चेकिङमा युवामाथि लाठी प्रहार, प्रहरी ज्यादती भएको गुनासो

धरान । प्रहरीले मोटरसाइकल चेकिङको क्रममा लाठी प्रहार गरेर घाइते बनाएको एक युवाले आरोप लगाएका छन् । धरान १५ बगरकोटस्थित हुक्का हाउसका सञ्चालक सुरज राईले सोमबार राती करिब ९ बजे घर फर्कदै गर्दा चेकिङमा रहेका प्रहरीले एक्कासी लाठी प्रहार गरेको आरोप लगाएका हुन् ।
प्रहरीको लाठीबाट उनको दायाँ निधारमा चोट लागेको छ । लाठी प्रहारले घाइते भएका राईलाई थप उपचार गर्न लैजाने भन्दै प्रहरी कार्यालय पुर्याएर कुटपिट गरेको पनि पीडित पक्षले आरोप लगाएको छ । प्रहरीले भने हेल्मेट विना आएका राई चेकिङको क्रममा नरोकेपछि सो घटना भएको दाबी गरेको छ । साथै, प्रहरीले उपचार गर्न लैजान खोज्दा राई आफै नमानेको डिएसपी सञ्जयसिंह थापाको भनाई छ ।
पीडित राईका अनुसार राती करिब ९ बजेतिर बगरकोटस्थित हुक्का हाउस बन्द गरेर घर फर्कदै गर्दा सो घटना भएको थियो । धरान १५ स्थित शिक्षा सदन उच्चमावि नजिककै रहेको घरअघि पुगेपछि एक्कासी सिठी बजेको र लोडसेडिङको कारण चेकिङ थाह नपाएको उनको भनाई छ । ‘म साथीको मोटरसाइकल चलाएर घर आउदै थियौं, हेल्मेट लगाएको थिइन, गल्ती थियो तर त्यसको सजाय एक्कासी लाठी प्रहार गर्नु ठिक हो कि होइन ?’–मंगलबार इलाका प्रहरी कार्यालयमा भेटिएका उनले भने । अध्यारो र प्रहरी विजुलीको पोलमा छेलिएर उभिएको कारणले पनि प्रष्ट नदेखिएको उनको भनाई थियो ।

एक्कासी लाठी प्रहार भएपछि घर नजिक पुगेर पनि भाग्नु परेको र चेकिङमा बसेको प्रहरीले आक्रमण गरेको थाह पाएपछि राई आफन्त र स्थानीयको साथमा घटनास्थलमा फर्किए । एक्कासी लाठी प्रहार गर्नु गल्ती भएको र उपचार गर्ने भन्ने समझदारी भएपछि प्रहरी भेनमा राखेर पुनः इलाका पुर्याएपछि डिएसपीले गालीगलौज गर्दै मुक्का पनि हानेको राईको आरोप छ । डिएसपी थापाले भने धरानबाट २ वटा मोटरसाइकल हराएको कारण चेकिङ कडाई पारिएको बेला हेल्मेट नलगाई आउदा सो घटना भएको बताए । ‘चेकिङबाट भाग्न खोज्दा घटना भएको रहेछ, हिजो पनि १८ वटा मोटरसाइकल कार्वाही भएको छ, उसैलाई मात्रै किन यस्तो भयो त ?’–उनले भने–‘कार्यालय ल्याएर कुटेको होइन, मान्छे भेला पारेको हुनोले गुण्डागर्दी शैलीमा नउत्र भनेको मात्रै हो ।’
पीडित पक्ष र प्रहरीबीच मंगलबार प्रहरी कार्यालयमा छलफल भएको थियो । छलफलमा प्रहरी उपचार गरिदिने सहमति भएको पीडित पक्षको भनाई छ भने प्रहरीले त्यसबारेमा केही खुलाउन चाहेन । सवारी चालक अनुमति पत्र(लाइसेन्स) वितरण रोकिएको मौकामा प्रहरीले पैसा असुल्ने मात्रै ध्याउन्नमा चेकिङ गर्ने गरेको आरोप लाग्दै आएको हो । धरानमा लाइसेन्स र हेल्मेट विना अत्यधिक मोटरसाइकल चालाउने प्रवृत्ति छ । ती युवा चेकिङको क्रममा भाग्ने भएकोले प्रहरीले टाढैबाट लाठीको झटारोसमेत हान्ने गरेको मोटरसाइकल चालकहरु बताउछन् । ‘प्रहरीको ध्यान हेल्मेट र लाइसेन्स छ कि छैन भन्नेमा र जरिवाना असुल्नुमा मात्रै ध्यान छ, अरु ट्राफिक नियमबारे वास्तै गर्दैन’–धरान १५ का योगेन राईले भने ।