साविक विजेता रवि खड्का शीर्षस्थानमा

धरान । साविक विजेता रवि खड्का सुर्य नेपाल इष्टर्न ओपन गल्फ प्रतियोगिता २०१३ को तेस्रो दिन ५४ होलको खेल सकिदा कुल ३ ओभर २१३ स्कोरका साथ शीर्षस्थानमा रहन सफल भएका छन् ।
पार ७० को निर्वाणा कन्टी क्लब कोर्षमा ७ ओभर १४७ स्कोरका साथ नवौं स्थानमा रहेर खेल शुरु गरेका उनले लय समाउदै शुक्रबार ४ अण्डर ६६ को उत्कृष्ट कार्ड बनाए । फ्रन्ट नाइनमा एक बर्डि र एक बुगी खेप्दै इभन पार ३५ खेलेका खड्काले ब्याक नाइनमा ४ बर्डिज खेल्दै स्ट्रोक जोगाउदै शीर्ष स्थानमा उक्लिएका हुन् । खड्काले फ्रन्ट नाइनमा दोस्रो होलमा बर्डि खेल्दै स्ट्रोक जोगाएपनि सातैं होलमा बुगी खेल्दै स्ट्रोक खेर फालेका थिए ।
ब्याक नाइनमा भने राम्रो खेल्दै उनले चार वटा होलमा बर्डिज गरे । खड्काले १० औं, १२ औं, १३ औं र १४ औं होलमा बर्डि गर्दै स्ट्रोक जोगाए । शीर्षस्थानमा उक्लिएका खड्काले तेस्रो दिन पटिङले साथ दिएको प्रतिक्रिया दिए । ‘ब्याक नाइनमा ४ अण्डर खेले, पटिङ एकदमै राम्रो भयो’–खड्काले भने–‘अन्तिम दिन पनि राम्रो नै खेल्छु ।’ खड्काले पहिलो दिन १ ओभर ७१ को कार्ड बनाएका थिए भने ६ ओभर ७६ को कार्ड बनाएका थिए ।
यस्तै, कुल ५ ओभर २१५ स्कोरका साथ धरानका सुमन राई र उमेश नगरकोटी संयुक्तरुपमा दुई स्ट्रोकले पछि पर्दै दोस्रो स्थानमा छन् । तेस्रो दिनको खेल ४ ओभर १४४ स्कोरको साथ दोस्रो स्थानमा रहेर खेल शुरु गरेका सुमनले शुक्रबार १ ओभर ७१ के कार्ड बनाएका थिए । फ्रन्ट नाईनमा ३ बर्डिज र एक बुगी खेल्दै २ अण्डर ६८ को कार्ड बनाएपनि ब्याक नाईनमा भने समुनले ३ बुगी खेप्दै ३ ओभर ३८ को खराब कार्ड बनाएर शीर्षस्थानमा उक्लिन सकेनन् । उनले पहिलो दिन १ ओभर ७१ र दोस्रो दिन ३ ओभर ७३ को कार्ड बनाएका थिए ।
यसैगरि, ५ ओभर १४५ स्कोरका साथ शुक्रबार तेस्रो स्थानमा रहेर खेल शुरु गरेका उमेश नगरकोटीले लेभर पार ७० को कार्ड बनाएर दोस्रो स्थानमा उक्लिए । फ्रन्ट नाईनमा उनले दुई बर्डि र दुई बुगी खेल्दै इभन पार ३५ को कार्ड बनाए । ब्याक नाइनमा १३ र १४ औं होलमा बर्डिज खेल्दै स्ट्रोक जोगाए पनि १६ औं होलमा डबल बुगी खेल्दै स्ट्रोक खेर फाले । नगरकोटीले पहिलो दिन ६ ओभर ७६ र दोस्रो दिन एक अण्डर ६९ को कार्ड बनाएका थिए ।
दोस्रो दिनको खेल सकिदा एक्लो अग्रता बनाएका स्थानीय व्यावसायिक गल्फर देवराज पाख्रिन र रमेश अधिकारी कुल ७ ओभर २१७ स्कोरका साथ संयुक्तरुपमा चौथो स्थानमा छन् । तेस्रो दिन ३ ओभर १४३ स्कोरका साथ पहिलो स्थानमा रहेर खेल शुरु गरेका पाख्रिनले शुक्रबार ४ ओभर ७४ को कार्ड बनाउदै शीर्षस्थान गुमाए । उनले फ्रन्ट नाईनमा दुई बर्डि र दुई बुगीका साथ इभन पार ३५ को कार्ड बनाएपनि ब्याक नाइनमा भने ४ बुगी खेप्दै ४ ओभर ३९ को कार्ड बनाए । यस्तै, ९ ओभर १४९ स्कोरका साथ दशौं स्थानमा रहेर खेल शुरु गरेका अधिकारीले २ अण्डर ६८ को कार्ड बनाउदै चौथो स्थानमा उक्लिए । उनले फ्रन्ट नाइनमा एक बर्डि र एक बुगी खेल्दै इभन पर ३५ को कार्ड बनाए भने ब्याक नाइनमा दुई बर्डिज खेल्दै दुई अण्डर ३३ को कार्ड बनाए ।
प्रतियोगितामा तेस्रो दिनको खेल सकिदासम्म कुल १० ओभर २१० स्कोरका साथ स्थानीय व्यावसायिक गल्फर सविन सापकोटा, थामबहादुर राई, राम थापा, दिपक थापा मगर र मणी राई संयुक्तरुपमा छैटौं स्थानमा छन् । शुक्रबार सविनले ५ ओभर ७५ को कार्ड बनाए भने थामबहादुरले ४ ओभर ७४, राम थापाले ४ ओभर ७४, दिपक थापामगरले ४ ओभर ७४ र मणी राईले १ ओभर ७१ को कार्ड बनाए ।
यस्तै, कुल ११ ओभर २२१ स्कोरका साथ धन थापा ११ औं स्थानमा छन् भने १२ ओभर २२२ स्कोरका साथ संजय लामा १२ औं स्थानमा छन् । यसैगरि, एमेच्योरतर्फ भने दिनेश प्रजापति कुल ११ ओभर २२१ स्कोरका पहिलो स्थानमा छन् भने बबिन्द्र राई १३ ओभर २२३ स्कोरका साथ दोस्रो र धरानका पुर्ण राई १९ ओभर १२९ स्कोरका साथ तेस्रो स्थानमा छन् ।

साविक विजेता रवि खड्का बंकरबाट सट प्रहार गरेपछि वल नियाल्दै ।