पहाडी जिल्लामा परमिट विना गाडी

धरान । कानुनी व्यवस्थाको धज्जी उडाउदै कोशी अञ्चलका पहाडी ग्रामिण सडकमा व्यावसायीहरुले रुट परमिट विना नै यातायात चलाइरहेका छन् । अधिकांश सडक सवारी गुड्न उपयुक्त नभएपनि व्यावसायीहरुले सिण्डिकेट झै आलोपालो प्रणालीबाट सवारी चलाइरहेका छन् । नियम मिचेर जोखिमपुर्ण तरिकाले गाडी चलिरहे पनि नियमनकारी निकाय ट्राफिक प्रहरी र यातायात व्यवस्था कार्यालय भने आँखा चिम्लेर बसिरहेको छ ।
रुट परमिट विना गाडी चलेको थाह पाएर नि दुवै निकायले व्यावहारिकता भन्दै छुट दिइरहेको छ । पहाडी ग्रामिण भेगमा डोजर लगाएर भर्खर ट्रयाक मात्रै खुलेको ठाउँमा पनि निर्वाध गाडी चलिरहेका छन् । यस्तो बाटोमा गाडी चल्नु ज्यादै जोखिमपुर्णा हुने स्वयम व्यावसायीहरु बताउछन् । परमिट नभएको बाटोमा गाडी चलादा दुर्घटना भएर यात्रुको ज्यान गएमा विमा कम्पनीले क्षतिपुर्ति पनि दिदैन । ‘दुर्घटनाको ज्यादै जोखिम छ, दुर्घटना भइहाल्यो भने विमा दाबी गर्न अर्को समस्या छ’–एक व्यावसायीले भने–‘परमिट नभएको ठाउँमा दुर्घटना भएपनि रुट परमिट क्षेत्रमा दुर्घटना भएको भनेर विमा दाबी गछौं, नत्रभने त क्षतिपुर्ति नै पाइदैन ।’
इटहरीस्थित कोशी अञ्चल यातायात व्यवस्था कार्यालयका अनुसार पहाडी जिल्ला तेह्रथुमको वसन्तपुर र धनकुटाको हिलेसम्म मात्रै रुट परमिट दिइएको छ । तर, व्यावसायीहरुले भने वसन्तपुर हुदै म्याङलुङ, टुटे देउराली हुदै संखुवासभाको चैनपुर र खाँदबारीसम्मै गाडी चलाइरहेका छन् । यस्तै, धनकुटाको हिलेसम्म मात्रै रुटपरमिट भएपनि लेगुवा हुदै भोजपुरसम्म व्यावसायीहरुले गाडी सञ्चालन गरिरहेको छ । हिलेबाट लेगुवा हुदै संखुवासभाको खादबारी पनि गाडी चल्छन् । यस्तै, धनकुटाको जोरपाटीदेखि चुलाचुली, सिधुवाबाट शुक्रबारे, जितपुर, हिलेदेखि छिन्ताङ, धरानदेखि राजारानी, बुधबारेलगायत थुप्रै ग्रामिण बाटोमा रुटपरमिट विना नै गाडी चलिरहेको व्यावसायीहरु नै स्वीकार गर्छन् ।

सरकारले यातायात व्यवस्थापनको लागि जिल्लामा एक समिति रहने व्यवस्था गरेको छ । उक्त समितिले भाडासमेत तोकेर सिफारिश गरेमा अस्थायी भएपनि रुट परमिट पाउछन् । तर, कोशी पहाडी जिल्लाबाट अस्थायी रुट परमिटको सिफारिश भएर नआएको यातायात कार्यालयका प्रमुख विष्णु पौडेलले बताए । ‘बाटो राम्रो बनाएर मात्रै गाडी चलाउन स्वीकृत दिने हो, तर अहिले पहाडी ग्रामिण सडकमा परमिट विना नै चलिरहेको छ । बाटो राम्रो नभएकोले जोखिम पनि छ’–पौडेलले भने–‘व्यावसायीले जर्बजस्ती नै चलाएको भन्दा पनि हुन्छ । सकेसम्म दुर्घटना नहोस्, रुटपरमिट भए नभएको चेकजाँच गर्ने र कारबाही गर्ने जिम्मेवार निकाय ट्राफिक प्रहरी हो ।’

पुर्व क्षेत्रीय ट्राफिक प्रहरी कार्यालयका प्रमुख एसपी नरबहादुर केसीले परमिट नभएको बाटोमा यातायातको साधन चल्न नपाउने भएपनि व्यावहारिकता पनि हेरिनुपर्ने बताए । पहाडी ग्रामिण क्षेत्रमा रुट परमिट विना गाडी चलेकोबारे अनभिज्ञता प्रकट गर्दै केसीले त्यसरी चलेको भए गाडी नम्बर टिपेर खबर गरिदिनु भन्दै पन्छिए । ‘परमिट नभएको बाटोमा चलेर दुर्घटना भयो भने जिम्मेवारी स्वयम व्यावसायी हुनुपर्छ’–एसपी केसीले भने–‘कसरी चल्यो होला ? थाह भयो भने नम्बरसहित खबर गर्नुहोला ।’ पुर्वाञ्चल यातायात व्यावसायी संघका अध्यक्ष सरोज श्रेष्ठ परमिट विना गाडी चलेको स्वीकार गर्दै ग्रामिण सडकमा स्थानीय जनता र गाविसकै माग वमोजिम व्यावसायीले सञ्चालन गरेको बताए । सरकारले बाह्रै महिना गाडी चल्ने सडकको अवस्था तयार गरेमात्रै रुट कायम हुने भन्दै उनले अहिलेको ग्रामिण सडकमा हिउदमा मात्रै यातायात चल्ने गरेको बताए । ‘हामीले जर्बजस्ती चलाएको होइन, ट्रयाक खुलेपछि स्थानीय जनता र गाविसले नै सेवा दिनुपर्यो भनेर आग्रह गर्छन् । परमिट विना यहाँ मात्रै चलेको होइन, देशैभरिको अवस्था यस्तै छ’–उनले भने ।