एसएलसी पछिको अन्यौलता हटाउदै युवाहरु

धरान । विद्यार्थीहरुका लागि फलामे ढोका भनिएको एसएलसी परीक्षा दिइसकेपछि जति राहत महसुस गर्छन्, त्यसपछिको अन्यौलताले पनि उनीहरुलाई उतिकै तनाव दिन्छ । खास गरी सरकारी विद्यालयका विद्यार्थीहरु एसएलसी कुन कलेज पढ्ने वा बिषय रोज्ने, आफुले रोजेको बिषय कहाँ पढ्न ठिक हुन्छ भन्नेबारे अनभिज्ञ हुन्छन् ।
विद्यार्थी र अभिभावकहरुको त्यही अनभिज्ञतालाई हटाउन बिएफआइपि नेपाल नामको एक युवाहरुको सञ्जाल जुटेको छ । वाट आफ्टर एसएलसी ? (एसएलसी पछि के ?) भन्ने सचेतनामुलक शैक्षिक कार्यक्रम लिएर युवाहरु धरानका सरकारी विद्यालयहरु डुल्दैछन् । ती विद्यालयमा युवाहरुले एसएलसी दिन तयारी गरिरहेका विद्यार्थी, शिक्षक र अभिभावकलाईसमेत सचेत गराउने काम गरिरहेको छ । संस्थाका अनुसार धरानमा शहीदस्मृति मावि र पब्लिक उच्चमाविमा एसएलसी दिने तयारीमा रहेका विद्यार्थीहरुलाई लक्षित गरेर बिहिबार र शुक्रबार यो कार्यक्रम भइसकेकोछ ।

विद्यार्थीहरुको मनमा एसएलसी परीक्षा भन्ने बित्तिकै डराउने र परीक्षा सकेपछि के गर्ने भन्ने अन्यौल हटाउन सरकारी विद्यालय लक्षित गरेर कार्यक्रम शुरु गरिएको हो । एसएलसी पछि विद्यार्थी र विद्यालयबीच सामुहिकरुपमा भेला हुन गाह्रो हुने भएकोले पनि परीक्षा अगावै कार्यक्रम गरिएको अध्यक्ष एवं कार्यक्रम संयोजक दिपेश बस्नेतले बताए । ‘एसएलसी परीक्षालाई पनि कसरी फेस गर्ने ? भनेर विद्यार्थीहरुको आत्मविश्वास बढाउन पनि यो कार्यक्रम गरेका हौं’–अध्यक्ष बस्नेतले भने–‘पछि, कलेज र बिषय कसरी छान्ने ? कुन बिषय आफ्नो लागि उपयुक्त हुनसक्छ भनेर पनि उनीहरुलाई जानकारी दिन्छौं ।’
कार्यक्रममा ए लेभल, सिटिइभिटी, उच्चमावि शिक्षा परिषद, त्रिभुवन विश्वविद्यालय, व्यावस्थापन संकाय, मानविकी संकाय, साइन्सलगायत विविध शैक्षिक बिषयमा विद्यार्थीहरुलाई प्रष्ट्याउने काम भएको संस्थाले जनाएको छ । ‘हाम्रो नारा नै विद्यार्थीको समय, अभिभावक र सरकारको १० बर्षको लगानी खेर जान नदिउ भन्ने हो’–अध्यक्ष बस्नेतले भने । कार्यक्रममा सिटिभिटीबारे सागर अधिकारी, ए लभेल, साइन्सबारे विष्णु लिम्बू,उच्चमावि शिक्षा परिषदबारे विकेककुमार सिंह, मानविकी संकायबारे सुमन खवास, व्यवस्थापनबारे हिरा गुरुङ, एसएलसी परीक्षा, कलेज र बिषयबारे दिपेश बस्नेतले विद्यार्थीहरुलाई प्रष्ट पारेका थिए । सहजकर्ताहरु आ आफ्ना बिषयमा गहिरो अध्ययन गरेका अनुसन्धाताहरु पनि हुन् ।

बिएफआइपीको धरान वर्किङ गु्रपका संयोजक सरोज दाहालका अनुसार विद्यार्थीहरुले यो कार्यक्रमलाई ग्रामिण क्षेत्रमा पनि लैजान सुझाएका छन् । यो कार्यक्रमलाई जनकपुर, सिरहा, सर्लाही, चितवनका सरकारी विद्यालयमा पनि आयोजना गर्ने उनले बताए । ‘अभिभावक अशिक्षित छन्, जसले गर्दा एसएलसी पछि पढ्न सकिने बिषयहरुको राम्रो ज्ञान हुदैन । कहाँ कहाँ पढाई हुन्छ भन्ने पनि थाह हुदैन’–सरकारी विद्यालयलाई लक्षित गर्नुको कारण खुलाउदै दाहालले भने–‘आर्थिक अवस्था कमजोर, छात्रवृत्ति अवसरबारे पनि ज्ञान नहुने भएकोले निःशुल्करुपमा कार्यक्रम गरेका हौं ।’ कार्यक्रमको लागि संस्थाका सदस्यहरुबाट र विदेशमा रहेका शुभचिन्तकहरुको सहयोगबाट कार्यक्रम गरेको संस्थाले जनाएको छ ।