कहिले बन्ला पक्की पुल ? एक्स्ट्रीमद्धारा बासको पुल मर्मतसम्भार(फोटोफिचर)

धरान । गत असोज ६ गते राती बीपी कोइराला स्वास्थ्य विज्ञान प्रतिष्ठान जाने धनकुटे रोडको पक्की पुल भत्किएर आवतजावत ठप्प बने पनि उपमहानगरपालिका र सडक डिभिजन कार्यालय पुल निर्माणमा चासो दिएन ।
लामो समय वित्दा पनि पुल बन्ने छाँटकाट नदेखेपछि एक्स्ट्रीम धरानआवद्ध युवाहरुले कार्तिक १२ गते भत्किएको पुल छेउमा बाँसको अस्थायी पुल बनाइदिएका थिए । आफ्नै खर्चमा उनीहरुले परम्परागत शैलीको पुल बनाइदिए । पुल बनेपछि स्थानीय र पैदल यात्रीहरु त्यही बासको पुलबाट वारीपारी गर्छन् । समय बित्दै जादा बासको पुलमा पनि क्षति पुग्दै गएको थियो । सोमबार पुनःएक्स्ट्रीम धरानका युवाहरुले बाँसको पुललाई मर्मत गरेर वलियो बनाइदिएका छन् । यो पुलबाट मान्छे र साइकल पनि वारपार गर्न सकिन्छ ।
मान्छे त्यहाँबाट हिड्न सक्ने भएपनि विरामी बोक्ने एम्बुलेन्स र ठुला सवारी भने मोडिएर अर्को रुटबाट बीपी प्रतिष्ठान जान बाध्य छन् । पक्की पुल तत्काल बन्ने छाटकाट छैन । यो पुल भत्किएपछि बीपी प्रतिष्ठान पुग्न र धरानको पश्चिमी क्षेत्र जान सर्वसाधारणहरु भानुचौक क्षेत्रबाट पुतलीलाइन हुदै आउजाउ गर्नु परिरहेको छ । यो पुल धरानको ८ र १९ नम्बर वडा जोड्ने महत्वपुर्ण पुल पनि हो । कोशी राजमार्गबाट छुटिएको धनकुटे रोड बीपी प्रतिष्ठान जाने मुख्य बाटो हो । यही बाटो भएर दैनिक सयौंको संख्यामा एम्बुलेन्स र अन्य सवारीहरु ओहोरदोहोर हुन्थ्यो । बीपीसँगै धरानको पश्चिमी वडाहरु १९, १८, १७ वडा र चतरा जान पनि प्रयोग हुन्थ्यो ।