बस यात्रामा लठ्याएर वृद्धालाई लुट्ने महिला पक्राउ

धरान । बस यात्राको क्रममा बृद्धाहरुलाई नशालु पदार्थ खुवाएर बेहोस बनाई लुटपाट गर्ने एक महिलालाई प्रहरीले पक्राउ गरेको छ । लामो समयदेखि बृद्धाहरुलाई लठ्याएर लुटपाटमा संलग्न भरौल ७, सुनसरी घर भई हाल खनार ६ मा डेरा गरी बस्ने ५६ बर्षीय कुमारी विष्णु कटुवाललाई प्रहरीले पक्राउ गर्न सफल भएको हो ।
पछिल्लो समयमा यही फागुन १२ गते धरानबाट लेटाङ हिडेकी ७३ बर्षीय डिल्लीमाया लिम्बू पनि लुटिएपछि इलाका प्रहरी कार्यालय धरानले अनुसन्धान तीब्र बनाएको थियो । विभिन्न उपाय लगाउदै सक्रिय रहेको प्रहरीले अन्ततः लुटेरा कटुवाललाई खनारस्थित डेराबाट पक्राउ गर्न सफल भयो । अभियुक्त कटुवाल पेशेवार लुटेरा भएको प्रहरीको भनाई छ ।
इलाका प्रहरी कार्यालय धरानले मंगलबार पत्रकार सम्मेलन गरेर पक्राउ परेका कटुवाल र उनको साथबाट वरामद समानहरु सार्वजनिक गरेको थियो । डिएसपी सञ्जयसिंह थापाका अनुसार नौ गेडी सुन ९ थान, सुनको वाला एक थान, ५ थान मोवाइल, केही नगद र लठ्याउने औषधी एक सय २१ थान वरामद भएको छ । ‘डिल्लीमायाको लुटिएको करिब ५ तोला सुनको गहना, कपडा र मोवाइल वरामद भएको छ, अभियुक्तले अपराध पनि स्वीकार गरिसकेका छन्’–डिएसपी थापाले भने ।

वरामद सामानहरुका साथ अभियुक्त कटुवलालाई सार्वजनिक गर्दै प्रहरी ।

प्रहरीका अनुसार डिल्लीमाया र उनीअघि असोज १८ गते धरानबाट बेलबारी जानेक्रममा नशालु पेय पदार्थ खुवाएर लुटिएकी केरौन १, मोरङकी ६६ बर्षीय लहनसरी राईले पनि अभियुक्त कटुवालको सनाखत गरिसकेका छन् । लुटिएका सुनका गहनालाई कटुवालले विभिन्न सुन पसलहरुमा धितो राख्ने र विस्तारै थप रकम झिकेर बिक्री गर्ने गरेको डिएसपी थापाले जानकारी दिए । ‘एकै चोटी बिक्री गर्दा सुन पसलेले नपत्ताउने भएकोले शुरुमा धितो राख्ने र विस्तारै अरु पैसा झिक्ने गरेको देखियो’–डिएसपी थापाले भने–‘उनको डेरामा हेर्दा जीवनशैली पनि आश्चर्यजनकरुपमा भव्य रहेको भेटियो ।’ कटुवालले छिमेकीहरुलाई आफु जग्गाको कारोबार गर्ने भन्ने गरेको प्रहरीले जनायो ।
प्रहरी निरीक्षक मुकुन्द रिजालका अनुसार अभियुक्त कटुवालसँग लठ्याउने औषधी ठुलो मात्रा भेटिनुले उनी पेशेवर लुटेरा रहेको पुष्टि भएको छ । ‘कसरी लुट्ने, कसलाई लुट्ने र कहिले भनेर एकदमै योजनावद्धरुपमा घटना गराउने गरेकोले पेशेवर लुटेरा भएको पुष्टि हुन्छ’–उनले भने । अभियुक्त कटुवाललाई जर्बजस्ती चोरीको साथै ज्यान मार्ने उद्योगमा पनि कारबाही प्रक्रिया अघि बढाइने प्रहरीले जनाएको छ । कटुवालले विगतमा पनि थुप्रै लुटपाट गरेको हुनसक्ने प्रहरीको अनुमान छ ।

इलाका प्रहरी कार्यालयमा मंगलबार घटनाबारे जानकारी दिदै पीडित वृद्धा लहनसरी राई(दाया) र अर्की वृद्धा डिल्लीमाया लिम्बू(बाँया) ।

वरामद सामानहरुका साथ अभियुक्त कटुवलालाई सार्वजनिक गर्दै प्रहरी ।