इष्र्टन ओपनमा पहिलो दिन पाँच खेलाडी अग्रस्थानमा
धरान । सुर्य नेपाल इष्टर्न ओपन गल्फ प्रतियोगिताको पहिलो दिन १८ होलको खेल सकिदा समान अंकका साथ पाँच खेलाडी शिर्षस्थानमा रहेका छन् ।निर्वाणा कन्ट्री क्लबस्थित पार ७० को कोर्षमा साविक विजेता रवि खड्का सहित स्थानीय गल्फर सुमन राई, रमेश अधिकारी, दिपक थापा मगर र सञ्जय लामा समान एक ओभर ७१ स्कोरका साथ संयुक्तरुपमा अग्रता कायम राखेका छन् । साविक विजेता खड्काले फ्रन्ट नाइनमा ३ बुगी र एक मात्र बर्डी खेले । फ्रन्ट नाइनमा उनले पहिलो होलमा बुगी खेपे पनि दोस्रो होलमा बर्डी खेलेका थिए । यस्तै, चौथो र नवौं होलमा पनि उनले बुगी खेप्दै फ्रन्ट नाइनमा २ ओभर ३७ को कार्ड बनाए । ब्याक नाइनमा पनि १० औं होलमा पनि बुगी खेलेर शुरुवात गरेका खड्काले १३ औं होलमा पनि बुगी खेपे । तर, १२ औं, १४ औं र १७ औं होलमा बर्डी खेल्दै खड्काले ब्याक नाइन १ अण्डर ३४ को कार्ड बनाएका थिए ।
यसैगरि, स्थानीय गल्फर सुमन राईले फ्रन्ट नाइन इभन पारको बार्ड बनाउदै एक बर्डी र एक बुगी खेले । उनले पहिलो होलमा बुगी खेपेका थिए भने ५ औं होलमा बर्डी खेलेका थिए । ब्याक नाइनमा भने सुमनले २ बर्डी र ३ बुगीको खेलेर एक ओभर ३६ को कार्ड बनाए । उनले १० औं, १५ औं र १७ औं होलमा बुगी खेपे भने १४ औं र १८ औं होलमा मात्रै बर्डी खेले । यस्तै, अग्रस्थानमा रहेका रमेश अधिकारीले फ्रन्ट नाइनमा २ बुगी र एक बर्डी खेल्दै एक अण्डर ३४ को कार्ड बनाएका थिए । उनले पहिलो र दोस्रो होलमा बर्डी खेलेका थिए भने चौथो होलमा बुगी खेपेका थिए । यस्तै, ब्याक नाइनमा २ ओभर ३७ को कार्ड बनाउने क्रममा उनले १३ औं, १४ औं र १७ औं होलमा बुगी खेपे भने १२ होलमा मात्रै बर्डी खेले ।
यसैगरि, समान २ ओभर ७२ स्कोर बनाएका सविन सापकोटा र राम थापा संयुक्तरुपमा छैटौ स्थानमा छन् भने समान ४ ओभर ७४ स्कोर गरेका थामबहादुर राई र मणि राई संयुक्तरुपमा आठौं स्थानमा छन् । यस्तै, समान ५ ओभर ७५ स्कोर गरेका रामकृष्ण श्रेष्ठ र देवराज पाख्रिन समान १० औं स्थानमा छन् । एमेच्योरतर्फ भने पहिलो दिन ५ ओभर ७५ को कार्ड बनाएका बबिन्द्र राई अग्रस्थानमा छन् भने ७ ओभर ७७ स्कोरको कार्ड बनाएका दिनेश प्रजापति पहिलो दिनको खेल सकिदा दोस्रो स्थानमा र ८ ओभर ७८ को कार्ड बनाएका पुर्ण लिम्बू एमेच्योरतर्फ तेस्रो स्थानमा छन् ।
कुल ५ लाख १४ हजार २ सय ५० रुपैया पुरस्कार राशी रहेको प्रतियोगितामा २८ जना प्रोफेसनल र १९ जना एमेच्योर खेलाडीहरुले भाग लिएको छ । दोस्रो दिनको खेल प्रर्दशनको आधारमा उत्कृष्ट २१ मा पर्ने गल्फरहरुले मात्रै तेस्रो र चौथो दिनको खेल खेल्न पाउनेछन् । प्रतियोगिताको विजेताले ९५ हजार पाउनेछन् भने दोस्रो र तेस्रो हुने खेलाडीले क्रमशः ६० हजार र ४४ हजार हात पार्नेछन् । प्रतियोगिताको २१ औं स्थानसम्म रहने खेलाडीहरुले नगद पुरस्कार पाउने आयोजन नेपाल प्रोफेस्नल गल्फ एशोसिएशनले जनाएको छ ।
Comments
Post a Comment