बास्केटवलमा इलाम विजयी(फोटोफिचर)

धरान । बैशाख १२ गतेको भुकम्पमा परी ज्यान गुमाएकाहरुप्रति समर्पित भई सञ्चालन भएको दुई दिने मैत्रीपुर्ण बास्केटवल खेलमा सोमबार इलाम जिल्ला विजयी भएको छ । धरान १८ स्थित डिपो आदर्श बहुमुखी क्याम्पसको बास्केटवल कोर्टमा सोमबार भएको खेलमा इलामले मोरङ जिल्लाई ६८ – ४८ स्कोरले हरायो ।
इलामले पहिलो क्वार्टरमा मोरङलाई २१–१० ले पछि पार्दै अग्रता लिए पनि दोस्रो क्वार्टरमा मोरङले ६ –१० को अग्रता लिदै स्कोर अन्तर घटाएको थियो । तेस्रो क्वार्टरमा पनि मोरङले इलामविरुद्ध १७–१५ स्कोरले अग्रता लिएको थियो । तर, अन्तिम क्वार्टरमा इलामले मोरङविरुद्ध २१–१२ स्कोर गर्दै जित सुनिश्चित गर्यो । खेलमा इलामका विनोद श्रेष्ठले सर्वाधिक २७ स्कोर गरेका थिए भने मोरङका दिवस राईले सर्वाधिक २४ स्कोर गरे ।

दुई दिने मैत्रीपुर्ण खेलको समापनमा सहभागी जिल्लाका खेलाडीहरुलाई आयोजकले प्रमाणपत्र तथा टिमलाई मायाको चिनो प्रदान गरेको थियो । खेलाडीहरुलाई नेपाल बास्केटवल संघका केन्द्रीय सदस्य सुरज लामा, जिल्ला संघका अध्यक्ष सुधिर लिम्बुलगायतले प्रमाण पत्र तथा मायाको चिनो प्रदान गरे । सुनसरी बास्केटवल संघको आयोजना तथा धरान बास्केटवल संघको व्यावस्थापनमा आइतबार र सोमबार मैत्रीपुर्ण खेल भएको थियो । खेलमा सुनसरी, मोरङ र इलाम जिल्ला सहभागी थियो । आइतबार भएको मैत्रीपुर्ण उद्घाटन खेलमा सुनसरीले इलामलाई हराएको थियो ।