एउटै नम्बरको थुप्रै जाली नोट, एक पक्राउ

धरान । भारतमा रहेकी श्रीमतिलाई पैसा पठाउन बैंक पुगेका संखुवासभाका एक व्यक्ति नक्कली(जाली) नोटसहित समातिएका छन् ।
संखुवासभा चेपुवा गाविस ८ का सनम टासी भोटे जाली नोटसहित धरानमा समातिएका हुन् । उनको साथबाट दुई लाख रुपैया पनि वरामद भएको छ । जसमध्ये ७४ हजार रुपैया नक्कली भएको प्रहरीले जनाएको छ । जाली नोट भएको वण्डिलमा भने एउटै नम्बर भएको हजार र पाँच सयको ५ वटा भन्दा बढी नोट भेटिएको छ ।मंगलबार धरानस्थित सनराइज बैंकबाट समातिएका भोटेलाई इलाका प्रहरी कार्यालयले बुधबार जालीनोटसहित सार्वजनिक गर्यो ।
भारतको खर्साङमा रहेकी श्रीमति खुदा भोटेलाई पैसा पठाउन मंगलबार सनराइज बैंकमा पुगेका भोटेलाई प्रहरीले त्यहीबाट पक्राउ गरेको हो । बैंकका कर्मचारीले शंका लागेर प्रहरीलाई खबर दिएका थिए । भोटेको साथबाट वरामद भएको एक हजारको ५० थान(५० हजार) र ५ सयको ४८ थान(२४ हजार) गरी कुल ७४ हजार जाली नोट फेला परेको डिएसपी सञ्जयसिंह थापाले जानकारी दिए । भोटे जाली नोटसहित समातिएपनि मुख्य कारोबारी भने अरु नै भएको प्रारम्भिक अनुसन्धानबाट खुलेको र खोजी भइरहेको डिएसपी थापाले बताए ।
‘उनको वयानबाट मुख्य कारोबारी अरु नै देखिन्छन्, खोजी शुरु गरिसकेका छौं’–डिएसपी थापाले भने–‘खोटा चलन(जाली नोट)अन्र्तगत मुद्दा दर्ता गरेर कार्वाही प्रक्रिया अघि बढाउछौं ।’ प्रहरीका अनुसार भोटे आफ्नी करिब तीन बर्षको छोरीलाई उपचार गराउन बीपी कोइराला स्वास्थ्य विज्ञान प्रतिष्ठान आएका थिए । उनी धरान आउदा गाउँबाट पैसा सापटी लिएर आएको वयान दिएकाले मुख्य कारोबारी अरु नै भएको अनुमान गर्दै प्रहरीले खोजी शुरु गरिसकेको जनाएको छ ।
पक्राउ परेका भोटे नेपाली(पर्वते) भाषा राम्रो बुझ्न र बोल्न सक्दैनन् । उनको साथबाट एक हजारको नोटको एक बण्डिल र पाँच सयको नोटको दुई वण्डिल नोट फेला परेको थियो । त्यसमध्ये पाँच सयको एक वण्डिल भने सक्कली नोट भएको प्रहरीले जनाएको छ । जाली नोट भएको वण्डिलमा भने एउटै नम्बर भएको हजार र पाँच सयको ५ वटा भन्दा बढी नोट भेटिएको प्रहरी निरीक्षक मुकुन्द रिजालले जानकारी दिए ।