फुटसलमा साकेला(फोटोफिचर)
धरान । फुटसलमा फुटबल खेल्न युवाहरु तम्तयार भएर उभिएका थिए । रेफ्रीले सिटि फुक्ला र खेल शुरु गरौला भनेर उनीहरु मैदानमा प्रतिक्षारत थिए । तर, रेफ्रीले सिटि फुकेनन् । त्यहाँ त ढोल र झ्याम्टा पो बज्न थाल्यो । अनि, फुटसलको बीचमा वल राखेर गोलाकार भई युवाहरु साकेला पो नाच्न थाले ।
धरान १५ स्थित बिग फुट फुटसलमा युवाहरु दिनहुँ फुटवल खेलेर रमाउछन् । तर, आइतबार भने त्यहाँ फुटसल मात्रै खेलिएन, किरात राई जातिको साकेला पनि नाचियो । ढोल र झ्याम्टाको तालमा युवा, खेलाडीहरु पनि उफ्रिउफ्रि साकेला नाचे । ‘सोई ढोले सोइ, किरात राज्य खोइ ?’ साकेला नाच्दै गर्दा उनीहरु गीतमा यो नारा पनि घन्काए ।
किरात राई खेलकुद संघ जिल्ला समिति सुनसरीले आयोजना गरेको फुटसलमा विभिन्न ५ वटा क्लबले सहभागीता जनाएको थियो । फाइनलमा आयोजक संघ र धरान ८ स्थित यलम्बर क्लबबीच स्पर्धा भएको थियो । जसमा यलम्बर क्लबले १३–७ गोलअन्तरले आयोजकलाई हरायो । मैत्रीपुर्ण प्रतियोगितामा आयोजक संघ, यलम्बर क्लब, कल्याण युथ क्लब धरान ११, किरात मञ्च नेपाल र बिग फुट फुटसलको टिमले भाग लिएको थियो । आयोजक खेलकुद संघका अध्यक्ष विकास राईले यायोक्खाको किरात राज्य प्राप्तीको अभियानलाई निरन्तरता दिन संघले फुटसल आयोजना गरेको बताए । यसअघि पनि संघले बिहिबार धरान ८ स्थित यलम्बर बास्केटवल कोर्टमा यलम्बर क्लबसँग मैत्रीपुर्ण बास्केटवल खेल आयोजना गरेको उनले जानकारी दिए ।
Comments
Post a Comment