एमाले धरानको सातौं अधिवेशनः सर्वसम्मतको सम्भावना न्युन
धरान । नेकपा एमाले धरान उपमहानगर बिशेष इलाका संगठन कमिटि धरानको ७ औं नगर अधिवेशन शुक्रबारदेखि शुरु हुदैछ । धरानको भानुचौक हुने अधिवेशनको उद्घाटन एमाले अध्यक्ष एवं प्रधानमन्त्री केपी शर्मा ओलीले गर्नेछन् । बिहिबार पत्रकार सम्मेलन गर्दै एमालेले अधिवेशनको सम्पुर्ण तयारी पुरा भइसकेको एमालेले जनाएको छ ।
अधिवेशन तयारीमा सम्पुर्ण पार्टी पंक्ति परिचालन गरिएको जनाउदै एमाले अध्यक्ष तारा सुब्बाले उद्घाटन समारोहमा १५ हजार जनताको सहभागीता हुने बताए । अधिवेशनको उद्घाटन सत्र भानुचोकमा भएपनि बन्दसत्र भने दिउँसो ४ बजेपछि सदन सभा हलमा हुनेछ । प्रत्येक वडाबाट ब्यानरसहित जुलुस निस्केर भानुचौकमा सभामा परिणत हुनेछ । दुई दिने अधिवेशनको बन्दसत्रबाट धरानमा एमालेको ६१ सदस्यीय नयाँ नेतृत्व चयन पनि हुनेछ ।
अधिवेशनको पुर्वसन्ध्यामा दुई पटक नेतृत्व हाँकिसकेका सुब्बाले अध्यक्ष पदमा खुलेर आकाक्षी देखिएका छन् । तर, सर्वसम्मत हुने सम्भावना भने न्युन छ । मदन भण्डारी फाउण्डेशनका जिल्ला सचिवसमेत रहेका ब्लाष्ट टाइम्सका सम्पादक÷प्रकाशक किसोरकुमार कार्कीको पनि अध्यक्षमा उम्मेद्वारी दिने चर्चा छ । स्वयम कार्कीले पनि यो चर्चालाई नकार्न सकेनन् । ‘पार्टीमा सक्रियरुपमा थिएँ, त्यसैले नेतृत्वमा जाने सम्भावना रहन पनि सक्छ । त्यसैले चर्चा भएको हो’–उनले भने–‘अब नेतृत्वमा जानुपर्छ भन्ने मानसिकता बनाएको छुँ, साथीहरुसँग छलफल हुदैछ रुचाइयो भने जानुपर्छ ।’ तर, उनी यसअघि कमिटिमा सदस्य पनि नभएकोले सिधै अध्यक्ष पदमा उठ्न नपाउने पनि मत छ ।
अधिवेशन आयोजक कमिटि ८४ जनाको छ । तर, अधिवेशनबाट ६१ जनाको मात्रै कमिटि चयन हुने भएकोले नेतृत्वलाई सहमति जुटाउन कठिन हुनेछ । हाल उपाध्यक्षमा नारायण सुवेदी, सचिवमा राजमणी निरौला र उपसचिवमा धनप्रसाद राई छन् । सचिव निरौलाले पनि नेतृत्वलाई निरन्तरता दिने कि परिवर्तन गर्ने भन्ने निर्णय वन्दसत्रबाट हुने बताए । ‘नेतृत्वलाई निरन्तरता दिलाउने कि परिवर्तन गर्ने भन्ने निर्णय बन्दसत्रको हो, हामीले भनेर हुदैन’–उनले भने । धरानमा ओली पक्ष कमजोर मानिन्छ । तर, यसपटक भने ओली पक्षले अध्यक्ष, सचिवलगायत पद र सदस्यहरुमा पनि उम्मेद्वारी उठाउने आन्तरिक तयारी गरिरहेको स्रोत बताउछ । सचिवालय सदस्य हर्कजंग एभेङ सचिव वा उपसचिव मध्ये एक पदका आकांक्षी छन् । ‘दुई मध्ये एक पदमा उम्मेदवारी दिन्छु, यो पटक सर्वसम्मत कुनै पनि हालतमा हुदैन’–उनले भने–‘तीन बर्षमा धेरै जनाले क्षमता विकास गरेका छन्, नयाँ आंकक्षीहरु पनि छन् । ती सबैलाई कसरी अटाउने ? सर्वसम्मत हुदैन ।’सदस्य पदमा आकांक्षीहरु अधिकांश युवाहरु छन् । सदस्यमा शेरबहादुर परियार, नवराज राई, सुवास पौडेल, हिमाल लिम्बु, विद्यार्थी नेता टिका माङले, सन्तोष कोइराला, सुसिल सुवेदी, लक्ष्मी बाँनिया, राजेन्द्र राई, ठाकुर कार्की, दिवस राईलगायत आकांक्षी भएको एक नेताले बताए । विधानले ३५ सदस्यीय कमिटि बनाउने व्यवस्था गरेपनि अधिवेशनबाट ६१ सदस्यीय चयन हुने अध्यक्ष सुब्बाले बताए । माथिल्लो कमिटिबाट स्वीकृति लिएर सदस्य संख्या बढाउन मिल्ने प्रावधान रहेको छ ।
अधिवेशनको लागि बैशाख १३ गते सबै शाखा कमिटिहरुबाट सर्वसम्मत प्रतिनिधि चयन भइसकेको छ । खुलातर्फ ३ बराबार एक जना र महिला तथा दलितमा २ जना बराबर एक जना गरी ३ सय ७४ प्रतिनिधि चयन भएका छन् । विधान वमोजिम छनौट भएका प्रतिनिधिको संख्याको ५ प्रतिशित मनोनयन गर्न पाउने व्यवस्थाअनुसार थप १९ जना मनोनयन गरिएको पनि एमालेले जनाएको छ । ती प्रतिनिधिमध्ये १ सय ६२ महिला र ३७ दलित छन् । उद्घाटन सत्रमा विभिन्न क्षेत्रमा बिशेष योगदान पुर्याएका ७ व्यक्तिहरुलाई सम्मान पनि गरिनेछ ।
Comments
Post a Comment