भेडेटारमा भेडाको मुर्तिसहित भ्यु टावर बन्ने

धरान । पुर्वको प्रसिद्ध पर्यटकीयस्थल भेडेटारको पहिचान झल्काउने गरी शैलुङ्ग डाँडामा भेडाको मुर्तिसहित नयाँ भ्यु टावर निर्माण हुने भएको छ । स्थानीयबासी, भेडेटार होटल एशोसिएशनको पहलमा जिविस धनकुटा र झापाको काकडभिट्टास्थित पर्यटन कार्यालयले भेडेटारको पहिचान झल्कने टावर निर्माण गर्न लागेको हो । नयाँ निर्माण हुने भएपछि दुई पटकको भुकम्पले क्षतिग्रस्त भएको भ्यु टावर भत्काउन थालिएको छ ।
नयाँ टावर निर्माण गर्न भुवनबहादुर लिम्बुको अध्यक्षतामा भेडेटार भ्यु टावर निर्माण समिति गठन भइसकेको छ । अध्यक्ष लिम्बुका अनुसार कलात्मक हुने भनिएको नयाँ टावरको निर्माण लागत ५३ लाख हुने अनुमान छ । पर्यटन कार्यालयबाट १४ लाख र जिविसले १२ लाख बजेट बिनियोजन गरिसकेको छ भने आगामी आर्थिक बर्षमा पनि निरन्तरता दिने आश्वासन पाएको उनले बताए । ‘भ्यु टावर कस्तो बनाउने भनेर वृहत छलफल गर्यौ, भेडेटारको पहिचान झल्काउने भएकोले भेडाको मुर्तिसहितको टावर बनाउनेमा सहमति जुट्यो’–निर्माण समिति अध्यक्ष लिम्बुले भने । साउन १५ सम्म काम सक्ने लक्ष्य रहेको उनले बताए ।
टावर निर्माणमा स्थानीयको २० प्रतिशत जनश्रमदान पनि हुनेछ । भेडेटारको आधा भाग धरान(सुनसरी)मा पनि पर्ने भएकोले धरान उपमहानगरपालिका र जिविस सुनसरीसँग छलफल भएको थियो । बजेट के कति विनियोजन गर्ने भनेर ती निकायले सुनिश्चित भने गरेको छैन । भुकम्पले क्षतिग्रस्त टावरमा भेडाको मुर्ति बनाउने प्रस्ताव कलाकार एवं होटल व्यावसायी रोजन राईले गरेका थिए । त्यसैमा सबैको सहमति जुटेको थियो । प्राविधिकहरुले धेरै अग्लो भ्यु टावर बनाउन नहुने सुझाव दिएअनुसार पुरानो भन्दा २ तला होचो तर कलात्मक टावर निर्माण गरिने धनकुटाका स्थानीय विकास अधिकारी गणेश दाहालले बताए । ‘भ्यु टावर निर्माणसँगै शैलुङ्ग डाँडालाई गार्डेनिक बनाइन्छ, डाँडा आफैमा पनि सिंगो टावर जस्तो छ । त्यहाँ फुल रोप्छौं, सिंगाछौं र कलात्मक बनाउछौं’–उनले भने ।
जिविस धनकुटाका इञ्जिनियर धनबहादुर मिजारका अनुसार एक तलाको भुईतला रहन्छ । त्यो माथि १५ फिट उचाइको माथिल्लो तलाको लेभल रहन्छ । त्यसमाथि ५ मिटर(१६ फुट) उचाईको भेडा उभिएर बस्छ । ‘भेडा राख्ने फ्लोरसम्म पुगेर वरीपरि अवलोकन गर्नसक्ने डिजाइन छ । भेडा राखिएको ठाउँमा रेलिङ दिन्छौं’–इञ्जिनियर मिजारले भने । नयाँ कलात्मक टावर निर्माण हुने भएपछि स्थानीय पर्यटक व्यावासायीहरु पनि उत्साहीत छन् । टावरको आकर्षणले आन्तरिक तथा बाह्य पर्यटकहरु २० प्रतिशतले वृद्धि हुने उनीहरुको अपेक्षा छ भने टावरबाट मात्रै बार्षिक १२ लाख आम्दानी हुने अनुमान गरिएको निर्माण समितिका अध्यक्ष लिम्बुले बताए ।

उहिल्यै भेडेटारसम्म भोजपुर, संखुवासभा, तेह्रथुमलगायत हिमाली पहाडी क्षेत्रबाट मानिसहरु भेडा चराउदै आएर बास बस्ने गरेको बुढापाका एवं जानकारहरु बताउछन् । दुई तीन सयको भेडाको हुल लिएर मानिसहरु आउथे । त्यही हप्ता दश दिनसम्म बसेर भेडाको ऊन कात्थे अनि भेडालाई नै बोकाएर धरान बिक्री गर्न झार्थे । धरानबाट नुन, तेललगायत आवश्यक वस्तु किनेर उनीहरु फर्कन्थे । भेडेटारस्थित शैलुङ्ग डाँडामा बेलायतका युवराज चाल्र्सले समेत पाइला टेकेपछि चाल्र्स प्वाइन्टको नामले डाँडा प्रख्यात भयो । डाँडामा ०५७ सालमा ४ तले भ्यु टावर निर्माण भएको थियो । टावरलाई ०६७ साल र गत बैशाख १२ को भुकम्पले पुनः क्षतिग्रस्त बनाएपछि चढ्न निषेध गरिएको थियो । घुम्न आउने पर्यटकहरु टावर चढेर बादल र भेडेटार बजारले लुकामारी खेलेको दृष्य हेर्न लालयित हुन्छन् ।