दोस्रो नेवा च्यारिटी ८ के रन आयोजना हुदै

धरान । ‘स्वस्थ्य शरीर, स्वच्छ धरान’ भन्ने नाराका साथ आगामी फागुन १० गते धरानमा दोस्रो नेवा च्यारिटी ८ के रन एण्ड वाक हेल्प दृष्टि हेप्पि होम नामको दौड प्रतियोगिता आयोजना हुने भएको छ । स्वस्थ्य धरान बनाउने उद्देश्यले दुई बर्षअघि स्थापना भएको धरान रन नामक संस्थाको आयोजनामा दौड प्रतियोगिता हुन लागेको हो ।
संस्थाले सोमबार पत्रकार सम्मेलन गर्दै भानुचौकबाट शुरु भएर पुनः त्यही टुंगिने दौडमा प्रमुख अतिथिकोरुपमा चर्चित धावक बैकुण्ठ मानन्धर सहभागी हुने जानकारी दिएको छ । संस्थाका अध्यक्ष मनिष तामाङका अनुसार दोस्रो सँस्करणमा प्रथम पुरस्कार राशी बढाएर ३० हजार पुर्याइएको छ भने दोस्रो र तेस्रो हुनेलाई पनि बढाएर २० र १० हजार नगद पुरस्कार दिइनेछ ।  यसैगरि, प्रतियोगितामा सहभागी भेट्रान, कम उमेर समुहका पहिलो, दोस्रो र तेस्रो हुने धावकलाई पनि क्रमशः ५ हजार, ३ हजार र २ हजार नगद पुरस्कार दिइने अध्यक्ष तामाङले बताए ।
‘स्वास्थ्य रहन दौडनुपर्छ भन्ने सन्देश दिन र दौडको महत्व बुझाउनको लागि प्रतियोगिता आयोजना गरिएको हो’–अध्यक्ष तामाङले भने–‘खर्च बचाउन सक्यौं भने महिला दुव्र्यसनीलाई सचेतना गर्ने संस्था दृष्टि नेपाललाई ह्यापि होमको लागि सहयोग गर्नेछौं ।’ उनका अनुसार ८ के रनको पहिलो सँस्करण अपांग साहित्यकार लक्ष्मी राईको सहयोगार्थ भएको थियो । त्यसबाट बचेको रकमले साहित्यकार राईको कृति एकान्तमा सुवासको दोस्रो सँस्करण एक हजार प्रति प्रकाशन गरिदिएको उनले बताए ।

फागुन ५ गतेसम्म दर्ता समय रहने दौडमा एक हजार जना सहभागी हुने आयोजकले अपेक्षा लिएको छ । दौडमा स्थानीयदेखि व्यावसायिक धावकहरु पनि सहभागी हुनेछन् । पहिलो सँस्करणमा ७ सय ५० जना सहभागी थिए । त्यतिबेला ५ बर्षका बालकले पनि ८ किलोमिटरको दौडमा सहभागी हुदै दुरी पुरा गरेका थिए । धरान रनले प्रत्येक शनिबार ३.४ किलोमिटरको दौड आयोजना गराउदै आएको छ । करिब १४ लाख ५ हजार खर्च हुने अनुमान गरिएको दौडको लागि हाल बेलायत निवासी संस्थाका संस्थापक सन्तोष राईले सहयोग जुटाइरहेको आयोजकले जनाएको छ । दर्ता शुल्क वापत धरान रनका सदस्यलाई एक सय पचास मात्रै तिर्नु पर्छ भने अरुलाई दुई सय रुपैया शुल्क लाग्नेछ । सहभागीले एक टिसर्ट पनि पाउनेछन् ।
विभिन्न विद्यालयहरुमा विद्यार्थीहरुलाई सहभागिताको लागि समन्वय गर्न एवं पत्राचार गर्न जादा भने सहयोग नपाएको संस्थाका कोषाध्यक्ष लोकबहादुर लिम्बूले असन्तुष्टि व्यक्त गरे । ‘स्वास्थ्य रहन दौडनुपर्ने सन्देशको लागि सहभागिता गराउन आग्रह गर्न गयौं, दौडदा पनि पैसा तिर्नु पर्ने भनेजस्तो गरियो’–उनले भने–‘हामीले नाफा कमाउनको लागि दौड आयोजना गरेका होइनौं, स्वस्थ्य धरान बनाउन हो ।’