सुर्यप्रसादको टिमलाई प्रो-एम उपाधि

धरान । सुर्य नेपाल इष्टर्न ओपन टुर्नामेन्ट २०१३ अन्र्तगतको प्रो–एम स्पर्धाको उपाधि व्यावसायिक खेलाडी सुर्यप्रसाद शर्माको टिमले जितेको छ ।
निर्वाणा कन्ट्री क्लबस्थित पार ७० को गल्फ कोर्षमा पाँचौ दिन भएको प्रो–एम स्पर्धामा १२ अण्डर ५८ स्कोर गर्दै शर्माको टिमले उपाधि जितेको हो । व्यावसायिक खेलाडी शर्माको टिममा एमेच्योर खेलाडीहरु अंशु लिम्बू, सुवर्ण लिम्बू र प्रताप लिम्बू थिए । स्ट्रोक प्ले स्क्राम्बल आधारमा खेलमा विजेता टिमले फ्रन्ट नाइनमा ६ अण्डर २९ र ब्याक नाइनमा पनि ६ अण्डर २९ को कार्ड बनाएका थिए ।
यसैगरी, प्रतियोगितामा ११ अण्डर ५९ स्कोर गर्दै व्यावसायिक खेलाडी दिपक थापा मगरको टिम उपविजेता भयो । यो टिमले फ्रन्ट नाइनमा ४ अण्डर ३१ र ब्याक नाइनमा ७ अण्डर २८ को कार्ड बनाएको थियो । उपविजेता टिममा व्यावसायिक खेलाडी थापासँगै एमेच्योरहरु काजी राई, तिलक राई र अशोक लिम्बू थिए । यस्तै, स्पर्धामा १० अण्डर ६० स्कोर खेल्दै स्थानीय व्यावसायिक खेलाडी देवराज पाख्रिनको टिम तेस्रो भएको थियो । अन्य थप तीन व्यावसायीक खेलाडीको टिमले पनि समान स्कोर गरेपनि ब्याक नाईनमा ‘अन्तिम ६ होल काउन्ट’को आधारमा पाख्रिनको टिम तेस्रो घोषित भएको हो ।
तेस्रो भएको टिमले फ्रन्ट नाइनमा ४ अण्डर ३१ र ब्याक नाइनमा ६ अण्डर २९ को कार्ड बनाएको थियो । यो टिममा व्यावसायिक खेलाडी पाख्रिनसँग एमेच्योर खेलाडीहरु भुवन गुरुङ, राम तामाङ र राजकुमार राई थिए । सो स्पर्धामा लङ्गेष्ट ड्राइभको पुरस्कार नेपाल प्रहरीका वरीष्ठ प्रहरी उपरीक्षक(एसएसपी) राजेन्द्र श्रेष्ठ र क्लोष्जेट टु दि पिनको पुरस्कार बिक्रम परियारले हात पारेका थिए । विजेता खेलाडीहरुलाई बीपी कोइराला स्वास्थ्य विज्ञान प्रतिष्ठानका उपकुलपति डा.बीपी दास, नगरपालिकाका प्रशासकीय अधिकृत गणेशप्रसाद खतिवडा, एसएसपीद्धय यादवराज खनाल, राजेन्द्र श्रेष्ठ र नेपाली सेनाको इटहरीस्थित पूर्वीपृतनाका कर्णेल सुरेश बाँनियाले पुरस्कार वितरण गरेका थिए ।
मैत्रीपुर्ण प्रो–एम खेल भएकोले विजेता एमेच्योर खेलाडीहरुलाई मात्रै ट्रफी वितरण गरिएको आयोजक नेपाल प्रोफेसनल गल्फर एशोसिएशनले जनाएको छ । प्रो–एम स्पर्धामा एघार जना व्यावसायिक खेलाडीहरुको नेतृत्वमा ३३ एमेच्योरहरुले भाग लिएका थिए । प्रतियोगिताको चार दिनको मुख्य स्पर्धामा भने शनिबार नेपालका दोस्रो वरियताका खेलाडी रवि खड्काले उपाधि जितिसकेका थिए ।