पाँच जना जुनियर गल्फरलाई बिशेष छात्रवृत्ति

धरान । यहाँका पाँच जना जुनियर गल्फ खेलाडीहरुले निर्वाणा कन्टी क्लबको तीन महिनासम्म निःशुल्क सदस्या छात्रवृत्ति एवं प्रशिक्षणको अवसर पाएका छन् ।
जर्मन खेलाडी आन्द्रेइज फ्लेइसरको सहयोगमा एक साता प्रशिक्षण समापन गर्दै धरान गल्फ क्लबले शुक्रबार छात्रवृत्तिको घोषणा गरेको हो । क्लबले ती पाँच जुनियर खेलाडीहरुलाई निर्वाणा कन्टी क्लबको तीन महिनाको सदस्यता दिलाउनेछ र त्यसको सम्पुर्ण खर्च गल्फ क्लबले नै व्यहोर्नेछ । कन्ट्री क्लबको सदस्यता लिएर अथवा शुल्क तिरेर मात्रै गल्फ कोर्षमा खेल्न एवं अभ्यास गर्न पाइन्छ । छात्रवृत्ति पाएका खेलाडीहरुले तीन महिनासम्म निःशुल्क गल्फ कोर्षमा खेल्न पाउछनेछन् । गल्फरहरुले भने मासिक एघार सय सदस्यता शुल्क तिरीरहेका छन् । ‘तीन महिनासम्म छनौट भएका खेलाडीहरुलाई हामीले सदस्यता दिलाउछौं, त्यसको सबै खर्च हामीले नै व्यहोछौं’–गल्फ क्लबका अध्यक्ष पुर्ण लिम्बूले भने ।
छात्रवृत्ति पाउने खेलाडीहरुमा जेम्स बोर्डिङ स्कुलका छात्राद्धय निर्मला राई र सविता राई छिन् भने किरातेश्वर माविका छात्रद्धय विश्वराज लिम्बू, दिनेश लिम्बू छन् । यस्तै, सनराइज बोर्डिङ स्कुलका तुसाल कन्दङ्वाले पनि यो अवसर पाएका छन् । उनीहरुलाई हाल जर्मनमा प्रशिक्षक रहेका नेपालका प्रोफेसनल गल्फर सविन सापकोटाले प्रत्येक बुधबार बिशेष प्रशिक्षण पनि दिनेछन् । ‘म जनवरीसम्म यही रहन्छ, त्यसबेलासम्म बुधबार बुधबार म आफै उनीहरुलाई प्रशिक्षण दिनेछु’–प्रो.सापकोटाले भने ।

विगत १३ बर्षदेखि जर्मनीमा रहेर गल्फ प्रशिक्षण दिइरहेका सापकोटाकै पहलमा जुनियर खेलाडीहरुलाई एक साताको प्रशिक्षण सम्भव भएको थियो । उनीसँग प्रशिक्षण लिइरहेका जर्मन गल्फर आन्द्रेइसले अन्य मुलुकमा सहयोग गरिरहेको थाह पाएपछि नेपालमा पनि गल्फ खेलको विकासमा सहयोग गर्न आग्रह गरे । उनको आग्रह वमोजिम आन्द्रेइसले ३ सय युरो सहयोग पठाइदिए । ‘यो शुरुवात मात्रै हो, प्रत्येक बर्ष यस्तै ट्रेनिङ गराउनको लागि जर्मनमा पहल गरिरहन्छु’–उनले भने । एक साताको प्रशिक्षणमा धरान क्षेत्रका २० बर्षमुनिका २८ जना विद्यार्थी एवं किसोरकिसोरीहरु सहभागी भएका थिए ।