गोर्खा ट्रेलको प्रर्वद्धनमा भुपु लाहुरेहरु(फोटोफिचर)
झण्डी डाँडालाई गन्तव्य बनाएर पदमार्ग पहिल्याउने योजना करिब तीन बर्षअघिदेखिको हो । गोर्खा स्मृति पार्कका परिकल्पनाकार एवं भुपु लाहुरे रमेश राईका अनुसार पार्क घुम्न आउने पर्यटकहरुलाई पदयात्रामा लैजाने सोचअनुसार पदमार्गको खोजी गरिएको हो । उनको अवधारणाअनुसार झण्डी डाँडा मात्रै पदयात्राको अन्तिम गन्तव्य होइन । त्यहाँबाट भेडेटार पुर्वको टाकुरे डाँडासम्म पदमार्ग रुट बनाउने उनको भावी योजना छ । ‘पर्यटकलाई पार्कमा बास गराउने र पदयात्रामा लैजाने सोचअनुसार यो गोर्खा ट्रेल तयार भएको हो । भर्जिन रुट भएकोले केही अफ्ठ्यारो पनि छ’–राईले भने–‘यो टे«ल पुरा भयो भने धरान र आसपासको क्षेत्रको विकासको ढोका खुल्छ भन्ने लाग्छ ।’
स्थानीय एवं पुर्व गाविस अध्यक्ष मणीराम राईका अनुसार झण्डी डाँडाबाट आकाश खुलेको बिहान सगरमाथा, मकालु हिमश्रृंखलासँगै सोलु, संखुवासभा, भोजपुर, उदयपुर र खोटाङ्ग जिल्लाको संगमस्थल सिलीचुङ्गसमेत देखिन्छ । तराई फाँट र सप्तकोशीको मनोरम दृष्य देखिन्छ । मिति यकिन नभएपनि यो डाँडामा उहिल्यै अनुसन्धानको क्रममा गोराहरु आएर फलामे पिलरमा झण्डा गाडेकोले नाम झण्डी डाँडा भएको राईले सुनाए । ‘एक दशकसम्म झण्डा थियो, २ जना त हेरालु नै थियो’–उनले भने–‘विकास गर्न सकियो भने यो ठाउँ रमणीय पर्यटकीयस्थल बन्छ । यहाँ धेरै जडिबुटीहरु पनि छ, जैविक विविधताले पनि धनी ठाउँ हो ।’..............................................
परिचय फेर्दै भुपु लाहुरेहरु
एक समय थियो, भुपु ब्रिटिश लाहुरेलाई ‘जवानी विदेशमा विताउने र पेन्सन थाप्न आफ्नो देशमा आउने’ व्यक्तिकोरुपमा चित्रण गरिन्थ्यो । आवासिय भिषा पाउने भएपछि पेन्सन पकाएका भुपु लाहुरेहरु फेरी बेलायत जाने लर्को लाग्यो । आफ्नै देश पनि उनीहरुलाई विरानो झै बन्यो ।अपवादमा लाहुरेको शहर भनिएको धरानमा केही यस्ता भुपु ब्रिटिशि लाहुरेहरु पनि छन् । जसलाई आवासिय भिषा र बेलायतको मोहले तानेन । उनीहरु आफ्नै ठाउँमा बस्न रमाएका मात्र छैनन्, यहाँको विकास निर्माणमा पनि अहोरात्र जुटेका छन् । लाहुरेहरु पैसा र सुखको पछि मात्र दौडन्छन् भन्ने समाजको हेराईलाई परिवर्तन गर्न उनीहरु हरदम तल्लिन छन् । धरानमा १० हजार घरधुरी भुपु लाहुरेको बसोबास भएको अनुमान छ । ती मध्ये ७५ प्रतिशत बेलायत गइसकेका छन् । बाँकी २५ प्रतिशत भुपु लाहुरेहरुमध्ये अधिकांश समाजसेवामा छन् ।
भुपु लाहुरेहरुले धरानको पश्चिाउत्तरी कन्येभिर(डाडा) हुदै झण्डी डाँडासम्मको नयाँ गोर्खा ट्रेल(पदयात्रा)को पहिचान गरेर ग्रामिण पर्यटनलाई गति दिन खोजीरहेका छन् । त्यसो त विष्णुपादुका धरान उपमहानगरपालिकामा गाभिनुअघि नै ०६५ सालदेखि धरानका भुपु लाहुरेहरुले माछामारा डाँडामा गोर्खालीको इतिहास निर्माणसँगै पर्यटन विकासको महत्वकांक्षी योजना अघि बढाइरहेका थिए । करिब १२ बिघा जमिन खरीद गरेर उनीहरुले ब्रिटिश गोर्खा स्मृति पार्क निर्माण थालेदेखि नै माछामारा डाँडा र भञ्ज्याङ सर्वत्र चर्चामा छ । त्यहाँ घुम्न पुग्नेहरुको संख्या बढेको छ भने स्थानीय होटल, पसलहरुमा कारोबार पनि वद्धि भएको छ । ‘हामीले आयमुलक काम गरेका होइनौं, पार्क बनाउनुमा हाम्रो पुर्खाहरुको इतिहासलाई जोगाउदै अध्ययनथलो बनाउनु र यो क्षेत्रमा पर्यटनको विकास गर्नु नै हो’–पार्कमा सल्लाहकार गजेन्द्र इस्पो भन्छन् –‘धरानलाई बस्न मात्रै होइन, पर्यटकीय शहर बनाउन पनि हामी लागिपरेको हो ।’ पार्कमा हाल आयो गोर्खा भन्ने खुकुरी बोकेको प्रतिकसहितको स्मारक निर्माण हुदैछ भने सेमिनार हलसहितको चमेना गृह बन्दैछ । अन्य थुप्रै संरचनाहरु बन्ने क्रममा छन् ।
Comments
Post a Comment