आगोले खायो विदेशको कमाई, श्रीटोल धन्न जोगियो !

धरान । पाँच महिनाअघि बहराइनबाट विरामी भएर फर्किदा धरान ८, श्री टोलका विष्णु श्रेष्ठको साथमा केही आना सुको थियो । उनले त्यो पैसाबारे आफ्नी श्रीमतिलाई पनि भनेका थिएनन् । उनीहरु जेठा छोरा विवेकलाई दुबई पठाउने तर्खरमा थिए । पाँच महिनादेखि गुपचुप राखेको त्यही पैसा लगाएर विष्णु छोरालाई दुबई पठाउन चाहन्थे ।
सोमबार साँझको खाना खाइसकेर विष्णु मुढामा मात्रै के बसेका थिए । घरको पूजा कोठामा धुवाको मुश्लो निस्कियो । कोठाभित्र आगलागी भएको रहेछ । दनदनी बलेको आगो छरछिमेक मिलेर त निभाए, तर छोरालाई विदेश पठाउन साचेर राखेको पैसा खरानी भयो । ‘वहराइनबाट फर्कदा ल्याएको पैसा सकिहालिन्छ भनेर लुकाएर राखेको थिए, छोरालाई बाहिर पठाउदा खर्च गरौंला भनेको थिएँ, तर सबै जल्यो’–पीडित श्रेष्ठले भने । उनको जेठा छोरा विवेक भने विदेश जाने तयारीको लागि पासपोर्ट बोकेर काठमाण्डौंमा छन् ।
एक्कासी भएको आगलागीमा परेर करिब दुई लाख बढी धनमाल नष्ट भएको श्रेष्ठ परिवारले जनाएका छन् । आगोले उनले लुकाएर राखेको करिब ७० हजार, श्रीमति कमलाले वित्तिय संस्थाबाट निकालेको १५ हजारसँगै घरको अस्थायी लालपूर्जा, नागरिकता, पासपोर्ट, स्वास्थ्य उपचारको कागजातलगायत सबै महत्वपुर्ण कागजपत जलेर नष्ट भएको श्रेष्ठले बताए । ‘मजदुरी गरेर कमाएको सबै गयो, कागजपहरु पनि केही बाँकी रहने’–निराश हुदै उनले भने । पूजा कोठामा राखेको ३ वटा सुटकेश जल्दा ती सबै सामानहरु नष्ट भएको हो । हाल श्रीमति, दुई छोराका साथ सुकुम्बासी बस्तीमा रहदै आएका उनी लांघाली वन उपभोक्ता समुहमा वन हेरालुकोरुपमा काम गरिरहेका छन् ।
आगोले श्रैष्ठ परिवारको पूजा कोठाको धनमाल जलाएर नष्ट गरेपनि स्थानीय मिलेर निभाउन सफल भएकोले ठुलो क्षति हुनबाट भने श्रीटोल बस्ती जोगिएको छ । श्रेष्ठको घरसँगै लहरै आधा दर्जन बढी घरहरु छ । आगोले ठुलो रुप लिएको भए ती घरहरुलाई पनि क्षति पुग्ने थियो । आगलागी के कारणबाट भएको भनेर यकिन भइसकेको छैन । साँझ पूजा गर्न धुपबत्ति नबालिएकोले विद्युत सर्ट भएर हुनसक्ने अनुमान गरिएको छ ।