस्तार भएको थियो । नेपालमा यसअघि यो अभियान काठमाण्डौंमा मात्रै थियो । धरानमा पनि साइकल सिटि अभियन्ताहरुले साइकल लेनको माग गर्दै आइरहेका छन् ।