तेस्रो सोमबार पिण्डेश्वरमा तीर्थालुको घुइचो(फोटोफिचर)

धरान । साउनको आइतबार र सोमबार धरान र चतरा बजारमा पहेलो(गेरु) वस्त्रधारीहरुको लर्को देखिन्छ । बजारमा पनि हरेक पसलअघि शिवको तस्बिर अंकित गेरुवस्त्र बिक्रीमा झुण्डिएको हुन्छ । चाहे बालबालिका हुन्, युवा युवती वा बृद्धवृद्धाहरु हुन् । धरान १४ स्थित पिण्डेश्वर मन्दिरमा जल चढाउन आउने तीर्थालु भक्तजनहरु पहेलो वस्त्रमा नै हुन्छन् ।

धरानका मात्रै होइन, विभिन्न जिल्लाबाट पिण्डेश्वरमा दर्शन एवं जल चढाउन आउने तीर्थालुहरु पनि गेरुवस्त्रमा नै हुन्छन् । प्रायः सबैतिरको शिवालयमा यही पहिरनमा भक्तजनहरुको घुइचो देखिन्छ । साउनमा गेरुवस्त्रको व्यापार कति होला ? यसै भन्न सकिदैन । ‘साउनमा गेरुवस्त्रको त राम्रो व्यापार हुन्छ, आजै पनि बिहान ७ बजेसम्म गेरुवस्त्रधारी २५ हजार तीर्थालु भक्तजनहरुले जल चढाईसकेका छन्’–पिण्डेश्वर बाबाधाम समितिका सदस्य विकास वनेपालीले भने ।

कोशीबाट जल बोकेर पिण्डेश्वरमा चढाउन आएका इनरुवा ७, सुनसरीका ओमप्रकाश रामले पनि यसपाली २ सय ५० रुपैयामा नयाँ गेरुवस्त्र खरीद गरेको सुनाए । उनका अनुसार उनीसँगै आएका अन्य ७ जनाले पनि त्यही दाममा नयाँ गेरुवस्त्र किनेका छन् । गेरुवस्त्र सरदर अढाई सयदेखि ५ सय रुपैयासम्म पर्ने व्यापारीहरुको भनाई छ । पिण्डेश्वरमा साउनभर दुई लाख भक्तजनहरु जल चढाउन आउछन् । ती मध्ये आधाले मात्रै नयाँ गेरुवस्त्र खरीद गर्दा करोड बढीको व्यापार हुने सुनसरी उद्योग वाणिज्य संघका सदस्य उपेन्द्र चाम्लिङले बताए । ‘पिण्डेश्वरमा २ लाख बढी भक्तजन आउछन्, एक चौथाई अर्थात ५० हजारले मात्रै नयाँ गेरुवस्त्र खरीद गर्दा पनि अढाई सयको दरले एक करोड २५ हजारको व्यापार हुन्छ’–उनले भने–‘कतिले पहिला किनेकै लगाउलान्, तर अधिकांशले नयाँ नै खरीद गर्छन् ।’

बाबाधाम समितिका अनुसार साउनमा गेरुवस्त्रको मात्रै होइन, हरियो चुरा पोते र मेहन्दीको पनि राम्रो व्यापार हुन्छ । सौभाग्यको प्रतिक हुने भएकोले साउनमा महिलाहरुले हरियो चुरा, पोते र हातमा मेहन्द लगाउछन् । युवा पुस्तामाझ हरियो चुरा, मेहन्दीप्रति फेशनकोरुपमा आर्कषण बढ्दो छ । साउन महिना हिन्दु आराध्य देव शिवको प्रिय महिना हो । आफ्नो मनोकांक्षा पुरा हुने विश्वासका साथ भक्तजनहरुले साउनमा शिवालयमा जल चढाउने गर्छन् । यो बर्ष तिथीले साउन १६ बाटमात्रै साउन महिना लागेकोले तेस्रो सोमबार गेरुवस्त्रधारी भक्तजनहरुको घुइचो भएको थियो । बाबाधाम समितिका अनुसार मन्दिरमा आइतबार साँझ ७ बजेदेखि नै भक्तजनहरुको घुइचो थियो । अत्यधिक भीड बढेपछि मध्यरातमा नै मन्दिरको ढोका खोलिएको समितिले जनाएको छ ।