आइएनजिओको कर्मचारी भन्दै ठगी गर्ने महिला पक्राउ

धरान । आफुलाई आइएनजिओको प्रतिनिधि भन्दै गरिब तथा सुकुम्बासी वस्तीमा पुगेर ऋण उपलब्ध गराउने, कसैलाई भुकम्प पीडितको राहत दिलाइदिने भन्दै रकम असुली गर्ने एक महिला पक्राउ परेकी छिन् । विभिन्न प्रलोभन देखाएर ठगी गरेको उजुरी परेपछि इलाका प्रहरी कार्यालय धरानले सुनसरीको तरहरा माइती घर भएकी २६ बर्षीय सृर्जना कोइराला शिवाकोटीलाई पक्राउ गरेको हो ।
उनले धरानको पानवारी र धरान १७ चतरा मार्ग क्षेत्रबाट एक दर्जनलाई ठगी गरेको प्रहरीले जनाएको छ । उनलाई ठगी मुद्दामा म्याद थप गरी अनुसन्धान प्रक्रिया अघि बढाइएको डिएसपी ढकेन्द्र खतिवडाले जानकारी दिए । ‘संस्थाको नाम नभन्ने तर आफु विदेशी आइएनजिओको कर्मचारी हँु । त्यहाँ ९ बर्षदेखि काम गर्दैछु, मेरो श्रीमान् मेनेजर छ भन्ने गरेको रहेछ । ठगीको प्रकृति हेर्दा पेशेवरले मात्रै यस्तो गर्न सक्छ, त्यसैले अन्यत्र पनि पीडितहरु छन् कि भनेरर ७५ वटै जिल्लालाई पत्राचार गरेका छौं’–डिएसपी खतिवडाले भने ।
प्रहरीका अनुसार चतरा मार्गमा स्थानीय सामाजिक अगुवा वृन्दा भटराईको घरमा बसेर सृर्जनाले ठगीको जाल विछ्याएकी थिइन् । उनले सुकुम्बासीलाई आफ्नो संस्थामार्फत विना धितो ऋण प्रवाह गर्ने, भुकम्प पीडितलाई राहत सहयोग २५ केजी दाल र १ बोरा जिरा मसिना चालम र भुमिहिन सुकुम्बासीलाई आवास निर्माणको लागि १ देखि ५ लाखसम्म विना धितो सहुलियतमा ऋण दिलाउने प्रलोभन दिएकी थिइन् । यो सुविधा उपभोग गर्न फारम शुल्क १ हजार तिर्नुपर्ने भन्दै उनले नागरिकताको फोटोकपी र २ वटा फोटो पनि संकलन गरेकी थिइन् । पैसा संकलन गरे पनि उनले फरम पछि भरौला भन्दै नागरिकताको फोटोकपी र फोटो भने साथै बोकेर गइन् । ‘वृन्दा समाजको गन्यमान्य मान्छे रहेछ, उसको घरमा बसेपछि अरुले पनि विश्वास गरेको देखियो, तर सृर्जना एकाएक हराएपछि घटना प्रहरीसम्म आइपुग्यो’–डिएसपी ढकालले भने ।

आफुले पनि धोका खाएपछि वृन्दा भटराईले नै प्रहरीमा जाहेरी दिइन् । चतरा मार्गबाट सृर्जनाले फुलकुमारी राईबाट ५ हजार ५, सञ्जिव राईबाट ३ हजार ६०, लक्ष्मी राईबाट ५ हजार १ सय, चन्द्रबहादुर तामाङबाट ५ हजार १ सय ५, भीमबहादुर तामाङबाट २ हजार ६० र संगीता सकरबाट १ हजार १ सय असुलेको प्रहरीले जनाएको छ । उजुरी परेपछि खोजी तीब्र पारेको प्रहरीले सृर्जनालाई भानुचौकमा हिड्दै गरेको अवस्थामा फेला पारयो । उनी पक्राउ परेपछि पानवारी क्षेत्रमा पनि ठगी गरेको घटनाहरु प्रहरीमा आइपुग्यो । ‘पानवारीमा त दाउरा बेचेर जिविका चलाइरहेकी ६१ बर्षकी वृद्धालाई पनि ठगेको रहेछ । आर्थिकरुपमा विपन्न वस्तीमा पुगेर प्रलोभन देखाउदै पैसा असुल्ने गर्दो रहेछ’–प्रहरी निरीक्षक प्रकाश श्रीमलले भने ।

प्रहरीका अनुसार पानवारीमा आर्थिकरुपमा विपन्न, ग्रामिण भेगको मानिसलाई राहत दिनको लागि नामावली संकलन गर्न आएको भन्दै ठगी गरेको खुलेको छ । एक घरबाट बढीमा ५ हजार दिदा ५ लाखसम्म ऋण विना ब्याजमा पाउने र मासिक किस्तामा तिर्दा हुने भनदै पैसा असुलेको थिइन् । त्यसक्षेत्रमा दाउरा बोकेर जिविकोपार्जन गरिरहेकी वृद्धा विष्णुमाया खड्कासँग ५ हजार, डम्बर बहादुर सुवेदीसँग २ हजार, कुमार सुवेदीसँग ३ हजार र तीर्थमाया खड्कासँग ३ हजार असुल गरेको प्रहरीले जनाएको छ । उनी पक्राउ परेपछि पानवारीकी वृद्ध खड्काले उजुरी हालेकी छिन् । सृर्जनाको माइती तरहरा भएपनि उनले दोलखामा बिहे गरेको र एक छोरा पनि भएको प्रहरीले जनाएको छ । उनको श्रीमान् भने हाल विदेशमा रहेको वयानमा खुलाएकी छिन् ।