पत्रकार महासंघको अध्यक्षमा पुनः घिमिरे निर्वाचित
धरान । नेपाल पत्रकार महासंघ सुनसरीमा क्रान्तिकारी पत्रकार संघ र नेपाल प्रेस युनियनसहितको गठबन्धनले जित हासिल गरेको छ । स्वतन्त्र पत्रकार समुह(स्वपस), संघीय प्रेस युनियन र क्रान्तिकारी पत्रकार महासंघले समर्थन जनाएपछि यो गठबन्धनले महासंघमा कब्जा जमाउन सकेको हो ।
महासंघको आइतबार सम्पन्न नवौं अधिवेशनबाट यो गठबन्धनकोतर्फबाट अध्यक्ष, उपाध्यक्ष, सचिव, सहसचिवसहित अधिकांश सदस्यमा कब्जा जमायो । प्रेस चौतारी नेपाल र नेपाल प्रेस युनियनको विद्रोही टिमको प्यानलले भने कोषाध्यक्ष र दुई कार्यसमिति सदस्यमा मात्रै जित पायो । अध्यक्षमा दोस्रो कार्यकालको लागि केशव घिमिरे १ सय १ मतका साथ विजयी बने । उनका निकटतम प्रतिद्धन्दी इकबाल अहमदले ७८ मत मात्रै ल्याए । अर्का उम्मेदवार जनकऋर्षि राईलाई ५ मत मात्रै खसेको थियो । अघिल्लो पटक पनि अध्यक्ष पदमा बागी उम्मेदवारी दिएका अहमद घिमिरेसँग नै पराजित भएका थिए । अधिवेशनको अघिल्लो दिन(शनिबार साँझ) मात्रै संघीय प्रेस युनियन, क्रान्तिकारी पत्रकार महासंघ र स्वतन्त्र पत्रकार समुहले क्रान्तिकारी र युनियनसँग १४ बुँदे सहमति गर्दै गठबन्धन गरेको थियो ।
उपाध्यक्षमा वेदराज पौडेल ७१ मतका साथ विजयी बने । उनका प्रतिद्धन्दी शेखर ढकालले ६८ मत ल्याए भने अर्का स्वतन्त्र उम्मेदवार प्रेम बास्तोलाले ३० मत पाए । यस्तै, सचिव पदमा बाबुराम सुवेदीले १ सय २ मतका साथ विजयी भए । उनका प्रतिद्धन्दी सन्तोष काफ्लेले ७१ मत मात्रै पाएका थिए । सहसचिवमा ८९ मत पाएर प्रमोदकुमार यादव विजयी भए । उनका निकटतम प्रतिद्धन्दी उमेशकुमार मेहताले ४४ मत पाए भने स्वतन्त्र उम्मेदवार स्वर्णिम हाङ फोम्बो लिम्बूले २९ मत पाए । यस्तै, कोषाध्यक्ष पदमा भने चौतारी र युनियनको बागी टिमकोतर्फबाट विकास राईले ७८ मतका साथ विजयी बने । उनका निकटतम प्रतिद्धन्दी धनबहादुर पुरीले ७६ मत पाएका थिए भने अर्का उम्मेदवरा तुलसी यादवले १६ मत पाएका थिए ।
सदस्यतर्पm भने क्रान्तिकारी गठबन्धनबाट महिलामा रिता मोक्तान(९६), दलितमा तारा लामगादे(८५) र मधेशीमा भरतराज शर्मा(८८) विजयी बने भने जनजातिमा चौतारी गठबन्धनबाट भोजराज श्रेष्ठ(९६) विजयी भए । यस्तै, खुलातर्फ भने सदस्यहरुमा सर्वाधिक मतका साथ उपेन्द्र चाम्लिङ(१०८), सुरेश घिमिरे(९७), सरिता पुमा राई(९६), शेखरनाथ जोगी(९५), गोविन्द बस्नेत(८९), बिनादेवी तामाङ(८७), केशव सापकोटा(८३) र बाबुराम कार्की(८२) विजयी बने । खुलातर्फबाट विजयी सदस्यहरुमध्ये सर्वाधिक मत ल्याउने उपेन्द्र चाम्लिङ मात्रै चौतारी गठबन्धनका हुन् भने अरु सबै क्रान्तिकारी गठबन्धनका हुन् ।
सोही अधिवेशनबाट केन्द्रीय पार्षदहरुमा अमर खड्का, हर्ष सुब्बा, राजेश विद्रोही, पवन अधिकारी, गोपाल दाहाल, गोपाल देवान, जसकुमार राई, कविन्द्रबहादुर केसी, किशोरकुमार कार्की, प्रतिक्षा बान्तवा, पी.वी.दियाली, भैरव आङ्ला, भीम राई ज्वाला,प्रदिप मेन्याङ्बो, यात्रा थुलुङ, सुविद गुरागाई, लिलाराज भटराई, निलिफा सुब्बा, राजेन्द्र किराती, श्रीशीशा राई, हिमाल दाहाल, कृष्ण जुनेली भटराई, कृष्णप्रसाद भटराई, देवेन्द्र कार्की, भवानी बराल, कृष्णविनोद लम्साल, जयकृष्ण यादव, रत्नप्रसाद आचार्य, सुमन पुरी याम प्रधान र अर्जुन शर्मा विजयी भए ।.............
नौ जना पत्रकारहरु पुरस्कृत
सुनसरी जिल्लामा कार्यरत ९ जना पत्रकारहरु विभिन्न पत्रकारिता पुरस्कारबाट पुरस्कृत भएका छन् । नेपाल पत्रकार महासंघ सुनसरीको आइतबार सम्पन्न ९ औं अधिवेशनमा उनीहरु पुरस्कृत भएका हुन् ।
धरान ८ स्थित लाङ्घाली सामुदायिक वनको सभाहलमा आयोजित अधिवेशनमा जिल्ला विकास समिति सुनसरीले स्थापना गरेको विकास पत्रकारिता पुरस्कारबाट पत्रकारहरु राजकुमारी कार्की, भवानी बराल र कृष्ण अधिकारी पुरस्कृत भएका हुन् । पुरस्कारको राशी जनही १५ हजार रहेको छ ।
यस्तै, जनही २० हजार राशी भएको इटहरी नगरपालिकाले स्थापना गरेको विकास पत्रकारिता पुरस्कार पीबी दियाली र बाबुराम सुवेदीले पाए । धरान नगरपालिका विकास पत्रकारिता पुरस्कार भने पत्रकार भैरव आङ्ला र सरिता पुमा राई थापे । यो पुरस्कारको राशी जनही १० हजार रुपैया रहेको छ । यस्तै, तेजनाथ दाहाल युवा स्मृति पुरस्कारबाट कृष्ण जुनेली भट्टराई, वेदनाथ कृषि पत्रकारिताबाट पुरस्कार प्रेम बास्तोला पुरस्कृत भए । पुरस्कृत पत्रकारहरुलाई नेपाल पत्रकार महासंघका केन्द्रीय महासचिव ओम शर्मा र कोशी अञ्चल प्रहरी कार्यालय धरानका प्रमुख(एसएसपी) यादवराज खनालले पुरस्कार प्रदान गरेका थिए ।
Comments
Post a Comment