बीपीमा ४ सय बेडको मातृ–शिशु स्वास्थ्य केन्द्र बन्ने
धरान । बीपी कोइराला स्वास्थ्य विज्ञान प्रतिष्ठान धरानमा नेपालकै पहिलो दक्षिण पूर्वी एसियाकै नमुनाकोरुपमा मातृ तथा शिशु स्वास्थ्य केन्द्र(एमसिएच सेन्टर) बन्ने भएको छ । आगामी तीन बर्षभित्र निर्माण सम्पन्न गर्ने लक्ष्य रहेको केन्द्रको सोमबार प्रधानमन्त्री सुसिल कोइरालाले शिलान्यास गरे ।
केन्द्र ४ सय शैयाको हुनेछ भने पुर्वाञ्चल र मध्यमाञ्चल क्षेत्रका आमा र बच्चालाई सुपरस्पेसियालिटी (बिशिष्ट) उपचार सेवा उपलब्ध हुने प्रतिष्ठानले जनाएको छ ।
यो नेपालकै पहिलो केन्द्र हो भने दक्षिण पुर्वी एसियाली राष्ट्रमा पनि नमुना हुने उपकुलपति डाक्टर बीपी दासले बताए । ‘हाम्रो सबैभन्दा ठुलो समस्या भनेको बच्चा र आमालाई कसरी बचाउने भन्ने हो । डेलिभरी समस्या छ, बेड नभएर भुईमा राख्नुपरिरहेकोछ । आइसियु, एनआइसियु आवश्यकता वमोजिम छैन’–उपकुलपति दासले भने–‘त्यसैलाई बिशेष ध्यान दिएर हामीले धेरै पहिलादेखि नै केन्द्र निर्माण गर्न पहल गरिराखेका थियौं, सरकारले हाम्रो कुरा सुन्यो । यो स्वास्थ्य क्षेत्रको लागि ठुलो उपलब्धी हो ।’
प्रतिष्ठानका अनुसार उपकरणसहित केन्द्रको एक अर्ब लागत अनुमान गरिएको छ । सरकारले यो आर्थिक बर्षमा २० करोड बिनियोजन गरिसकेको छ । भवन निर्माणको लागि कन्सल्टेन्ट नियुक्ती प्रक्रिया भइरहेको र कन्ट्रयाक्टर चयन भएपछि आगामी २ महिनाभित्र निर्माण कार्य शुरु हुने उपकुलपति दासले बताए । ‘डेलिभरी, सिजरियन, बच्चा र आमाको कम्प्लिकेटेट केस सबैको यही उपचार हुन्छ, विरामीहरु कतै पनि भौतारिनु पर्नेछैन’–दासले भने–‘आइसियु, एनआइसियु, अपरेशन सबै यही हुन्छ ।’
Comments
Post a Comment